ކަނޑުމަތީގައި ހިންގާ އޮޕަރޭޝަންތަކުގައި ދިމާވާ ހިތާމާވެރި ހާދިސާތަކާ ގުޅިގެން އެމްއެންޑީއެފް އާއި ފުލުހުންގެ އިސް ވެރިން މަޖިލީހަށް ހާޒިރުކުރަން ހުށަހަޅައިފި
11 އޯގަސްޓު 2026 | އަންގާރަ 19:41ފާއިތުވި ހަތަރު މަސްދުވަހު ކަނޑުމަތީގެ އޮޕަރޭޝަންތަކުގައި ސިފައިންނާއި ފުލުހުންގެ ހަތަރު އޮފިސަރަކު ނިޔާވެފައިވާތީ، އެ ހާދިސާތަކުގެ ތަހުގީގެއް ހިންގާފައިވޭތޯ ބެލުމަށް މަޖިލީހުގެ ސަލާމަތީ ޚިދުމަތްތަކާ ބެހޭ ކޮމިޓީއަށް އެ ދެ މުއައްސަސާ ހާޒިރުކުރަން މެންބަރު މުހައްމަދު އިބްރާހީމް ހުށަހަޅުއްވައިފި. އަދި އޮޕަރޭޝަންތަކުގައި އަމަލުކުރާ ސަލާމަތީ މިންގަނޑުތަކާއި ރިސްކް އެސެސްމަންޓް ހަދާ އުސޫލުތައް ސާފުކުރެއްވުމަށް ވެސް މެންބަރު ވަނީ އެދިވަޑައިގެންފައި
ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެންބަރު މުހައްމަދު އިބްރާހީމް (ކުޑޫ) | ރައްޔިތުންގެ މަޖިލިސް
ސަލާމަތީ ޚިދުމަތްތަކުން ކަނޑުމަތީގައި ހިންގާ އޮޕަރޭޝަންތަކުގައި ދިމާވާ ހިތާމާވެރި ހާދިސާތަކާ ގުޅޭގޮތުން މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އާއި މޯލްޑިވްސް ޕޮލިސް ސަރވިސްގެ އިސް ވެރިން، ރައްޔިތުންގެ މަޖިލީހަށް ހާޒިރު ކޮށްދެއްވުމަށް ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެންބަރު މުހައްމަދު އިބްރާހީމް (ކުޑޫ) ހުށަހަޅުއްވައިފި އެވެ.
ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ އަށް އެޑްރެސްކުރައްވާ މެންބަރު ފޮނުއްވި ސިޓީގައި ވިދާޅުވެފައިވަނީ އެމްއެންޑީއެފް އާއި ފުލުހުންގެ އިދާރާ ގުޅިގެން ނުވަތަ ދެ މުއައްސަސާ ވަކިވަކިން ވެސް ކަނޑުމަތީގައި ހިންގާ ޚާއްސަ އޮޕަރޭޝަންތަކުގައި ފާއިތުވި 4 މަސް ދުވަހު 4 އޮފިސަރުން ނިޔާވެފައިވާކަން ބަޔާންކުރައްވާފަ އެވެ.
އެގޮތުން މެއި 2026 ގައި އިޓަލީގެ ޑައިވަރުން ހޯދަން ފީނި ސަރޖެންޓް މަހުދީ ނިޔާވި ހާދިސާ އާއި 11 ޖޫން 2026 ވަނަ ދުވަހު ފުލުހުން ހިންގި މަސްތުވާތަކެތީގެ އޮޕަރޭޝަނެއްގައި ކަނޑުމަތީގައި ހަރަކާތްތެރިވަނިކޮށް ސަރޖެންޓް އަހުމަދު އާސިފް ނިޔާވި ހާދިސާގެ އިތުރުން 6 އޮގަސްޓް 2026 ގައި ކަނޑުމަތީގެ ހާދިސާގައި ގެއްލުނު އެމްއެންޑީއެފްގެ އިބްރާހީމް އަހުމަދު އަދި ފުލުސް މީހާ އަހުމަދު ނާފިއު ފާހަގަކުރެއްވި އެވެ.
މެންބަރު ކުޑޫ ވިދާޅުވީ ކައިރިކައިރީގައި ތަފާތު ހާދިސާތަކުގައި 4 އޮފިސަރަކު ރަސްމީ ވާޖިބު އަދާކުރަމުން ދަނިކޮށް ދިމާވި ކަންކަމުގައި ނިޔާވެފައިވާއިރު މި ހާދިސާތަކާ ގުޅިގެން އެއްވެސް ތަހުގީގެއް ހިންގައި ހާދިސާ ހިނގި ސަބަބުތައް ދެނެގަނެ މިފަދަ ކަންކަން ތަކުރާރު ނުވާނެކަން ކަށަވަރު ކުރުމަށް ނުވަތަ އެއްވެސް ފަރާތެއްގެ އިހުމާލެއް ނުވަތަ ޒިންމާއެއް އަދާނުކުރެވި އޮތްތޯ ބެލިފައިވާކަން އެނގެން ނެތުމުން، ކަމާބެހޭ ފަރާތްތައް ޖަވާބުދާރީ ކުރުވުމަށްޓަކައި ރައްޔިތުންގެ މަޖިލީހުގެ ސަލާމަތީ ޚިދުމަތްތަކާ ބެހޭ ކޮމިޓީ އަށް އެމްއެންޑީއެފް އަދި ފުލުހުންގެ ކަމާބެހޭ ބޭފުޅުން ހާޒިރުކޮށްދެއްވުމަށް އެދިވަޑައިގަންނަވާ ކަމަށެވެ.
މީގެއިތުރުން މެންބަރު ކުޑޫގެ ސިޓީގައި ވަނީ އިތުރު ބައެއް ކަންކަން ވެސް ހިމަނުއްވާފަ އެވެ. އޭގެ ތެރޭގައި އެމްއެންޑީއެފް އާއި ފުލުހުންގެ 4 އޮފިސަރަކު ވަޒީފާގެ ވާޖިބުގައި ނިޔާވި މައްސަލައިގައި ކަން ހިނގާފައިވާ ގޮތުގެ އެއްވެސް ތަހުގީގެއް ސަރުކާރުގެ ރަސްމީ އެއްވެސް އިދާރާއަކުން ހިންގިތޯ ނުވަތަ ނޫންތޯ ބެލުމަށް އެދިވަޑައިގެންފައިވެ އެވެ. އަދި ތަހުގީގެއް ހިންގާފައިނުވާ ނަމަ ހިންގާފައި ނުވާ ސަބަބު ހޯދުމަށާއި ތަހުގީގެއް ހިންގާފައިވާ ނަމަ އެ ތަހުގީގުގެ ހޯދުންތަކުން އެއްވެސް ފަރާތެއް އިހުމާލެއް ނުވަތަ މަސްއޫލިއްޔަތު އަދާނުކޮށް އޮތްކަން ފާހަގަކުރެވިފައިވޭތޯ ސާފުކުރެއްވުމަށް މެންބަރު ވަނީ ހުށަހަޅުއްވާފަ އެވެ.
އޭގެ އިތުރުން ކަނޑުމަތީގެ މިފަދަ އޮޕަރޭޝަންތައް ހިންގުމުގައި އޮފިސަރުގެ ރައްކާތެރިކަމާއި އެ ނޫން ވެސް މިންގަނޑުތައް ކަނޑައެޅިފައި ވަނީ ކިހިނެއްތޯ އާއި، މިފަދަ މިންގަނޑުތަކެއް ނުވަތަ އުސޫލުތަކެއް ލިޔެވި އަމަލު ކުރަމުންދޭތޯ، އަދި މި މިންގަނޑުތައް ތަންފީޒުވަމުންދޭތޯ ބެލުމަށް އޮންނަ އުސޫލަކީ ކޮބައިތޯ ވަނީ ސުވާލު ކުރައްވާފަ އެވެ. އަދި މި ހާދިސާތަކާ ގުޅިގެން އޮޕަރޭޝަނަލް ސޭފްޓީ މިންގަނޑުތަކަށް އަމަލު ކޮށްފައިވޭތޯ ބެލުމުގެ އިތުރުން އިދާރީ ގޮތުން ނުވަތަ އެ ނޫން ވެސް ގޮތަކުން ތަހުގީގު ކޮށްފައިވޭތޯ ނުވަތަ އެއްވެސް އިންކުއަރީ އެއް ހިންގާފައިވޭތޯ ބެލުމަށް މެންބަރު ހުށަހެޅުއްވި އެވެ.
މެންބަރު ވިދާޅުވީ ކޭވް ޑައިވް ކުރުމުގެ ތެރޭގައި ހިނގި ހާދިސާއާއި ފުލުހުންގެ ޑްރަގް އެންފޯސްމަންޓް ޑިޕާޓްމަންޓްގެ އޮފިސަރު ނިޔާވި ހާދިސާ ފަދަ ކަންކަން ތަހުގީގު ކުރުމަށްފަހު އިހުމާލެއްވާ ނަމަ، އެކަންކަން އިސްލާހު ކުރުމަށް އެޅި ފިޔަވަޅުތަކަކީ ކޮބައިތޯ ސާފު ކުރުމަށް އެދިވަޑައިގަންވާ ކަމަށެވެ. އަދި ގއ. އަތޮޅު ކައިރީގައި ދާދިފަހުން އަޑިއަށް ދަނިކޮށް ދޯންޏެއް ސަލާމަތްކުރަން އުޅުމުގެ ތެރޭގައި ގެއްލުނު ސިފައިންގެ މީހާއާއި ފުލުސް މިހާ ގެއްލުނު ހާދިސާ އަށް ބަލާއިރު، މިފަދަ ނުރައްކާތެރި އޮޕަރޭޝަންތަކަށް ނުކުންނައިރު ރިސްކު އެސެސްމަންޓް ހެދުމުގައި އަމަލުކުރާ އުސޫލުތަކަކީ ކޮބައިތޯ ސާފު ކުރެއްވުމަށް ވަނީ ހުށަހަޅުއްވާފަ އެވެ.
އަދި ސަލާމަތީ ޚިދުމަތްތަކުގެ މުވައްޒަފުންނަށް ބޭނުންވާ ތަމްރީނާއި އޮޕަރޭޝަންތަކުގައި ބޭނުންކުރާ ސަލާމަތީ ވަސީލަތްތައް ޒަމާނީ ޓެކްނޮލޮޖީއާ އެއްވަރަށް ތަރައްގީ ކުރެވިފައިވޭތޯ ބެއްލެވުމަށާއި ތަކުރާރުކޮށް މިފަދަ ހާދިސާތައް ހިނގުމުގެ ސަބަބުން މުއައްސަސާތަކުގެ ސަލާމަތީ އިޖުރާއަތްތަކާ މެދު އާންމުންގެ މެދުގައި އުފެދިފައިވާ ކަންބޮޑުވުންތަކަށް ދޭނެ ޔަގީން ކަމަކީ ކޮބައިތޯ ވެސް މެންބަރު ސުވާލު ކުރައްވާފައިވެ އެވެ.
އޭގެ އިތުރުން ވެސް އިތުުރު ކަންކަން އެ ސިޓީގައި މެންބަރު ވަނީ ފާހަގަ ކުރައްވާފަ އެވެ.
