ކައުންސިލްތަކުގެ ބިންތައް އަތުލެވޭ ބިލުގެ މަސައްކަތް 5 ދުވަހުގެ ތެރޭގައި ކޮމިޓީ އިން ނިންމަނީ!
11 އޯގަސްޓު 2026 | އަންގާރަ 12:56ލާމަރުކަޒީ ގާނޫނަށް ހުށަހަޅާފައިވާ އިސްލާހުތަކާ މެދު ކައުންސިލްތަކާއި އާންމުންގެ ކަންބޮޑުވުން އޮތް ނަމަވެސް، އަންނަ އާދިއްތަ ދުވަހުގެ ނިޔަލަށް އެ ބިލުގެ މަސައްކަތް ނިންމުމަށް މަޖިލީހުގެ ކޮމިޓީން ވަނީ ފާސްކޮށްފަ. މި އިސްލާހުތަކުގެ ސަބަބުން ކައުންސިލްތަކުގެ ބާރު ކެނޑި، ލާމަރުކަޒީ ނިޒާމުގެ ރޫހާ ހިލާފުވާނެ ކަމަށް ބުނެ ބައެއް ކައުންސިލްތަކުންނާއި އާންމުން ދަނީ އެ ބިލު އަނބުރާ ގެންދިއުމަށް ގޮވާލަމުން
ރައްޔިތުންގެ މަޖިލީހުގެ ލާމަރުކަޒީ ކޮމިޓީއިން ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ޤާނޫނަށް އިސްލާހު ގެނައުމުގެ ބިލު ދިރާސާކުރުން | ރައްޔިތުންގެ މަޖިލިސް
ކައުންސިލްތަކުގެ އިހުތިސާސްގައި ހިމެނޭ ބިންތަކާއި ތަންތަން ސަރުކާރުގެ ތަރައްގީގެ މަޝްރޫއުތައް ހިންގުމަށްޓަކައި އެ ރަށެއް ނުވަތަ ސިޓީއެއްގެ އިހުތިސާސުން ވަކިކުރަން ސަރުކާރުން ނިންމާ ހާލަތެއްގައި، އެ ތަންތަން ސަރުކާރަށް ނެގޭ ގޮތަށް ލާމަރުކަޒީ ގާނޫނަށް ހުށަހެޅި އިސްލާހުގެ ބިލު، އަންނަ އާދިއްތަ ދުވަހަށް ދިރާސާ ކޮށް ނިންމުމަށް، ރައްޔިތުންގެ މަޖިލީހުގެ ލާމަރުކަޒީ ކޮމިޓީ އިން ނިންމައިފި އެވެ.
އަންގާރަ ދުވަހު ބޭއްވި އެ ކޮމިޓީގެ ބައްދަލުވުމުގައި ކޮލަމާފުށި ދާއިރާގެ މެންބަރު އިބްރާހީމް ދީދީ ވަނީ، އެ ބިލުގެ މަސައްކަތް 5 ދުވަހުގެ ތެރޭގައި ނިންމުމަށް ހުށަހަޅުއްވާފަ އެވެ. އޭނާ ބިލުގެ މުޅި މަސައްކަތް ނިންމާ ސުންގަޑިއެއްގެ ގޮތުގައި އަންނަ އާދިއްތަ ދުވަހުގެ މެންދުރު 12 ޖަހާއިރު ކަނޑައެޅުމަށް މެންބަރު ހުށަހެޅުއްވި އެވެ.
އެ ބައްދަލުވުމުގައި ކެޔޮދޫ ދާއިރާގެ އެމްޑީޕީ މެންބަރު މުހައްމަދު ނިއުޝާދު ވަނީ އަންނަ މަހު 30 ވަނަ ދުވަހު ބިލުގެ މަސައްކަތް ނިންމުމަށް ހުށަހަޅައި ލޯކަލް ގަވަރުމަންޓް އޮތޯރިޓީ (އެލްޖީއޭ) އާއި ކައުންސިލްތަކުގެ ޖަމިއްޔާތަކުގެ އިތުރުން ސިޔާސީ ޕާޓީތައް ކޮމިޓީއަށް ހާޒިރުކޮށް، ޚިޔާލު ހޯދުމަށް ހުށަހަޅުއްވާފަ އެވެ.
އެހެން ނަމަވެސް މެންބަރު ނިއުޝާދުގެ ހުށަހެޅުއްވުން ފާސްވެފަ އެއް ނުވެ އެވެ. އެ ހުށަހަޅުމަށް ތާއީދު ކުރެއްވީ 2 މެންބަރުންނެވެ. އެއީ އައްޑޫ ހިތަދޫ އުތުރު ދާއިރާގެ އެމްޑީޕީގެ މެންބަރު އަބްދުﷲ ސޯދިގު އާއި އައްޑޫ މީދޫ ދާއިރާގެ އަމިއްލަ މެންބަރު އަބްދުއްރަހްމާން އެވެ.
އެ ކޮމިޓީގެ ބައްދަލުވުމުގައި ކޮލަމާފުށި ދާއިރާގެ މެންބަރު އިބްރާހީމް ދީދީގެ ހުށަހެޅުއްވުން ފާސްވެފައި ވަނީ ކޮމިޓީ ބައްދަލުވުމަށް ހާޒިރުވެވަޑައިގެން ތިއްބެވި މެންބަރުންގެ އަޣުލަބިއްޔަތުންނެވެ.
އެ ބިލާ ގުޅިގެން އެތައް ބަޔަކު ދަނީ ކަންބޮޑުވުން ފާޅު ކުރަމުންނެވެ. އެގޮތުން މި އިސްލާހުގައި ހުށަހަޅާފައިވާ ކަންކަމުގެ އާޚިރު ނަތީޖާ އަކީ ރައްޔިތުންގެ ވޯޓަކުން ހޮވާ ކައުންސިލަރުންގެ ބާރުކެނޑި، އެ ބާރު ވަޒީރުންގެ މަޖިލީހަށް ލިބުންކަން ފާހަގަކޮށް، އެ ބިލު އަނބުރާ ގެންދިއުމަށް ރައްޔިތުންގެ މަޖިލީހަށް ވަނީ ޕެޓިޝަނެއް ވެސް ހުށަހަޅާފަ އެވެ.
ޕެޓިޝަންގައި ބުނީ މި އިސްލާހުތަކުން ވަޒީރުންގެ މަޖިލީހުން ނިންމާ ނިންމުންތަކާއި ދެކޮޅު ހަދާކަމަށް ނުވަތަ އެއްބާރުލުން ނުދޭ ކަމަށް ބުނެ ރައްޔިތުން ތަމްސީލު ކުރަން ވޯޓަކުން ހޮވާފައިވާ ކައުންސިލަރުންނަށް ފިޔަވަޅު އަޅަން ފުރުސަތު ލިބޭނެ ކަމަށެވެ.
އޭގެ އިތުރުން ރައްޔިތުންގެ ފަރާތުން ކަންކަމުގައި ބަސްބުނުމުގެ ހައްގުވެސް ހަނިވެގެންދާ ކަމަށާއި އެހެންކަމުން ހުށަހެޅިފައިވާ އިސްލާހުތަކަކީ ލާމަރުކަޒީ ގާނޫނު އަދި އެ ގާނޫނޫގެ ރޫހާއި ޚިލާފު އަދި ބާރު އެބައެއްގެ ފަރާތުން ފެށިގެން އަންނަ ރައްޔިތުންގެ ބާރު ހަނި ކުރާނެ އިސްލާހުތަކަކަށް ވާތީ، އެ ބިލު އަނބުރާ ގެންދިއުމަށް އެ ޕެޓިޝަންގައި ގޮވާލައިފައިވެ އެވެ.
މިކަމުގެ ކަންބޮޑުވުން ފާޅުކޮށް، އެ އިސްލާހު އަނބުރާ ގެންދިއުމަށް ގޮވާލާ، ބ. ފެހެންދޫ އަދި ބ. ތުޅާދޫ ކައުންސިލްގެ ހުރިހާ މެންބަރުންގެ އިއްތިފާގުން ވެސް ވަނީ އެ ބިލު އަނބުރާ ގެންދިއުމަށް ގޮވާލައި، ގަރާރެއް ވެސް ފާސްކޮށްފަ އެވެ. އެ ދެ ކައުންސިލުން ނެރެފައިވާ ގަރާރުގައި ބުނީ އެ އިސްލާހުތަކަކީ، ގާނޫނު އަސާސީގެ 4 ވަނަ މާއްދާގައިވާ ރައްޔިތުންގެ ބާރާއި، 8 ވަނަ ބާބުގައިވާ ލާމަރުކަޒީ އުސޫލުން ދިވެހިރާއްޖޭގެ އިދާރީ ދާއިރާތައް ހިންގުމުގެ މަގްސަދާއި ބޭނުމާއި ރާއްޖެ ހޯދާފައިވާ ޑިމޮކްރެޓިކް ހުރިހާ ކުރިއެރުންތަކަކާ ކަނޑައެޅިގެން ޚިލާފު އިސްލާހުތަކެއް ކަމުގައި ދެކޭ ކަމަށެވެ.
