ކައުންސިލްތަކުގެ ބިންތައް އަތުލެވޭ ބިލު ބޭރު ކޮށްލާ ޕެޓިޝަނަށް، މަޖިލީހުގެ ތަޅުމުގައި ބަހުސްކުރަން މަޖުބޫރުވާ ވަރަށް ސޮއި ހަމަކޮށްފި!
15 އޯގަސްޓު 2026 | ހޮނިހިރު 18:22ލާމަރުކަޒީ ގާނޫނަށް ހުށަހެޅި އިސްލާހުތަކުގެ ސަބަބުން ކައުންސިލްތަކުގެ ބާރު ކެނޑި، ރައްޔިތުންގެ ބަސްބުނުމުގެ ހައްގު ހަނިވާނެތީ އެ ބިލު އަނބުރާ ގެންދިއުމަށް ގޮވާލައި އާންމުންގެ ބޮޑު ތަރުހީބަކާއެކު މަޖިލީހަށް ޕެޓިޝަނެއް ހުށަހަޅައިފި. ވޯޓުލެވޭ އާބާދީގެ 0.5 އިންސައްތަ ސޮއި ހަމަވުމާ ގުޅިގެން، މި ޕެޓިޝަން ދިރާސާކޮށް ސަރުކާރުގެ ސަމާލުކަމަށް ގެނައުމަށް ކަމާގުޅޭ ކޮމިޓީއަށް މިހާރު ވަނީ ލާޒިމުވެފަ.
ރައީސުލްޖުމްހޫރިއްޔާ، މާޅޮސްމަޑުލު ދެކުނުބުރީ ތުޅާދޫ ކައުންސިލާ އތމ ކޮމިޓީއާ ބައްދަލުކުރެއްވުން | ރައީސް އޮފީސް
ދިވެހި ރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނަށް އިސްލާހު ގެނައުމަށް ތުޅާދޫ ދާއިރާ މެންބަރު އަބްދުލް ހައްނާން އަބޫބަކުރު ސްޕޮންސަރ ކުރައްވާ ހުށަަހަޅުއްވާފައިވާ ބިލު އަނބުރާ ގެންދިއުމަށް ގޮވަލައި، ރައްޔިތުންގެ މަޖިލީހަށް ހުށަހެޅި އީ - ޕެޓިޝަނަށް 2140 އަށް ވުރެ ގިނަ މީހުންގެ ސޮއި ހަމަ ކޮށްފި އެވެ.
ރައްޔިތުންގެ މަޖިލީހުގެ އުސޫލުަތައް ބުނާ ގޮތުން މިއީ ތްރެޝްހޯލްޑް 2 ގެ ޕެޓިޝަނެކެވެ. މި ތްރެޝްހޯލްޑް ހަމަވަނީ ދިވެހީންގެ އާބާދީގެ 0.5 ޕަސެންޓާ އެއްވަރަށް ސޮއި ހަމަވުމުންނެވެ. މިއާއެކު މި ޕެޓިޝަން ވެގެން ގޮސްފައި ވަނީ ހާއްސަ ޕެޓިޝަނަކަށެވެ. މިއީ މަޖިލީހުގެ ތަޅުމުގައި ބަހުސްކުރަން މަޖުބޫރުވާ ވަރަށް ސޮއި ހަމަކޮށް ހުށައެޅި ފުރަތަމަ ޕެޓިޝަން އަކަށް ވުމުގެ އިތުރުން މަޖިލިހުގައި ބަހުސް ކުރަންޖެހޭނެ މިފަދަ ފުރަތަމަ ޕެޓިޝަނަށް ވެސް ވެގެންދިޔައީއެވެ.
މަޖިލީހުގެ އީ - ޕެޓިޝަން ގަވާއިދު ބުނާގޮތުން، ޕެޓިޝަނަކަށް 2,100 ސޮއި (ވޯޓުލެވޭ އާބާދީގެ 0.5 ޕަސެންޓް) ހަމަވުމުން، އެ ޕެޓިޝަނެއް މަޖިލީހުގެ ކަމާގުޅޭ ކޮމިޓީއަށް ދިރާސާކުރުމަށް ފޮނުވުން ލާޒިމުވެ އެވެ. އަދި އެ ޕެޓިޝަން، ކޮމިޓީ އަށް ލިބޭތާ ގިނަވެގެން ރަސްމީ ބަންދު ނޫން 2 ދުވަހުގެ ތެރޭގައި އެ ޕެޓިޝަނާ ގުޅޭ ގޮތުން ކޮމިޓީގެ ފުރަތަމަ ބައްދަލުވުން ބާއްވައި، އެ ޕެޓިޝަން ސަރުކަރުގެ ސަމާލުކަމަށް ގެންނަން ވާނެ ކަމަށް ވެސް ބަޔާން ކޮށްފައިވެ އެވެ.
އޭގެ އިތުރުން އެ ޕެޓިޝަނާ މެދު މަޖިލީހުގައި ބަހުސް ކުރުމަށްޓަކައި އެ ޕެޓިޝަން މަޖިލީހުގެ ރައީސް އަށް ފޮނުވަން ވާނެ ކަމަށް ވެސް ގަވާއިދުގައި ވަނީ ބަޔާން ކޮށްފަ އެވެ.
އެ ޕެޓިޝަނަށް ބޭނުންވާ މިންވަރަށް ސޮއި ހަމަ ކޮށްފައިވާއިރު ކައުންސިލްތަކުގެ އިހުތިސާސްގައި ހިމެނޭ ބިންތަކާއި ތަންތަން ސަރުކާރުގެ ތަރައްގީގެ މަޝްރޫއުތައް ހިންގުމަށްޓަކައި އެ ރަށެއް ނުވަތަ ސިޓީއެއްގެ އިހުތިސާސުން ވަކިކުރަން ސަރުކާރުން ނިންމާ ހާލަތެއްގައި، އެ ތަންތަން ސަރުކާރަށް ނެގޭ ގޮތަށް ލާމަރުކަޒީ ގާނޫނަށް ހުށަހެޅި އިސްލާހުގެ ބިލު، އެންމެ 5 ދުވަހުން ދިރާސާ ކޮށް ނިންމުމަށް، ރައްޔިތުންގެ މަޖިލީހުގެ ލާމަރުކަޒީ ކޮމިޓީ އިން ވަނީ ނިންމާފަ އެވެ.
އެ ބިލާ ގުޅިގެން އެތައް ބަޔަކު ދަނީ ކަންބޮޑުވުން ފާޅު ކުރަމުންނެވެ. އެގޮތުން ސޮއި ހަމަކޮށްފައިވާ ޕެޓިޝަންގައި ވެސް ވަނީ މުހިއްމު ކަންކަން ފާހަގަ ކޮށްފަ އެވެ. އެގޮތުން މި އިސްލާހުގައި ހުށަހަޅާފައިވާ ކަންކަމުގެ އާޚިރު ނަތީޖާ އަކީ ރައްޔިތުންގެ ވޯޓަކުން ހޮވާ ކައުންސިލަރުންގެ ބާރުކެނޑި، އެ ބާރު ވަޒީރުންގެ މަޖިލީހަށް ލިބުންކަން ފާހަގަކޮށްފައި ވެ އެވެ.
ޕެޓިޝަންގައި ބުނީ މި އިސްލާހުތަކުން ވަޒީރުންގެ މަޖިލީހުން ނިންމާ ނިންމުންތަކާއި ދެކޮޅު ހަދާކަމަށް ނުވަތަ އެއްބާރުލުން ނުދޭ ކަމަށް ބުނެ ރައްޔިތުން ތަމްސީލު ކުރަން ވޯޓަކުން ހޮވާފައިވާ ކައުންސިލަރުންނަށް ފިޔަވަޅު އަޅަން ފުރުސަތު ލިބޭނެ ކަމަށެވެ.
އޭގެ އިތުރުން ރައްޔިތުންގެ ފަރާތުން ކަންކަމުގައި ބަސްބުނުމުގެ ހައްގުވެސް ހަނިވެގެންދާ ކަމަށާއި އެހެންކަމުން ހުށަހެޅިފައިވާ އިސްލާހުތަކަކީ ލާމަރުކަޒީ ގާނޫނު އަދި އެ ގާނޫނޫގެ ރޫހާއި ޚިލާފު އަދި ބާރު އެބައެއްގެ ފަރާތުން ފެށިގެން އަންނަ ރައްޔިތުންގެ ބާރު ހަނި ކުރާނެ އިސްލާހުތަކަކަށް ވާތީ، އެ ބިލު އަނބުރާ ގެންދިއުމަށް އެ ޕެޓިޝަންގައި ގޮވާލައިފައިވެ އެވެ.
މެންބަރު އަބްދުލް ހައްނާން އަބޫބަކުރު ސްޕޮންސަރ ކުރައްވާ ހުށަަހަޅުއްވާފައިވާ މި ބިލަށް ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ އެމްޑީޕީ މެންބަރު މުހައްމަދު އިބްރާހީމް (ކުޑޫ) ވަނީ އިސްލާހު ތަކެއް ވެސް ހުށަހަޅުއްވާފަ އެވެ. އަދި އެ ބިލާ ދެކޮޅަށް ބ. ފެހެންދޫ، ގޮއިދޫ އަދި ތުޅާދޫ ކައުންސިލުން ވެސް ގަރާރެއް ނެރެ، އެ ބިލު ބޭރުކޮށްލުމަށް ވަނީ ގޮވާލާފަ އެވެ.
