މި ސަރުކާރުން ދަނީ ކައުންސިލްތަކަށް އޮންނަ ހަމައެކަނި ބާރަކީ ވިހާ މަރުވާ ބެލެހެއްޓުން ކަމަށް ހެދުމަށް މަސައްކަތް ކުރަމުން: މައުރޫފް
10 އޯގަސްޓު 2026 | ހޯމަ 06:58ލާމަރުކަޒީ ގާނޫނަށް ހުށަހަޅާފައިވާ އިސްލާހަކީ ކައުންސިލްތަކުގެ ބާރުތައް ކަނޑުވާލައި، ގާނޫނުއަސާސީއާ ހިލާފަށް ހުށަހަޅާފައިވާ ބިލެއް ކަމަށް ކެންދޫ ދާއިރާގެ މެންބަރު މައުރޫފް ޒާކިރު ވިދާޅުވެއްޖެ. މި ބަދަލުގެ ސަބަބުން ރަށު ކައުންސިލްތަކުގެ އިހުތިސާސްގައިވާ ބިންތައް ސަރުކާރަށް ނެގުމުގެ ފުރުސަތު ލިބި، މުޅި ނިޒާމު ފުނޑިގެންދާނެ ކަމަށް ވިދާޅުވެ މެންބަރު ވަނީ ކަންބޮޑުވުން ފާޅުކުރައްވާފައި
ރައްޔިތުން މަޖިލީހުގެ ޖަލްސާއެއްގައި ކެންދޫ ދާއިރާގެ މެންބަރު މައުރޫފު ޒާކިރު ވާހަކަ ދައްކަވަނީ | ރައްޔިތުންގެ މަޖިލިސް
މި ސަރުކާރު ވެރިކަމާ ހަވާލުވި ދުވަހުން ފެށިގެން ވެސް ކުރަމުންދާ ހަމައެކަނި މަސައްކަތަކީ ރައްޔިތުންނަށް ގާނޫނު އަސާސީ އިން ލިބިދީފައިވާ ހުރިހާ ބާރުތަކެއް ހަނިކޮށް، ކައުންސިލްތަކުގެ ބާރު މުޅިން ކަނޑުވާލުން ކަމަށް ރައްޔިތުންގެ މަޖިލީހުގެ ކެންދޫ ދާއިރާގެ މެންބަރު މައުރޫފް ޒާކިރު ވިދާޅުވެއްޖެ އެވެ.
ހޯމަ ދުވަހުގެ ރައްޔިތުންގެ މަޖިލީހުގެ ޖަލްސާގައި ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނަށް ތުޅާދޫ ދާއިރާގެ މެންބަރު އަބްދުއް ހަންނާން އަބޫބަކުރު ހުށަހެޅުއްވި އިސްލާހުގެ ބިލަށް ވަނީ ބަހުސް ކޮށްފަ އެވެ.
މެންބަރު ހުށަހެޅުއްވި ބިލުގައި ވަނީ ކައުންސިލްތަކުގެ އިހުތިސާސްގައި ހިމެނޭ ބިންތަކާއި ތަންތަން ސަރުކާރުގެ ތަރައްގީގެ މަޝްރޫއުތައް ހިންގުމަށްޓަކައި އެ ރަށެއް ނުވަތަ ސިޓީއެއްގެ އިހުތިސާސުން ވަކިކުރަން ސަރުކާރުން ނިންމާ ހާލަތެއްގައި އެ ތަންތަން ސަރުކާރަށް ނެގޭ ގޮތަށް ލާމަރުކަޒީ ގާނޫނު ބަދަލުކުރުމަށެވެ.
އެ ބިލަށް ބަހުސް ކުރައްވަމުން ބިލާ ގުޅިގެން ކަންބޮޑުވުން ފާޅުކުރައްވާ މައުރޫފް ވިދާޅުވީ ދިވެހި ދައުލަތުގެ އެންމެހާ ބާރުތައް ފެށިގެން އަންނަނީ ރައްޔިތުންގެ ކިބައިން ކަމަށް ގާނޫނު އަސާސީގެ 4 ވަނަ މާއްދާގައި ބުނާ ކަމަށާއި މި ބާރުތައް ދެމިއޮންނާނީ ރައްޔިތުންގެ ކިބައިގައި ކަމަށް ވެސް ބަޔާން ކުރާ ކަމަށެވެ.
އެހެން ނަމަވެސް މި ސަރުކާރުން ދަނީ ކެނޑިނޭޅި، ރައްޔިތުން އިންތިޚާބު ކޮށްފައިވާ ކައުންސިލްތަކުގެ ބާރު ކަނޑުވާލުމަށް މަސައްކަތް ކުރަމުން ކަމަށް މައުރޫފް ވިދާޅުވި އެވެ.
ކައުންސިލްތަކެއް އިންތިޚާބުކޮށް، ކައުންސިލްތަކަށް ގާނޫނު އަސާސީގައި ބުނާ ގޮތަށް ބާރުތައް ދެވިފައި ވަނިކޮށް އެ ބާރުތައް ހަނިކޮށް، ގާނޫނު އަސާސީ އިން ދީފައިވާ މި ބާރުތައް ކައުންސިލްތަކާ ރައްޔިތުންގެ އަތުން ހަނިވާ ގޮތަށް ހުށަހެޅޭ މި އިސްލާހަކީ ގާނޫނު އަސާސީއާ ޚިލާފު އިސްލާހެކޭ. އަޅުގަނޑު މި ދަންނަވަނީ މިނިވަން މެންބަރަކު ލައްވާ ސަރުކާރުން ގަސްތުގައި މުޅި ލާމަރުކަޒީ ނިޒާމު، ފުނޑާލުމަށްޓަކައި މި ސަރުކާރު އައި ދުވަހުން ފެށިގެން ކުރަމުންދާ މަސައްކަތުގެ ތެރެއިން އަނެއްކާ، ކައުންސިލްތަކަށް ހަމައެކަނި ލިބިފައި އޮތް ބާރުތައް ފުނޑުފުނޑު ކޮށްލުމަށްޓަކައި އަނެއްކާ ލާމަރުކަޒީ ނިޒާމަށް ގެންނަ ބަދަލެކޭ. މި ބަދަލުގެ ސަބަބުން މުޅި ނިޒާމުން ކައުންސިލްތަކަށް ލިބިފަ އޮތް ހުރިހާ ބާރެއް ނިމުމަކަށް އައީ. މި ބަދަލާ އެކު ކައުންސިލަށް ކުރެވޭނެ ހަމައެކަނި ކަމަކީ ވިހާ މަރުވާ ބެލެހެއްޓުން. އެ ނޫން އެއްވެސް ކަމެއް ނުކުރެވޭނެ. މިއީ ގާނޫނު އަސާސީގެ ބާރު ކަނޑުވާލުމަށްޓަކައި ކުރެވޭ ކަމެއްކެންދޫ ދާއިރާގެ މެންބަރު މައުރޫފް ޒާކިރު
މައުރޫފް ވިދާޅުވީ މިއަދު މި ބިލާ ގުޅިގެން އެތައް ރައްޔިތުންނެއް ކަންބޮޑުވުން ފާޅުކުރަމުންދާ ކަމަށެވެ. އަދި އެ ބިލު އަނބުރާ ގެންދިއުމަށް ގޮވާލައި ރައްޔިތުންގެ މަޖިލީހަށް ޕެޓިޝަނެއް ހުށަހަޅާފައިވާ ކަން ފާހަގަ ކުރައްވާ މެންބަރު ވިދާޅުވީ، މިހާރު 500 އަށް ވުރެ ގިނަ ރައްޔިތުން އެ ޕެޓިޝަންގައި ސޮއިކޮށްފައިވާ ކަމަށެވެ.
މި އިސްލާހާ ދެކޮޅަށް ރައްޔިތުން ނުކުންނަން ޖެހޭ ކަން ފާހަގަކުރައްވާ މެންބަރު ވިދާޅުވީ މި އިސްލާހުގެ ސަބަބުން، ރައްޔިތުންނަށް ލިބިދީފައިވާ ބާރާއި ކައުންސިލްތަކަށް ލިބިދޭ ބާރު، އެކީ އެކަށް ނިމިގެންދާތީ ކަމަށެވެ. އަދި މިއަދު ކައުންސިލްތަކެއް ގާއިމު ކޮށްފައި އޮތުމުގެ އެއްވެސް ބޭނުމެއް ނެތް ކަމަށާއި ހުރިހާ ބާރުތަކެއް ވަޒީރުންނަށް ދީގެން ސަރުކާރުން ލާމަރުކަޒީ ނިޒާމު ފުނޑާލަމުންދާ ކަމަށް މެންބަރު ތަކުރާރުކޮށް ވިދާޅުވި އެވެ.
