"ގައުމު ފުރަތަމަ" ޑްރާމާ: ވާހަކައިގައި ބަތަލެއް، އަމަލުގައި ޣައްދާރެއް!

ގައުމީ ދުވަހުގެ މުނާސަބަތުގައި ރައީސް ޑރ. މުހައްމަދު މުއިއްޒު ދެއްކެވި ވާހަކަފުޅަކީ، ތާރީޚުގެ ސަފުހާތަކުން މީގެ 467 އަހަރު ކުރީގެ ބަތަލުންގެ ގުރުބާނީގެ ހަނދާންތައް އައުކުރައްވައި، ގައުމުގެ މިނިވަންކަމާއި ސިޔާދަތަށްޓަކައި މޭދިއްކުރައްވާ ދެއްކެވި ހިތްގައިމު ޑްރާމާއެއް ތޯ އެވެ. މީގެ އަހަރުތަކެއް ކުރިން ކަނޑު ބާޒުގެ ނަމުން މަޝްހޫރުވި ފުރެތިކާލުންގެ އިސްތިއުމާރީ އަނިޔާތަކުން މި ދީބު މިންޖުކޮށްދިނުމަށް ޖިހާދުކޮށް، ފުރާނަ ގުރުބާންކުރި ގައުމީ ބަތަލުންގެ އަގުހުރި ޚިދުމަތްތަކުގެ މައްޗަށް އެމަނިކުފާނު ވާހަކަފުޅު ދެއްކެވި އެވެ. އަދި ބޭރުގެ ބާރުތަކުގެ މުށުތެރެއަށް ރާއްޖެ ދިޔަ ކޮންމެ ފަހަރަކު ގައުމަށް ހެޔޮ ނޭދޭ އަމިއްލަ އެދުން ބޮޑު ބައެއްގެ ޚިޔާނާތް އެކަމުގެ ސަބަބަކަށްވި ކަމަށާއި، މިއަދު ވެސް އެފަދަ ހިތި ތަޖުރިބާތައް އިއާދަވިޔަ ނުދިނުމަށް އަޒުމު އައުކުރަންޖެހޭ ކަމަށް ވިދާޅުވި އެވެ.

ނަމަވެސް، މިއަދުގެ ހިތްދަތި ހަގީގަތަކީ، ގައުމުގެ މިނިވަންކަމަށްޓަކައި ފުރާނަދޫކޮށްލި ޝަހީދުންނާއި އަދި މިއަދު މި ގައުމުގެ ނާޒުކު ހާލަތުގެ ސަބަބުން ކޮންމެ ދުވަހަކު ވޭނާއި ތަދުގައި ދިރިއުޅެމުންދާ އާންމު ރައްޔިތުންނަށް މި ވެރިކަމުން އެއްވެސް ވަރަކަށް އަޅައިނުލާ ކަމެވެ. ތާރީޚުގައި ގައުމަށްޓަކައި ލޭއޮހޮރުވާލި އަދި ފުރާނަ ގުރުބާންކުރި ބަތަލުންނަށް ހަގީގީ ލޯތްބެއް ދެވޭނީ، އެ ބަތަލުން ރައްކާތެރި ކުރަން މަސައްކަތްކުރި މި ގައުމުގެ ރައްޔިތުންނަށް އިހުލާސްތެރިވެ، ގައުމުގެ މުސްތަގުބަލު އުޖާލާ ކޮށްގެންނެވެ.

އެހެންނަމަވެސް، ވެރިކަމުގެ އުސްގަނޑަށް ވަޑައިގަތުމަށްފަހު ރައީސް މުއިއްޒު ކަންކަން ކުރައްވަމުން ގެންދަވާ ގޮތުން ހާމަވަނީ، އެމަނިކުފާނަށް ގައުމުގެ މާޒީގެ ބަތަލުންނާއި އަދި މިއަދު ދިރިތިބި ރައްޔިތުންގެ އަގެއް ނެތްކަމެވެ. ބޭރުގެ ބާރުތަކުގެ ނުފޫޒާއި ދަރަނިތަކުގެ ދަންތުރައިގައި ގައުމު ބަނދެވި، އިގްތިސާދު ފުނޑިގެންދާއިރު، ރައްޔިތުންގެ ކަރުނައާއި ވޭނަށް ނަޒަރެއްގެ މިންވަރު ވެސް ދެއްވާފައެއް ނުވެ އެވެ. އަމިއްލަފުޅު ވެރިކަމާއި ޕާޓީގެ މަސްލަހަތު ކުރިއަށް ނެރުއްވުމުގެ ސަބަބުން، ގައުމުގެ ސިޔާދަތާއި މިނިވަންކަން ނުރައްކަލުގެ ތެރެއަށް ވެއްޓިގެންދާތަން ބަލަން ހުންނެވުމަކީ، ގައުމުގެ މުސްތަގުބަލަށްޓަކައި ފުރާނަދިން މާޒީގެ ބަތަލުންގެ ހަނދާންތަކަށް ދެވޭ އެންމެ ބޮޑު ބޭއިންސާފެވެ. އެއީ ގައުމަށް ޣައްދާރު ވެވަޑައިގަތުމެވެ. ރައީސް ޑރ. މުހައްމަދު މުއިއްޒު ވިދާޅުވާ "ގައުމު އިސްކުރުމުގެ ޝިއާރު" ނުވަތަ "ނޭޝަން ފަސްޓް ޕޮލިސީ" ވެގެންދަނީ، ހަމައެކަނި ވެރިކަމުގެ ދަހިވެތިކަމުގައި ރައްޔިތުންގެ ލޮލުގައި އަނދުނެއް އަޅުވާލުމަށް ބޭނުންކުރާ ސިޔާސީ އާލާތަކަށެވެ.

ގައުމުގެ ސިޔާދަތާއި މިނިވަންކަން ދިފާއުކުރުމުގެ ވާހަކައަކީ ހަމައެކަނި ޕޯޑިއަމެއްގެ ކުރިމަތީގައި ދައްކާ ހިތްގައިމު ވާހަކަތަކަކަށް މިއަދު ވަނީ ވެފަ އެވެ. ނަމަވެސް ފަރުދާގެ ފުރަގަހުގައި ހިނގަމުންދަނީ، އަމިއްލަ ސިޔާސީ އެދުމާއި، ޕާޓީގެ މަސްލަހަތު އިސްކޮށް، ގައުމުގެ އަސްލު މިސްރާބު ނުރައްކަލުގެ ތެރެއަށް ވައްޓާލުމަށްޓަކައި ކުރެވެމުންދާ މަސައްކަތްތަކެވެ. އެގޮތުން ވެރިކަމަށް ވަޑައިގަތުމަށްޓަކައި ރައީސް މުއިއްޒު ގެންގުޅުއްވި ސިޔާސީ އުކުޅާއި، ވެރިކަމަށް ވަޑައިގަތުމަށްފަހު ދެއްކެވި ހަގީގީ ކުލަވަރުން އެކަނިވެސް ގައުމަށް ދެއްވަމުން ގެންދަވާ ގެއްލުންތައް ވަރަށް ސާފެވެ.

ވެރިކަމުގެ ކުރީކޮޅު "އިންޑިއާ އައުޓް" ގެ ނަމުގައި ބޮޑެތި ޝިއާރުތައް ކުރިއަށް ގެންނަވާ، މުޒާހަރާ ކުރައްވާ، މުޅި ދުނިޔޭގެ ކުރިމަތީގައި ދިވެހީންގެ އަގު ވައްޓާލައްވާ ބޭރުގެ ގުޅުންތައް ނުރައްކަލުގެ ތެރެއަށް ވައްޓާލެއްވުމަށް ފަހު، އެންމެ ފަހުން ގައުމުގެ އިގްތިސާދު ފުނޑިގެންދާ ހިސާބަށް ދިއުމުން، ކުރިން "އައުޓް" ކޮށްލަން އުޅުއްވި ފަރާތްތަކުގެ ކިބައިން އެހީ ހޯދެއްވުމަށް އަލުން ގުންފައި ޖައްސަވާ، ކުރިއަށް ވަޑައިގަންނަވަނީ ކޮން އުސޫލަކުން ތޯ އެވެ؟ ގައުމީ މިނިވަންކަމާއި ސިޔާދަތުގެ ވާހަކަފުޅު ދައްކަވަމުން، ގައުމުގެ މާލީ މިނިވަންކަން ބޭރުގެ ނުފޫޒުތަކާއި ދަރަނިތަކުގެ ދަންތުރައަށް ހުށަހެޅުއްވުމަކީ ގައުމުދެކެ ވެވަޑައިގަންނަވާ ލޯތްބެއް ކަމަށް ވިދާޅުވަނީ ކޮން ހަމައަކުން ތޯ އެވެ؟ އަމިއްލަފުޅު ވެރިކަން ދެމެހެއްޓެވުމަށްޓަކައި ގައުމުގެ މުސްތަގުބަލު ހިތުހުންނެވި ގޮތަކަށް ކުޅިވަރަކަށް ހެއްދެވުމަކީ ގައިމުވެސް ގައުމީ ބަތަލުންގެ ސިފަތަކެއް ނޫނެވެ.

ޚަރަދު ކުޑަކުރައްވާނެ ކަމަށާއި ސިޔާސީ މަގާމުތައް މަދުކުރައްވާ، އިސްރާފު ހުއްޓުވާނެކަމަށް ރައްޔިތުންނަށް ވެވަޑައިގެންނެވި ވައުދުފުޅުތަކަކީ މިއަދު ބޯދާ ޖޯކަކަށް ވެފައިވާ ކަންކަމެވެ. ދައުލަތުގެ ބަޖެޓު ދަރަނިވެރިވެ، އާންމު ރައްޔިތުން އުފުލަމުންދާ ބުރައަށް ބެލުމެއްނެތި، ސިޔާސީ ނުފޫޒު ފެތުރުމަށްޓަކައި ސުމާރެއް ނެތް އަދަދުތަކަށް ސިޔާސީ މަގާމުތައް އިންތިހާއަށް އިތުރުކޮށް، ދައުލަތުގެ ފައިސާ ބޭކާރު ކުރުން ނޫން ކަމެއް މި ވެރިކަމުން ނުކުރެ އެވެ.

ބޭރު ފައިސާގެ ދަތިކަން އިންތިހާއަށް ބޮޑުވެ، ގައުމުގެ ކުދި އަދި މެދުފަންތީގެ ވިޔަފާރިތަކާއި އާންމު ރައްޔިތުންގެ ދިރިއުޅުން ހުއްޓުމަކަށް އަންމުންދާއިރު، ރައްޔިތުންނަށް ވެވަޑައިގެންނެވި ވައުދުފުޅުތައް ފުނޑުފުނޑުވެ، ކަޅު ބާޒާރުގައި ޑޮލަރުގެ އަގު އުފުލިގެން ދިއުމަކީ މި ސަރުކާރުގެ ނާގާބިލުކަމާއި ނޭއްގާނީކަމުގެ އެންމެ ބޮޑު ހެތްކެވެ.

"ގައުމު ފުރަތަމަ" ކަމަށް ވިދާޅުވާއިރު، ފެންނަ މަންޒަރަކީ މުޅިން ވެސް "އަޅުގަނޑު ފުރަތަމަ" ނުވަތަ "އަޅުގަނޑުގެ ޕާޓީ ފުރަތަމަ" ޕޮލިސީ އެވެ. ގައުމީ ދުވަހުގެ މުނާސަބަތުގައި ވިދާޅުވާ ފޮނި ވާހަކަފުޅުތަކާއި، ވެރިކަމުގެ ހުންގާނުގައި ހުންނަވައިގެން ޤައުމަށް ކަންކުރައްވަމުން ގެންދަވާ ގޮތް އުޑާއި ބިމާހާ ތަފާތެވެ.

ގައުމަށް ލޯބިކުރުމަކީ ދުވަހުން ދުވަހަށް، އަމަލުތަކުން ފެންނަ، ސިޔާސީ މަކަރާއި ޚުދުމުޚުތާރު ވިސްނުމުން އެއްކިބާވެފައިވާ ސާފު ތާހިރު ޚިދުމަތެކެވެ. ގައުމީ ބަތަލެއްގެ ސިފަ ދެއްކެވުމަށް ކިތަންމެ ވަރަކަށް މަސައްކަތްޕުޅު ކުރެއްވި ނަމަވެސް، ގައުމުގެ ހަގީގީ ދުޝްމަނަކީ ގައުމުގެ ނަމުގައި އަމިއްލަ އެދުން އިސްކޮށް، ދޮގު ވައުދުތަކުން ރައްޔިތުންގެ ހިތާ ސިކުނޑިއާ ކުޅެލާ ވެރިންކަން މިއަދުގެ ހޭލުންތެރި ދިވެހި ރައްޔިތުންނަށް ވަނީ ވަރަށް ރަނގަޅަށް ވިސްނިފަ އެވެ.

ބޭރު ފައިސާގެ ދަތިކަމާއި ވިޔަފާރިތައް ބަނގުރޫޓުވުމާއި އާންމު ދިރިއުޅުމުގެ ޚަރަދުތައް އިންތިހާއަށް އުފުލިގެން ދިއުމުގެ ސަބަބުން ރައްޔިތުން އުފުލަމުންދާ ބުރަތައް ހާމަވަމުން ދާއިރު ވެސް، އަދުގެ ސަރުކާރުގެ ވެރިން ތިއްބެވީ އަމިއްލަ ފައިދާއާއި މުއްސަނދިކަން ހޯދުމުގެ މަޝްޣޫލުކަމުގަ އެވެ.

މިއަދު މި ގައުމުގައި ހަމަޖެހުމެއްނެތި، ނިކަމެތިކަމުގައި ދިރިއުޅެމުންދާ ކޮންމެ ރައްޔިތަކީ ވެސް މި ވެރިކަމުގެ ނާގާބިލުކަމާއި އިހުލާސްތެރިކަން ކުޑަކަމުގެ ސަބަބުން ހާލުގައި ޖެހި، ބިކަވަމުންދާ ބައެކެވެ. ގައުމުގެ ނަމުގައި ވޯޓު ހޯދުމަށްޓަކައި ރައްޔިތުންނަށް ދޮގު ވައުދު ވެވަޑައިގެން، ވެރިކަމާ ހަވާލުވެވަޑައިގެން، ރައްޔިތުންގެ މަތިން ހަނދާން ނައްތަވާލެއްވުމަކީ ގައުމީ ލޯތްބެއް ނޫނެވެ. އެއީ ރައްޔިތުންނަށް ވެވޭ ޣައްދާރު ކަމެވެ.