އިންޑިއާގެ މިނިވަން ދުވަހުގެ މުނާސަބަތުގައި، ރައީސުލްޖުމްހޫރިއްޔާ ތަހުނިޔާ ފޮނުއްވައިފި
15 އޯގަސްޓު 2026 | ހޮނިހިރު 15:36އިންޑިއާގެ މިނިވަންދުވަހުގެ މުނާސަބަތުގައި ރައީސް ފޮނުއްވި ސިޓީފުޅުގައި، އެ ޤައުމުން ހޯދާފައިވާ އިޖުތިމާއީ އަދި އިޤްތިސާދީ ކުރިއެރުންތަކާއި ސަރަހައްދީ ހަމަޖެހުމަށް އަދާކުރާ ދައުރު ފާހަގަކުރެއްވި. އަދި ރާއްޖޭގެ ތަރައްޤީއަށް އިންޑިއާއިން ދޭ އެހީތެރިކަމަށް ޝުކުރު އަދާކުރައްވައި، ދެ ޤައުމުގެ ދެމެދުގައި އޮތް އިސްތިރާޖީ ގުޅުން އިތުރަށް ބަދަހިކުރައްވާނެ ކަމުގެ ޔަޤީންކަން އެމަނިކުފާނު ދެއްވި
ރައީސް ޑރ. މުހައްމަދު މުއިއްޒު އިންޑިއާގެ ބޮޑުވަޒީރު ނަރެންދުރަ މޯދީއާއެކު | ރައީސް އޮފީސް
އިންޑިއާގެ 80 ވަނަ މިނިވަން ދުވަހުގެ މުނާސަބަތުގައި، އެ ޤައުމުގެ ރައީސާ ދުރޫޕަދީ މުރުމޫއަށާއި އިންޑިޔާގެ ބޮޑުވަޒީރު ނަރެންދުރަ މޯދީއަށް، ރައީސް ޑރ. މުހައްމަދު މުއިއްޒު ތަހުނިޔާ ފޮނުއްވައިފި އެވެ.
ދެބޭފުޅުންނަށް ވަކިވަކިން ފޮނުއްވި ތަހުނިޔާގެ ސިޓީފުޅުތަކުގައި، ރައީސް މުއިއްޒު ވަނީ އިންޑިޔާގެ ލީޑަރުންނާއި ސަރުކާރަށާއި އަޚުވަންތަ ރައްޔިތުންނަށް ދިވެހި ސަރުކާރާއި ރައްޔިތުންގެ ނަމުގައި ތަހުނިޔާ އާއި ހެޔޮއެދުންތައް ފޮނުއްވާފަ އެވެ.
ރައީސާ މުރުމޫއަށް ފޮނުއްވި ސިޓީފުޅުގައި، ރައީސް މުއިއްޒު ވަނީ، އިންޑިއާގެ ދިމިޤްރާތީ ބަދަހިކަމާއި އިޖުތިމާއީ އަދި އިޤްތިސާދީގޮތުން ހޯދާފައިވާ ކުރިއެރުންތަކަކީ، މުހިއްމު ކާމިޔާބީއެއްގެ ގޮތުގައި ފާހަގަކުރައްވާފަ އެވެ. އަދި އިންޑިއާ ކަނޑުގެ ސަރަހައްދުގައި ސުލްހަޔާއި ހަމަޖެހުމާއި ތަނަވަސްކަން ޤާއިމުކުރުމުގައި އިންޑިއާއިން އަދާކުރާ މުހިންމު ދައުރު ވެސް އެމަނިކުފާނު ފާހަގަކުރައްވާފައިވެ އެވެ.
ބޮޑުވަޒީރު، ނަރެންދްރަ މޯދީއަށް ރައީސް މުއިއްޒު ފޮނުއްވި ސިޓީފުޅުގައި، ދިވެހިރާއްޖޭގެ ތަރައްޤީއަށް އިންޑިއާއިން ދެއްވަމުން ގެންދަވާ އެހީތެރިކަމަށްޓަކައި ޝުކުރު އަދާކުރައްވައި، ދެ ޤައުމުގެ ދެމެދުގައި ގިނަ ދާއިރާތަކަކުން، އިސްތިރާޖީ ގޮތުން ގުޅުން ބަދަހިކޮށް ކުރިއަށް ގެންދަވާނެ ކަމުގެ ޔަޤީންކަން ދެއްވާފައިވެ އެވެ.
އަދި ސިޓީފުޅުތައް ނިންމަވާލައްވަމުން، ރައީސް މުއިއްޒު ވަނީ އިންޑިއާގެ ރައީސާއާއި ބޮޑުވަޒީރަށް ފުރިހަމަ ސިއްހަތާއި ދުޅަހެޔޮކަމަށް އެދިވަޑައިގެން، އިންޑިއާގެ ރައްޔިތުންނަށް ކުރިއެރުމާއި ފާގަތިކަމަށް އެދިވަޑައިގެންފަ އެވެ.
ރައީސް މުއިއްޒުގެ ރަސްމީ އެކްސް އެކައުންޓުގައި ކުރެއްވި ޕޯސްޓެއްގައި މި ޝުއޫރުތައް ތަކުރާރު ކުރައްވަމުން، މިނިވަންކަމުގެ ދިގު މާޒީ ރަމްޒުކޮށްދެނީ އިންޑިއާގެ ސަރުކާރާއި ރައްޔިތުންގެ އުންމީދުތަކާއި ސާބިތުކަމާއި ނުގުޑާފަދަ ޤައުމީ ރޫހުކަން ފާހަގަކުރައްވާފައިވެ އެވެ.
