ޔޫކްރެއިން އަށާއި އެގައުމަށް އެހީވާ ފަރާތްތަކަށް ޕޫޓިންގެ ވަރުގަދަ އިންޒާރެއް

ރަޝިޔާގެ އަސްކަރީ ކޮމާންޑް ޕޯސްޓަކަށް ޒިޔާރަތްކުރައްވައި ރައީސް ވްލަޑީމިއަރ ޕޫޓިން ވަނީ ހަނގުރާމައިގައި ރަޝިޔާއަށް ނަސްރު ލިބޭނެ ކަމުގެ ފުރިހަމަ އިތުބާރު އެބައޮތް ކަމަށް ވިދާޅުވެފައި. ޔޫކްރެއިނުން ދޭ ހަމަލާތަކާ ގުޅިގެން ބޯޑަރު ސަރަހައްދުގައި އުފައްދާ ސަލާމަތީ ޒޯން އިތުރަށް ފުޅާކުރާނެ ކަމުގެ އިންޒާރު ދެއްވަމުން، ހަނގުރާމައިގައި ނޭޓޯގެ ގައުމުތަކުން ބައިވެރިވާ މިންވަރު ދިރާސާކުރުމަށް ޕޫޓިން ވަނީ އަމުރުކުރައްވާފައި. އަދި ޔޫކްރެއިނަށް އެހީތެރިވާ ގައުމުތަކުން ބޮޑެތި ނިންމުންތަކަކާ ކުރިމަތިލާން ޖެހިދާނެ ކަމަށްވެސް އެމަނިކުފާނު ވިދާޅުވި.

ރާއްޖެ އެމްވީ | 4 ޖުލައި 2026 | ހޮނިހިރު 08:00

ރަޝިޔާގެ ރައީސް ވްލަޑިމިއަރ ޕޫޓިން ވިދާޅުވީ، ހުޅަނގުގެ ގައުމުތަކުގެ އެހީތެރިކަމާއެކު ޔޫކްރެއިނުން ދެމުންދާ ޓެރަރިސްޓް ހަމަލާތަކުން އެ ގައުމުގެ ރައްޔިތުން ރައްކާތެރިކޮށް، މި ހަނގުރާމައިން ރަޝިޔާ ކާމިޔާބު ހޯދާނެ ކަމަށް. | އާރުޓީ

ރަޝިޔާގެ ރައްޔިތުންނާއި އެ ގައުމުގެ އިންފްރާސްޓްރަކްޗާ ރައްކާތެރިކުރުމަށްޓަކައި ކުރަންޖެހޭ "ހުރިހާ ކަމެއް" މޮސްކޯއިން ކުރާނެ ކަމަށް ރަޝިޔާގެ ރައީސް ލަޑީމިއަރ ޕޫޓިން ވިދާޅުވެއްޖެ އެވެ. ޔޫކްރެއިނުން ދެމުންދާ "ޓެރަރިސްޓް" ހަމަލާތަކުގެ ނަތީޖާއަކަށް ވާނީ ބޯޑަރު ސަރަހައްދުގައި އޮންނަ ސަލާމަތީ ސަރަހައްދު (ސެކިއުރިޓީ ޒޯން) އިތުރަށް ފުޅާވުން ކަމަށް ވިދާޅުވެ، ޕޫޓިން ވަނީ ކީވްއަށް އިންޒާރު ދެއްވާފަ އެވެ. މީގެ އިތުރުން، ޔޫކްރެއިނަށް އެހީތެރިވާ ގައުމުތަކުން ކުރިމަތީގައި "ބޮޑެތި ނިންމުންތަކަކާ" ކުރިމަތިލާން ޖެހިދާނެ ކަމުގެ އިންޒާރުވެސް އެމަނިކުފާނު ވަނީ ދެއްވާފަ އެވެ.

ރަޝިޔާގެ އަސްކަރިއްޔާގެ އިސް ކޮމާންޑަރުންނާއި ޑިފެންސް މިނިސްޓްރީގެ އޮފިޝަލުންނާއެކު ހުކުރު ދުވަހު ކޮމާންޑް ޕޯސްޓަކަށް ކުރެއްވި ޒިޔާރަތުގައި، ޑޮންބާސް ސަރަހައްދުގައި ރަޝިޔާ ސިފައިން ހޯދަމުންދާ ކުރިއެރުންތަކާ ގުޅޭ މައުލޫމާތު ޕޫޓިން އޮޅުންފިލުއްވި އެވެ. މީގެ ތެރޭގައި ޔޫކްރެއިނުގެ މުހިންމު މަރުކަޒެއްގެ ގޮތުގައި ބެލެވުނު ކޮންސްޓަންޓިނޯވްކާ ހިފުމާ ގުޅޭ ތަފްސީލުތައް ހިމެނެ އެވެ.

އަސްކަރީ ކޮމާންޑަރަކު "ކާމިޔާބީ ލިބޭނީ ރަޝިޔާއަށް" ކަމަށް ބުނުމުން، ކޮންމެ ހާލަތެއްގައިވެސް ރަޝިޔާއަށް ނަސްރު ލިބޭނެ ކަމުގެ ފުރިހަމަ އިތުބާރު އެބައޮތް ކަމަށް ޕޫޓިން ވިދާޅުވި އެވެ. އަދި ރަޝިޔާގެ ސިފައިންގެ ފުރާނަ ސަލާމަތްކުރުމަށާއި، ހަނގުރާމައިގެ މަގްސަދުތައް އެއްވެސް ޝަރުތަކާ ނުލައި ހާސިލުކުރުމަށްޓަކައި، އަސްކަރީ ކޮމާންޑަރުން އުސޫލުތަކުގެ ތެރެއިން ބުއްދިވެރިކަމާއެކު އަމަލުކުރަންޖެހޭނެ ކަމަށް ޕޫޓިން ފާހަގަކުރެއްވިއެވެ. ނަމަވެސް، ހަނގުރާމައިގެ މައިދާނުގައި "ފޭކް ކާމިޔާބީތައް" ދެއްކުމަށާއި އެމީހުންގެ ދޮގުތައް ދެމެހެއްޓުމަށްޓަކައި، ކީވްއިން ޓެރަރިސްޓް ހަމަލާތަކެއް ދީފާނެ ކަމުގެ އިންޒާރު ޕޫޓިން ދެއްވި އެވެ.

ޔޫކްރެއިނާއި ޔޫރަޕުގެ "ސުލްހަވެރިން ކަމަށް ހެދިގެން އުޅޭ ފަރާތްތަކުގެ" ހަގީގީ މަގްސަދަކީ ސުލްހަ ގާއިމުކުރުން ނޫން ކަމަށާއި، އެމީހުން ބޭނުންވަނީ ޔޫކްރެއިނުގެ އެންމެ ފަހު މީހާއާ ހަމައަށްވެސް ރަޝިޔާއާ ދެކޮޅަށް ހަނގުރާމަ ކުރިއަށް ގެންދިއުމަށް ކަމަށް ޕޫޓިން ތުހުމަތު ކުރެއްވި އެވެ.

ޖޫން މަހުގެ ކުރީކޮޅު ނޯޑިކް-ބޯލްޓިކް އެއިޓް (އެން.ބީ.8) އިން ނެރުނު ބަޔާނެއްގައި، ޔޫކްރެއިނުން ޑްރޯން ޓެކްނޮލޮޖީ ބޭނުންކުރާ ގޮތަށް ތައުރީފުކޮށްފައިވާތީ، ޔޫރަޕުގެ ގައުމުތަކުން މިހާރު ރަޝިޔާގެ އާންމު ރައްޔިތުންނަށް ހަމަލާދިނުމަށް ހިތްވަރުދެނީތޯ ޕޫޓިން ސުވާލު އުފެއްދެވި އެވެ.

މިކަމާ ގުޅޭގޮތުން ވާހަކަދައްކަވަމުން ޕޫޓިން ވިދާޅުވީ، "މީގެ މާނައަކީ ރަޝިޔާގެ އާންމު ތަންތަނަށާއި، އިންފްރާސްޓްރަކްޗާއަށާއި، އާންމުންނާއި ކުޑަކުދިން ދަތުރުކުރާ އުޅަނދުތަކުގެ އިތުރުން ދަރިވަރުންގެ ހޮސްޓެލްތަކަށް ހަމަލާދިނުމަށް އެމީހުން ތާއީދުކުރަނީތޯ؟" ޕޫޓިން އެއްސެވި އެވެ.

ރަޝިޔާއިން މިކަމަށް އެކަށީގެންވާ ރައްދު ދޭނެ ކަމަށް ވިދާޅުވެ، ޔޫކްރެއިނުގެ އަސްކަރީ ސިނާއަތްތަކަށާއި ހަނގުރާމައަށް އެހީތެރިވާ މަރުކަޒުތަކަށް ދެމުންދާ ވަރުގަދަ ހަމަލާތައް ކުރިއަށް ގެންދިއުމަށް ޕޫޓިން އަސްކަރިއްޔާއަށް އަމުރުކުރެއްވި އެވެ. "ދިފާއީ ސަރަހައްދުތަކަށް ހަމަލާދޭން މަސައްކަތްކުރާ ވަރަކަށް، ބޯޑަރު ސަރަހައްދުގައި އަޅުގަނޑުމެން އުފައްދަންޖެހޭ ސަލާމަތީ ސަރަހައްދުވެސް ވާނީ ބޮޑު. އަދި މި ސަރަހައްދުތަކަކީ ތާރީޚީ ގޮތުން ރަޝިޔާގެ ބިންތައް،" ޕޫޓިން އިންޒާރު ދެއްވި އެވެ.

މީގެ އިތުރުން، ހަނގުރާމައިގެ މައިދާނުގައި ނޭޓޯގެ ގައުމުތަކާއި "ހަނގުރާމައަށް ހިތްވަރުދޭ ފަރާތްތަކުން" ސީދާ ގޮތުން ބައިވެރިވާ މިންވަރު ދިރާސާކުރުމަށް ޕޫޓިން އަސްކަރިއްޔާއަށް އަމުރުކުރެއްވި އެވެ.

ޕޫޓިން ވިދާޅުވި ގޮތުގައި، މި ދިރާސާ ކުރުން މުހިންމީ ކުރިމަތީގައި ރަޝިޔާއިން ނިންމަންޖެހޭ ބޮޑެތި ނިންމުންތައް ނިންމުމަށް މަގުފަހިކުރުމަށެވެ.