ޗައިނާ އާއި ރަޝިއާގެ އަސްކަރީ މަނަވަރުތައް ގުޅިގެން ޚާއްސަ ތަމްރީނުތަކެއް ކުރިއަށް ގެންދަނީ

ޗައިނާގެ އިރުމަތީ އައްސޭރިފަށުގެ ކަނޑުގެ ސަރަހައްދާއި ވައިގެ ސަރަހައްދުގައި، ޗައިނާ އާއި ރަޝިއާގެ އަސްކަރީ މަނަވަރުތައް ގުޅިގެން ކުރިއަށްގެންދާ ޚާއްސަ ތަމްރީނުތަކެއް މި ހަފުތާގައި ފެށުމަށް ނިންމައިފި އެވެ.

ޗައިނާގެ މިނިސްޓްރީ އޮފް ޑިފެންސުން އާދީއްތަ ދުވަހު ނެރުނު ބަޔާނެއްގައި ބުނެފައިވަނީ، ޗައިނާގެ މުހިންމު ބަނދަރެއް ކަމަށްވާ ކިންގްޑާއޯގެ އައްސޭރިފަށުގައި ކޮންމެ އަހަރަކު ބާއްވާ މި ތަމްރީނުތަކަށްފަހު، ޕެސިފިކް ކަނޑުގެ ސަރަހައްދުތަކެއްގައި ދެ ގައުމު ގުޅިގެން ކަނޑުގެ ސަރަހައްދު ބެލެހެއްޓުމުގެ ޕެޓްރޯލްތަކެއް ވެސް ކުރިއަށްގެންދާނެ ކަމަށެވެ. މީގެ އިތުރުން، ރަޝިއާގެ ދައުލަތުގެ މީޑިއާތަކުން ރިޕޯޓްކޮށްފައިވާ ގޮތުގައި، މި ހޯމަ ދުވަހުން ފެށިގެން ޖުލައި މަހުގެ 13 ވަނަ ދުވަހުގެ ނިޔަލަށް ކުރިއަށްދާ މި ތަމްރީނުތަކުގައި ބައިވެރިވުމަށް ރަޝިއާގެ ޕެސިފިކް ފްލީޓަށް ނިސްބަތްވާ ކްރޫޒާއަކާއި، ކޯވެޓް މަނަވަރަކާއި، ޑީސަލް-އިލެކްޓްރިކް ސަބްމެރީނެއްގެ އިތުރުން ރެސްކިއު އުޅަނދެއް މިހާރު ވަނީ ކިންގްޑާއޯއަށް ގޮސްފަ އެވެ.

ޗައިނާގެ ނޮދަން ތިއޭޓަރ ކޮމާންޑުން ހާމަކޮށްފައިވާ ގޮތުގައި، މި ތަމްރީނުތަކުގައި އެ ގައުމުގެ ފަރާތުން ދެ ޑިސްޓްރޯޔަރާއި، ފްރިގޭޓަކާއި، ސަބްމެރީނަކާއި، ސަޕްލައި މަނަވަރެއްގެ އިތުރުން ރެސްކިއު އުޅަނދެއް ބައިވެރިވާނެ އެވެ.

މި ތަމްރީނުތަކުގެ ތެރޭގައި ދެ ގައުމުގެ އަސްކަރިއްޔާއިން ރިކޮނަސަންސް ނުވަތަ މައުލޫމާތު އެއްކުރުމާއި، ވައިގެ މަގުންނާއި މިސައިލުން ދޭ ހަމަލާތަކުން ދިފާއުވުމުގެ އިތުރުން، ކަނޑުގެ އަމާޒުތަކަށް ހަމަލާދިނުމުގެ ތަމްރީނުތައް ކުރިއަށްގެންދާނެ ކަމަށް ބެލެވެ އެވެ.

މި އަސްކަރީ ހަރަކާތްތައް ފަށާފައި މިވަނީ، ރަޝިއާގެ ރައީސް ވުލަޑީމިއަރ ޕޫޓިން ޗައިނާއަށް ކުރެއްވި ރަސްމީ ދަތުރުފުޅަށް ގާތްގަނޑަކަށް ދެ މަސް ދުވަސް ވެފައި ވަނިކޮށެވެ. އެ ދަތުރުފުޅުގައި ޕޫޓިން ވަނީ ދެ ގައުމުގެ ގުޅުން މީގެ ކުރިން ދުވަހަކުވެސް ބަދަހިނުވާ މިންވަރަށް ވަރުގަދަވެފައިވާ ކަމަށް ސިފަކުރައްވާފަ އެވެ.

މީގެ އިތުރުން، ޗައިނާގެ ރައީސް ޝީ ޖިންޕިންގް ވެސް ވަނީ ދެ ގައުމުގެ ދެމެދުގައި އޮތް ބައިވެރިވުމަކީ ގުޑުވާނުލެވޭނެ ފަދަ ވަރުގަދަ ގުޅުމެއްގެ ގޮތުގައި ސިފަކުރައްވާފަ އެވެ.

ޚާރިޖީ އަދި އިގްތިސާދީ ގޮތުން ގާތް މި ދެ ގައުމުން "ޖޮއިންޓް ސީ" ގެ ނަމުގައި މިފަދަ އަސްކަރީ ތަމްރީނުތައް ބާއްވަމުން އަންނަނީ 2012 ވަނަ އަހަރުން ފެށިގެންނެވެ. މިދިޔަ އަހަރުގެ ތަމްރީނުތައް ބާއްވާފައިވަނީ ރަޝިއާގެ ބަނދަރެއް ކަމަށްވާ ލެޑިވޮސްޓޮކް ކައިރީގައެވެ. އަދި އެ ފަހަރުވެސް ތަމްރީނުތަކަށްފަހު ޕެސިފިކް ކަނޑުގައި ދެ ގައުމު ގުޅިގެން ޕެޓްރޯލް ކޮށްފައިވެ އެވެ.

ރަޝިއާއިން ޔޫކްރެއިނަށް އަރައިގަނެ ކުރަމުންދާ ހަނގުރާމަ ޗައިނާއިން މިހާތަނަށް ކުށްވެރިކޮށްފައެއް ނުވެ އެވެ. ޗައިނާއިން ތަކުރާރުކޮށް ބުނަމުންދަނީ އެ ގައުމަކީ މި މައްސަލައިގައި ވަކި ފަރާތަކަށް ނުޖެހޭ ގައުމެއް ކަމަށާއި، ސުލްހައިގެ ވާހަކަތައް ކުރިއަށްގެންދިއުމަށް އެ ގައުމުން އަބަދުވެސް ބާރުއަޅާ ކަމަށެވެ.