މެކްސިކޯގެ ފިރިހެނަކު އިސްޓާކީނުގައި ފޮރުވައިގެން 200 ބޮނޑު ޖަޕާނަށް ވަގަށް އެތެރެކުރަން އުޅެފި

ޓޯކިޔޯގެ ހަނެޑާ އެއާޕޯޓުން ދަތުރުކުރި މެކްސިކޯގެ ފިރިހެނަކު ގެންގުޅުނު ފޮށިތަކެއްގެ ތެރެއިން، 22 އިސްޓާކީނު ޖޯޑަށް އަޅާފައި ހުރި 200 އެއްހާ ބޮނޑު ފެނުމާ ގުޅިގެން އޭނާ ހައްޔަރުކޮށްފި އެވެ.

އުމުރުން 23 އަހަރުގެ ޑެނިއަލް އިސާކް ވެލާސްކޯ ބަލްތަޒާރުގެ މައްޗަށް ތުހުމަތު ކުރެވެނީ، މިދިޔަ ހޮނިހިރު ދުވަހު ދެކުނު ކޮރެއާއިން ޖަޕާނަށް އެތެރެވިއިރު، އެ ގައުމުގެ ކަސްޓަމްސް ގާނޫނާ ޚިލާފަށް، އެ ސޫފިތަކުގެ މައުލޫމާތު ހާމަނުކޮށް އެތެރެކުރަން އުޅުނު ކަމަށެވެ.

ޓޯކިޔޯގެ މެޓްރޯޕޮލިޓަން ޕޮލިސް ޑިޕާޓްމަންޓުން ހާމަކޮށްފައިވާ ގޮތުގައި، ހުއްދައެއް ނެތި އެ ތަކެތި އެތެރެކުރަން އުޅުނު ކަމަށް އޭނާ ވަނީ އިއުތިރާފުވެފަ އެވެ.

އޭނާގެ ފޮށި ހުޅުވައި ބެލިއިރު، އޭގެ ތެރޭގައި އޮތް އެއް ބޮނޑު އޮތީ މަރުވެފަ އެވެ.

އެ ފޮށިން ފެނުނު ތަކެތީގެ ތެރޭގައި "މެކްސިކަން އެލިގޭޓާ ލިޒާޑް" ނުވަތަ "އާބޯރިއަލް އެލިގޭޓާ ލިޒާޑް" ގެ ނުވަ ބޮނޑު ހިމެނެ އެވެ. މިއީ ހަމައެކަނި މެކްސިކޯގެ އުސް ބިންތަކުގެ ޖަންގަލިތަކުން ފެންނަ، ނެތިދިއުމުގެ ބިރު ހީވެފައިވާ ދިރުންތަކުގެ ބައިނަލްއަގުވާމީ ވިޔަފާރި ކޮންޓްރޯލްކުރާ މުއާހަދާ (ސައިޓީސް) ގެ ދަށުން ރައްކާތެރިކޮށްފައިވާ ބާވަތެކެވެ. މި ބާވަތުގެ އެއްވެސް އެއްޗެއް ބޯޑަރު ހުރަސްކޮށް ވިއްކޭނީ ސަރުކާރުގެ ހާއްސަ ހުއްދައެއް ލިބިގެންނެވެ.

މި މީހާ ތަހުގީގީ އިދާރާތަކަށް މައުލޫމާތު ދީފައިވާ ގޮތުގައި، އޭނާ އެ ބޮނޑުތައް މެކްސިކޯއިން ގަނެފައިވަނީ ކޮންމެ އެއްޗެއް ގާތްގަނޑަކަށް 560 އާއި 750 އާ ދެމެދުގެ ޔެން (ގާތްގަނޑަކަށް 3 އާއި 4 އިނގިރޭސި ޕައުންޑް) އަށެވެ. ޖަޕާނުގައި މި ބާވަތުގެ ޖަނަވާރުތަކަކީ މަދު އެއްޗަކަށް ވާއިރު، އެ ގައުމުގެ ބާޒާރުގައި މީގެ އެއްޗެއް ގާތްގަނޑަކަށް 100,000 ޔެން (520 އިނގިރޭސި ޕައުންޑް) އަށް ވިއްކާ ކަމަށްވެ އެވެ.

ޓޯކިޔޯ ފުލުހުންނަށް ޖުލައި މަހުގެ ފަހުކޮޅު ލިބުނު ސިއްރު މައުލޫމާތަކާ ގުޅިގެން އެނގިފައިވަނީ، މެކްސިކޯގެ ރައްޔިތަކު ޖަޕާނުގައި ބާއްވާ ރެޕްޓައިލް އެގްޒިބިޝަނަކާއި ވިޔަފާރި ފެއާއަކަށް އަމާޒުކޮށްގެން ބޮނޑުތަކެއް ވަގަށް އެތެރެކުރަން އުޅޭ ކަމަށެވެ. މި މައުލޫމާތާ ގުޅިގެން ހަނެޑާ އެއާޕޯޓުގެ ކަސްޓަމްސް އޮފިސަރުން ސަމާލުކަމަށް އައިސް، އޭނާ އެ ގައުމަށް ދިއުމުން ފޮށި ފާސްކުރިއިރު، އިސްޓާކީނުތަކުގެ ތެރެއަށް ލާފައި ހުރި އެ ސޫފިތައް ވަނީ ފެނިފަ އެވެ.

އޭނާގެ ފޮށީގައި "މެކްސިކަން އެލިގޭޓާ ލިޒާޑް" ގެ އިތުރުން އެހެން ބާވަތްތަކުގެ ބޮނޑު ވެސް ހުރި ކަމަށް ފެންނާތީ، ކަމާބެހޭ އިދާރާތަކުން ދަނީ އެއީ ކޮން ބާވަތްތަކެއްތޯ ބަލަމުންނެވެ.

ގަދަ ފެހި ކުލައެއްގައި ހުންނަ، ހަރަކާތްތެރިވުން ލަސް "މެކްސިކަން އެލިގޭޓާ ލިޒާޑް" އާންމުކޮށް ދިރިއުޅެނީ މެކްސިކޯގެ މެދުތެރޭ ސަރަހައްދުގައިވާ ސިއެރާ މާޑްރޭގެ ޖަންގަލިތަކުގަ އެވެ. ނަމަވެސް ގަސް ކެނޑުމާއި، ގޭގައި ގެންގުޅޭ ސޫފިތަކުގެ ގޮތުގައި ވިއްކުމަށްޓަކައި އެ ތަކެތި ހިފުން އިތުރުވުމުގެ ސަބަބުން، މިހާރު މި ބާވަތުގެ އަދަދު ވަނީ ވަރަށް ބޮޑަށް މަދުވެފަ އެވެ. އެހެންކަމުން މިއީ ނެތިދިއުމުގެ ބިރު އޮތް ބާވަތެއްގެ ގޮތުގައި ވަނީ ކަނޑައަޅާފަ އެވެ.

ޖަޕާނަކީ ދުނިޔޭގެ ނިސްބަތުން ތަފާތު ބާވަތްތަކުގެ ރެޕްޓައިލްސް ނުވަތަ ފަނިފަކުސަ ފަދަ ތަކެތީގެ ވިޔަފާރި އެންމެ ފުޅާދާއިރާއެއްގައި ކުރާ އެއް ގައުމެވެ. އެހެންކަމުން، އެއާޕޯޓުތަކުން މިފަދަ ތަކެތި ވަގަށް އެތެރެކުރަނިކޮށް އަތުލައިގަތުމަކީ ޖަޕާނުގައި އާންމު ކަމެކެވެ. މީގެ ކުރިން ވެސް ފޮށިތަކުގައި ފޮރުވައިގެން ވެލައާއި، ހަރުފަ އަދި ކަހަނބު ފަދަ ތަކެތި އެތެރެކުރަން އުޅެނިކޮށް ވަނީ އަތުލައިގެންފަ އެވެ.