ޖަޕާނުގައި އަންހެނެއްގެ އަނގަ ފަހައި އަނގަބެއްދި މައްސަލައިގައި އަންހެނަކު ހައްޔަރުކޮށްފި

އެކުގައި ދިރިއުޅެމުންދިޔަ އަންހެނެއްގެ އަނގަ ފަހައި، އޭނާއަށް ވާހަކަ ނުދެއްކޭވަރު އަދި ކާބޯތަކެތި ނުކެވޭވަރުގެ ބޮޑެތި އަނިޔާތަކެއް ދިން މައްސަލައެއްގައި ޖަޕާނުގެ އަންހެނަކު ހައްޔަރުކޮށްފި އެވެ.

މި މައްސަލައާ ގުޅިގެން ހައްޔަރުކޮށްފައިވަނީ ޓޯކިޔޯގެ އިރުއުތުރުން އޮންނަ އިބަރާކީ ޕްރިފެކްޗާގެ ކޯގާ ސިޓީގައި ދިރިއުޅޭ، އުމުރުން 49 އަހަރުގެ މަސާއޭ ސަކުރާއީ އެވެ. އޭނާ ހައްޔަރުކުރީ އޭނާއާއެކު އެއްގޭގައި ދިރިއުޅެމުންދިޔަ އުމުރުން 42 އަހަރުގެ އަންހެނަކަށް އަނިޔާކުރި ކަމުގެ ތުހުމަތުގައި މިދިޔަ ހޯމަ ދުވަހު އެވެ.

ފުލުހުން މައުލޫމާތު ދޭ ގޮތުގައި، ސަކުރާއީ ވަނީ ޖޫން މަހުގެ 29 ވަނަ ދުވަހުގެ މެންދުރުފަހު 1:30 އެހާކަންހާއިރު، ތިިިިނޯހާއި ރޮދި ބޭނުންކޮށްގެން އެ އަންހެންމީހާގެ ތުންފަތް ފަހާފައެވެ. މި ތުހުމަތުތަކަށް ސަކުރާއީ އިއުތިރާފުވިކަން ނުވަތަ ނޫންކަން ފުލުހުން ހާމަކޮށްފައި ނުވި ނަމަވެސް، މި ހަމަލާ ދޭން މެދުވެރިވި ސަބަބާއި ހާދިސާ ހިނގި ގޮތް އިތުރަށް ތަހުގީގު ކުރަމުންދާ ކަމަށް ފުލުހުން ބުނެފައިވެ އެވެ. މީގެ އިތުރުން، މި ދެ އަންހެނުންގެ މެދުގައި އޮތް ގުޅުންވެސް ފުލުހުން ދަނީ ބަލަމުންނެވެ.

ޖަޕާން ޓުޑޭ އިން ރިޕޯޓްކޮށްފައިވާ ގޮތުގައި، އަނިޔާ ލިބުނު އަންހެންމީހާ އެ ގެއިން ފިލާފައިވަނީ ހާދިސާ ހިނގިތާ ޖެހިގެން އައި ދުވަހުގެ މެންދުރުފަހު 1:30 އެހާކަންހާއިރު، ސަކުރާއީ ބޭރަށް ގޮސް އުޅުނު ވަގުތެއްގަ އެވެ. އޭނާ އެވަގުތު ހުރީ މޫނުމަތީގައި ހުދު ކުލައިގެ މާސްކެއް އަޅައިގެންނެވެ. އަނިޔާގެ ސަބަބުން ވާހަކަ ނުދެއްކޭތީ، އޭނާ ކައިރީގައި ހުރި ފިހާރައަކަށް ގޮސް އެތަނުގެ މުވައްޒަފަކަށް "އަހަންނަށް އެހީތެރިވެދީ" މިހެން ލިޔެފައިވާ ނޯޓެއް ދިނެވެ. އެއާއެކު އެ މުވައްޒަފު ވަނީ ފުލުހުންނަށް އެކަން އަންގާފަ އެވެ.

އަނިޔާ ލިބުނު އަންހެންމީހާ ފަހުން ފުލުހުންނަށް ކިޔައިދިން ގޮތުގައި، އޭނާ އެ ގެއިން ފިލަން ބޭނުންވި ނަމަވެސް، ސަކުރާއީ ދެކެ ގަންނަ ބިރެއްގެ ބޮޑުކަމުން މީގެ ކުރިން އެކަން ކުރަން ނުކެރުނީ އެވެ. "އަހަރެން ސަކުރާއީ ދެކެ ވަރަށް ބިރުގަނޭ، އެހެންވެ ވަގުތުން ފިލަން ނުކެރުނީ،" އޭނާ ބުނެފައިވެ އެވެ.

ކިޔޯޑޯ ނިއުސް އިން ރިޕޯޓްކޮށްފައިވާ ގޮތުގައި، މި ދެ އަންހެނުން ސަކުރާއީގެ ގޭގައި އެކުގައި ދިރިއުޅެން ފަށާފައިވަނީ 2025 ވަނަ އަހަރުގެ އޭޕްރީލް މަހުގެ ތެރޭގަ އެވެ. ފުލުހުން ބުނި ގޮތުގައި އެ ގޭގައި އިތުރު ބަޔަކުވެސް ދިރިއުޅެމުންދާ ކަމަށާއި، ތަހުގީގުގެ ބޭނުމަށް އެމީހުންނާވެސް ސުވާލު ކުރަމުންދާ ކަމަށެވެ.

މި ހާދިސާ ހިނގި ވަގުތު އެ ގޭގައި ދިރިއުޅޭ އެހެން ބައެއް މީހުން އެތަނުގައި ތިބިތޯވެސް ފުލުހުން ދަނީ ބަލަމުންނެވެ.

ސްޓްރެއިޓްސް ޓައިމްސް އިން ރިޕޯޓްކޮށްފައިވާ ގޮތުގައި، ސަކުރާއީ ދަންނަ މީހުން ޓީވީ އަސާހީއަށް މައުލޫމާތު ދެމުން ބުނެފައިވަނީ، އޭނާއަކީ މީގެ ކުރިންވެސް ގެދޮރު ދޫކޮށްފައިދާ މީހުންނަށް އޭނާގެ ގޭގައި ހުރުމުގެ ފުރުސަތު ދީ، ބައެއް މީހުންނަށް ވަޒީފާ ހޯދައިދިނުމުގައި އެހީތެރިވެދީފައިވާ މީހެއް ކަމަށެވެ. އެހެންކަމުން އެކި ދުވަސްވަރު މަތިން ގިނަ ބަޔަކު އެ ގޭގައި ދިރިއުޅެފައިވާ ކަމަށް ބެލެވެ އެވެ.