ވަރލްޑް ކަޕް ބަލަން ކާފަ ގޮވައިގެން ދާން، މުޅި އުމުރު ރައްކާކުރި ފައިސާ ހޭދަކުރި ޒުވާނަކަށް އެ ފައިސާ އަނބުރާ ލިބިއްޖެ

އުމުރުން 80 އަހަރުގެ ކާފަ ގޮވައިގެން 2026 ގެ ވަރލްޑް ކަޕް ބަލާލަން ދިއުމަށްޓަކައި، ގެއެއް ގަތުމަށް އޭނާ ރައްކާކުރި 10،000 ޕައުންޑް ހޭދަކުރި އިންގްލެންޑްގެ ޒުވާން ސަޕޯޓަރަކަށް، ކުންފުންޏަކުން އެ ފައިސާ ހަދިޔާއެއްގެ ގޮތުގައި އަނބުރާ ދީފިއެވެ.

އުމުރުން 21 އަހަރުގެ ޖޭކަބް އޮލްމެންޑިންގަރ އޭނާގެ ކާފަ، ޖެފް ގޮލިކަރ ގޮވައިގެން އެމެރިކާ އަދި މެކްސިކޯއަށް ކުރި މި ދަތުރަކީ އޭނާގެ ހަޔާތުގައިވެސް ކުރި އެންމެ ހާއްސަ އެއް ދަތުރެވެ. ކުޑައިރުއްސުރެ ފުޓުބޯޅަ މެޗުތައް ބަލަން ކާފަ އާއެކު ދިޔަ ޖޭކަބް ބޭނުންވީ، އޭގެ ބަދަލު ދިނުމުގެ ގޮތުން ކާފައަށް މިފަދަ ހާއްސަ ދަތުރެއް ހަދިޔާކުރާށެވެ. އެގޮތުން ވޭތުވެދިޔަ 5 އަހަރު ދުވަހު ގެއެއް ގަތުމަށް އޭނާ ރައްކާކުރި ހުރިހާ ފައިސާއެއް ވަނީ މި ދަތުރަށް ހޭދަކޮށްފައެވެ.

ޖޭކަބް އާއި ޖެފް، ނިއުޔޯރކް،އެޓްލާންޓާ އަދި މެކްސިކޯ އަށް ދިޔުމުގެ ދަތުރު | މިރަރ.ކޯ.ޔޫކޭ

މި ދެބަފައިން ވަނީ ނިއު ޔޯކް އަދި އެޓްލާންޓާގައި ކުޅުނު އިންގްލެންޑްގެ މެޗުތަކުގެ އިތުރުން، މެކްސިކޯގެ މަޝްހޫރު އެޒްޓެކް ސްޓޭޑިއަމްގައި އިންގްލެންޑުން 3-2 އިން މެކްސިކޯ ބަލިކުރި ތާރީޚީ މެޗުވެސް ބަލާފައެވެ.

ކުންފުންޏެއްގެ ދީލަތި އެހީތެރިކަން

މި ދެބަފައިންގެ ހިތްގައިމު ވާހަކަ ސޯޝަލް މީޑިއާގައި ވައިރަލްވުމާ ގުޅިގެން، އެމެރިކާގެ އޮންލައިން ކްރިޕްޓޯ ކެސީނޯއެއް ކަމަށްވާ "މެޓަވިން" (Metawin) އިން ވަނީ ޖޭކަބް އާ ގުޅާފައެވެ. އަދި ޕެނަމާ އާ ދެކޮޅަށް ކުޅޭ މެޗުން 2 ގޯލަށްވުރެ ތަފާތު ބޮޑުކޮށް އިންގްލެންޑް މޮޅުވެއްޖެނަމަ އެ ފައިސާ އަނބުރާ ދޭނެކަމަށް އެ ކުންފުނިން ބުންޏެވެ.

އިންގްލެންޑް އެ މެޗުން 2-0 އިން މޮޅުވުމުން އެ ޝަރުތު ފުރިހަމަނުވި ނަމަވެސް، އެ ކުންފުނިން ވަނީ ދެން ކުޅުނު ޑީއާރް ކޮންގޯ މެޗުން އިންގްލެންޑް މޮޅުވެއްޖެނަމަ ފައިސާ ދޭނެކަމަށް ވައުދުވެފައެވެ. އިންގްލެންޑް 2-1 އިން މޮޅުވުމާއެކު، އެ ކުންފުނިން ވަނީ ވައުދު ފުއްދައި 10،000 ޕައުންޑް ޖޭކަބްގެ އެކައުންޓަށް ޖަމާކޮށްދީފައެވެ.

މިކަމާ ގުޅިގެން ޖޭކަބް ބުނީ މިއީ އޭނާއަށް ލިބުނު ވަރަށް ބޮޑު ހައިރާންކަމެއް ކަމަށާއި ފައިސާ އެކައުންޓަށް ޖަމާވުމުން ނޫނީ އެކަން ގަބޫލުވެސް ނުކުރެވުނު ކަމަށެވެ. "މިއީ ވަރަށް ހިތްހެޔޮ އަމަލެއް. އަހަރެން ހުރީ ބުނާނެ އެއްޗެއްވެސް ނޭނގިފައި،" ޖޭކަބް ބުންޏެވެ.

"ފައިސާ އަބަދުވެސް ހޯދިދާނެ"

ޖޭކަބް އިތުރަށް ބުނީ، "ފައިސާ އަބަދުވެސް ހޯދިދާނެ، އަހަރެން މިއީ ގެއެއް ގަތުން ދެތިން އަހަރަށް ފަސްކޮށްލެވިދާނެ އުމުރެއްގައި ހުރި މީހެއް. އެކަމަކު ކާފައާއެކު ވަރލްޑް ކަޕަކަށް ދިއުމުގެ ފުރުސަތު ދެން ދުވަހަކުވެސް ނުލިބިދާނެ. އަހަރެމެންނަކީ ކާފައާއި ކާފަދަރިއަކަށްވުރެ ބޮޑަށް ވަރަށް ގާތް ދެ އެކުވެރިން،" ކަމަށެވެ.

މި ވާހަކަ އާންމުވުމާއެކު ގިނަ ބަޔަކު އަންނަނީ ޖޭކަބް އޭނާގެ ކާފައަށް ކުރާ ގަދަރާއި ލޯތްބަށް ތައުރީފުކުރަމުންނެވެ. އުމުރުން ދުވަސްވީ ކާފަ ޖެފް ވެސް ވަނީ މެކްސިކޯގެ ސަޕޯޓަރުންގެ ފަރާތުން ފެނުނު ރައްޓެހިކަމާއި، މުޅި މުބާރާތުގެ ފޯރިގަދަ މާހައުލާ މެދު ވަރަށް ބޮޑަށް ހިތްހަމަޖެހުން ފާޅުކޮށްފައެވެ.