ފްލައިޓް އެޓެންޑެންޓަކަށް ޖިންސީ ގޯނާކުރި މައްސަލައެއްގައި، ޖަޕާނުގެ އެއާލައިން ޕައިލެޓަކު 20 މަސްދުވަހަށް ޖަލަށްލުމަށް އެ ގައުމުގެ ކޯޓަކުން ހުކުމްކޮށްފި
15 ޖުލައި 2026 | ބުދަ 08:47މި ހާދިސާ ހިނގާފައިވަނީ މިދިޔަ އަހަރުގެ އޮކްޓޫބަރު މަހު އެއާލައިންގެ މުވައްޒަފުންތަކަކާއެކު ބޭއްވި ކެއުމަކަށްފަހުގައި. ކޯޓުން ވަނީ ކެޕްޓަންގެ އަމަލުތަކަކީ ނާތަހުޒީބު އަމަލުތަކެއްގެ ގޮތުގައި ސިފަކޮށް، އޭނާގެ ޖަލު ހުކުމް ފަސްކޮށްދެވެން ނެތް ކަމަށް ނިންމާފައި.
ޓޯކިޔޯގެ ހަނެޑާ އެއާޕޯޓުގެ އެއާކްރާފްޓް ހޭންގަރެއްގައި، 2026 އޭޕްރީލް 1 ވަނަ ދުވަހު ބޭއްވި އޯލް ނިޕޯން އެއާވޭސް (އޭ.އެން.އޭ) ގްރޫޕުގެ އަހަރީ "އެންޓްރަންސް ސެރެމަނީ" ނުވަތަ ވަޒީފާއާ އަލަށް ގުޅުނު މުވައްޒަފުންނަށް މަރުހަބާ ކިޔުމުގެ ރަސްމިއްޔާތުގައި އެ ކުންފުނީގެ އާ މުވައްޒަފުން ބައިވެރިވަނީ. | ގެޓީ އިމޭޖަސް
ފްލައިޓް އެޓެންޑެންޓަކަށް ޖިންސީ ގޯނާކުރި މައްސަލައެއްގައި، ޖަޕާނުގެ އެއާލައިން ޕައިލެޓަކު 20 މަސްދުވަހަށް ޖަލަށްލުމަށް އެ ގައުމުގެ ކޯޓަކުން ހުކުމްކޮށްފި އެވެ.
ޓޯކިޔޯ ޑިސްޓްރިކްޓް ކޯޓުން ކުރި މި ހުކުމުގައި، އޯލް ނިޕޯން އެއާވޭސް (އޭ.އެން.އޭ) ގެ ކެޕްޓަނެއްގެ މަގާމުގައި ހުރި އުމުރުން 44 އަހަރުގެ ރިޔޯޓާ މިސޭގެ އަމަލުތަކަކީ "ނާތަހުޒީބު" އަމަލުތަކެއްގެ ގޮތުގައި ސިފަކޮށްފައިވެ އެވެ. އަދި އޭނާ ވަނީ އޭނާގެ މަގާމުގެ ނުފޫޒު ނަހަމަ ގޮތުގައި ބޭނުންކޮށްފައިވާ ކަމަށްވެސް ކޯޓުން ބުނެފައިވެ އެވެ.
މިދިޔަ އަންގާރަ ދުވަހު ކޯޓުން މި ހުކުމް އިއްވީ، 2023 ވަނަ އަހަރުގެ އޮކްޓޫބަރު މަހުގެ 10 ވަނަ ދުވަހުގެ ފަތިހުގެ ވަގުތެއްގައި ޖަޕާނުގެ ކަގާވާ ޕްރިފެކްޗާގެ ޓަކަމަޓްސޫގައި ހިނގި ހާދިސާއަކާ ގުޅިގެންނެވެ. މި މައްސަލައިގައި ދައުލަތުގެ ޕްރޮސިކިއުޓަރުން އެދިފައިވަނީ މިސޭ ދެ އަހަރާއި ހަ މަސްދުވަހަށް ޖަލަށްލުމަށެވެ.
"ދަ ޖަޕާން ޓައިމްސް" އިން ރިޕޯޓްކޮށްފައިވާ ގޮތުގައި، ފްލައިޓްގެ މަސައްކަތް ނިންމާލުމަށްފަހު އެއާލައިންގެ މުވައްޒަފުންތަކަކާއެކު ބޭއްވި ރޭގަނޑުގެ ކެއުމަކަށްފަހު، މަގުމަތީގައާއި ފިހާރައެއްގެ ތެރޭގައި މިސޭ ވަނީ ތަކުރާރުކޮށް އެ އަންހެން މުވައްޒަފަށް ޖިންސީ ގޯނާކޮށްފަ އެވެ.
މި ހާދިސާ ހިނގުމުގެ އެއް ދުވަސް ކުރިން، އެ ދެ މީހުން އެކުގައި މަސައްކަތް ކުރަން ފެށުމާ ހަމައަށް އެ އަންހެން މުވައްޒަފު އެ ކެޕްޓަނާ ދުވަހަކުވެސް ބައްދަލުވެފައެއް ނުވެ އެވެ.
މި މައްސަލަ ބެއްލެވި އިސް ގާޒީ ތަކާއޯ އޮކާވާ ވިދާޅުވީ، ދައުވާ ލިބޭ މިސޭ ވަނީ އެއާލައިން ކެޕްޓަނެއްގެ ހައިސިއްޔަތުން އޭނާއަށް ލިބިފައިވާ ބާރާއި ނުފޫޒުގެ ބޭނުން ނަހަމަ ގޮތުގައި ހިފާފައި ކަމަށެވެ.
ޝަރީއަތުގެ މަޖިލީހުގައި ހެކިބަސް ދެމުން އެ އަންހެން މުވައްޒަފު ބުނީ، އޭނާއަށްވުރެ މަތީ މަގާމެއްގައި ހުރި މީހަކާ ދެކޮޅަށް ތެދުވެއްޖެނަމަ ވަޒީފާއަށް ކުރިމަތިވެދާނެ ނޭދެވޭ އަސަރަކަށް ބިރުން، އެ އަމަލުތަކަށް ހުރަސްއަޅަން އޭނާ މާބޮޑަށް ބިރުގަތީ ކަމަށެވެ.
ނަމަވެސް މިސޭގެ ފަރާތުން ދިފާއުގައި ބުނީ، އެރޭގެ ކެއުމުގެ ތެރެއިން ދެމީހުންގެ މެދުގައި އޮތް ގުޅުން ބަދަހިވެފައިވާ ކަމަށް އޭނާއަށް ގަބޫލުކުރެވުނު ކަމަށާއި، އެހެންކަމުން އެއީ ސަމާސާއަކަށް ކުރި ކަމެއް ކަމަށެވެ.
ކޯޓުން ވަނީ މިސޭގެ އެ ވާހަކަތައް ބަލައިނުގަނެ، އޭނާގެ އަމަލުތަކަކީ އެއްވެސް ހާލެއްގައި ބަލައިގަނެވޭނެ ކަންތައްތަކެއް ނޫން ކަމަށް ނިންމާފަ އެވެ. އަދި އޭނާގެ މައްޗަށް އިއްވި ޖަލު ހުކުމް ތަންފީޒުކުރުން ފަސްކޮށްދެވެން ނެތް ކަމަށްވެސް ކޯޓުން ކަނޑައެޅި އެވެ.
ގާޒީ ވިދާޅުވީ، މިސޭ ދައްކަނީ އެއްވެސް ހަމައެއް ނެތް އުޒުރުތަކެއް ކަމަށާއި، އޭނާގެ ކިބައިން ކުރި ކަމާމެދު ދެރަވެ ހިތާމަކުރާ މަންޒަރެއް ނުފެންނަ ކަމަށެވެ.
ކޯޓުގެ ހުކުމުގައި އިތުރަށް ބުނެފައިވަނީ، "ދައުވާ ލިބޭ ފަރާތުން ވަނީ އަނިޔާ ލިބުނު މީހާގެ ކިބައިގައި ހުރި ނުކެރުމާއި، ޖެހިލުންވުމުގެ ފައިދާ ނަގައި، ކެޕްޓަނެއްގެ މަގާމުގެ ނުފޫޒު ބޭނުންކޮށްފަ އެވެ.
ކޯޓަށް ހުށަހެޅި ބަޔާނެއްގައި އެ އަންހެން މުވައްޒަފު ބުނެފައިވަނީ، އެ ވަގުތު އޭނާ އެ އަމަލުތަކަށް ހުރަސްއަޅައިފިނަމަ ދެން ވެދާނެ ގޮތެއް ނޭނގޭތީ، އެތަނުން ސަލާމަތްވެގެން ދާން ނުކެރުނީ ކަމަށެވެ.
ކޯޓުގެ މި ނިންމުމާ ގުޅިގެން އޭ.އެން.އޭ އެއާލައިނުން ނެރުނު ބަޔާނެއްގައި ބުނީ، ކޯޓުގެ ހުކުމަށް އިހުތިރާމްކުރާ ކަމަށާއި، ކުރިމަގުގައި މިފަދަ ހާދިސާތައް ތަކުރާރުވިޔަ ނުދިނުމަށް އަޅަންޖެހޭ ފިޔަވަޅުތައް އިތުރަށް ވަރުގަދަކުރާނެ ކަމަށެވެ.
