އެމްއެމްއޭ އިން ބޭންކުތަކަށް ވިއްކާ ޑޮލަރުގެ މިންވަރު އިތުރުކޮށްފި
11 އޯގަސްޓު 2026 | އަންގާރަ 13:31މުދާ އިމްޕޯޓުކުރުމަށް ވިޔަފާރިތަކުން ހަދާ ޓީޓީ އާއި އެލްސީތަކަށް ބޭނުންވާ ބޭރު ފައިސާ ހޯދުމުގައި ހުރި ދަތިތަކަށް ލުޔެއް ދިނުމަށް އެމްއެމްއޭ އިން ވަނީ ނިންމާފައި. މިގޮތުން ބޭންކުތަކަށް ކޮންމެ ހަފްތާއަކު ވިއްކާ ބޭރު ފައިސާގެ މިންވަރު 51 އިންސައްތަ އިތުރުކުރުމަށް އެ އޮތޯރިޓީން ވަނީ ކަނޑައަޅާފައި
ވެލާނާ އިންޓަނޭޝަނަލް އެއާޕޯޓުގައި ހުންނަ ބޭންކް އޮފް މޯލްޑިވްސް (ބީއެމްއެލް) ގެ ބްރާންޗް (ފައިލް) | އެލަމީ
މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ކޮންމެ ހަފްތާ އަކު ބޭންކުތަކަށް ވިއްކާ ބޭރު ފައިސާ އާ އަޅާ ބަލާއިރު 51 އިންސައްތަ އިތުރު އަދަދެއް ވިއްކުމަށް ނިންމާފައިވާ ކަމަށް އެ އޮތޯރިޓީން ބުނެފި އެވެ.
މި ނިންމުމުގެ މައިގަނޑު މަގްސަދަކީ ވިޔަފާރިތަކުން މުދާ އިމްޕޯޓު ކުރުމަށް ހަދަން ޖެހޭ ޓީޓީ އަދި އެލްސީ އަށް ބޭނުންވާ ބޭރުފައިސާ ހޯދުމުގައި ހުރި ދަތިތަކަށް ލުޔެއް ހޯދައިދިނުން ކަމަށް އެމްއެމްއޭ އިން ބުނެފައިވެ އެވެ.
އެމްއެމްއޭ އިން މިކަމާ ބެހޭ ގޮތުން ނެރުނު ބަޔާނުގައި މިއަހަރުގެ ރަމަޟާން މަހާ ދިމާކޮށް ޒަރޫރީ ކާބޯތަކެތި އިމްޕޯޓްކުރާ ވިޔަފާރިވެރިންނަށް އެހީތެރިވުމަށާއި އަގުތައް އެއްވަރެއްގައި ހިފެހެއްޓުމަށް ޓަކައި ބޭންކުތަކަށް ދޫކުރާ ޑޮލަރުގެ މިންވަރު 32 އިންސައްތަ އިތުރުކޮށްދިން ކަމަށާއި، ފަތުރުވެރިކަމުގެ އޮފް-ސީޒަނާ ދިމާކޮށް ވިޔަފާރިތަކަށް އިތުރު އެހީތެރިކަން ފޯރުކޮށްދިނުމުގެ ގޮތުން މިދިޔަ ޖޫން މަހު ހަފުތާއަކު ދޫކުރާ ޑޮލަރުގެ މިންވަރު 26 އިންސައްތަ އިތުރުކޮށްދިން ކަމަށް ބުނެފަ އެވެ.
