އެމްއެމްއޭގެ ޖުމްލަ އެސެޓް 29.6 ބިލިއަން ރުފިޔާއަށް ދަށްވެއްޖެ

މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން 2026 ވަނަ އަހަރުގެ ޖޫން މަހުގެ ނިޔަލަށް އެ އިދާރާގެ މާލީ ހާލަތު ބަޔާންކޮށް އާންމުކުރި "ސްޓޭޓްމަންޓް އޮފް ފައިނޭންޝަލް ޕޮޒިޝަން" ރިޕޯޓު ގައިވާ ގޮތުން ގޮތުން 30 ޖޫން 2026 ގެ ނިޔަލަށް އެ ބޭންކުގެ ޖުމްލަ އެސެޓް ނުވަތަ މިލްކިއްޔާތުގެ އަގު ހުރީ 29,564,158,230 (އޮނަތިރީސް ބިލިއަން ފަސްސަތޭކަ ފަސްދޮޅަސް ހަތަރު މިލިއަން އެއްލައްކަ ފަންސަވީސްހާސް ދުއިސައްތަ ތިރީސް) ރުފިޔާގަ އެވެ. މިއީ 2026 ވަނަ އަހަރުގެ މެއި މަހުގެ ނިޔަލަށް ހުރި 29,968,348,794 ރުފިޔާއާ އަޅާބަލާއިރު ކުޑަ ދަށްވުމެކެވެ.

އެމްއެމްއޭގެ މާލީ ހިސާބުތަކަށް ބަލާއިރު، ބޭރު ފައިސާގެ މާލީ އެސެޓްތަކުގެ ޖުމްލަ އަގަކީ 12,936,417,596 ރުފިޔާ އެވެ. މީގެ ތެރޭގައި ބޭރުގެ ބޭންކުތަކުގައި ހުރި ފައިސާ އާއި ބެލެންސްގެ ގޮތުގައި ހުރި 8.1 ބިލިއަން ރުފިޔާ އާއި، އިންވެސްޓްމަންޓް ސެކިއުރިޓީޒްގެ ގޮތުގައި ހުރި 3.3 ބިލިއަން ރުފިޔާ ހިމެނެ އެވެ. މީގެ އިތުރުން މަނިޓަރީ ގޯލްޑް ނުވަތަ ރަނުގެ ރިޒާވްގެ ގޮތުގައި 124.2 މިލިއަން ރުފިޔާ ހުރި އިރު، އައިއެމްއެފްއާ ގުޅޭ އެސެޓްތަކުގެ ގޮތުގައި 451.9 މިލިއަން ރުފިޔާ ހުރިކަން ރިޕޯޓުން އެނގެ އެވެ.

ދިވެހި ރުފިޔާގެ މާލީ އެސެޓްތަކަށް ބަލާއިރު، ޖުމްލަ 15.8 ބިލިއަން ރުފިޔާ ހުރި އިރު، މީގެ ތެރެއިން އެންމެ ބޮޑު ބައެއް ހިއްސާކުރަނީ ސަރުކާރުގެ ޓްރެޜަރީ ބޮންޑުތަކުގައި އިންވެސްޓްކޮށްފައިވާ 13.9 ބިލިއަން ރުފިޔާ އެވެ. އަދި ބޭންކުތަކުގައި ހުރި ފައިސާ އާއި ބެލެންސްގެ ގޮތުގައި 1.1 ބިލިއަން ރުފިޔާ ހުރި އިރު، ސަބްސިޑިއަރީ ކުންފުނިތަކުގައި އިންވެސްޓްކޮށްފައިވާ 600 މިލިއަން ރުފިޔާ ވެސް މި ބައިގައި ހިމެނެ އެވެ. މާލީ ނޫން އެސެޓްތަކުގެ ގޮތުގައި 870.3 މިލިއަން ރުފިޔާ ހުރި އިރު، މީގެ ތެރޭގައި ރަނާއި ރިހީގެ އެސެޓްތަކާއި، އިންވެންޓްރީ އަދި ގޯތިގެދޮރާއި މެޝިނަރީ ފަދަ ތަކެތި ހިމެނެ އެވެ.

ލައިބިލިޓީޒް ނުވަތަ ދަރަންޏާއި ޒިންމާތަކަށް ބަލާއިރު، ޖޫން މަހުގެ ނިޔަލަށް އެމްއެމްއޭގެ ޖުމްލަ ލައިބިލިޓީޒް ހުރީ 27.8 ބިލިއަން ރުފިޔާގަ އެވެ. ބޭރު ފައިސާގެ ލައިބިލިޓީޒްގެ ގޮތުގައި 9.4 ބިލިއަން ރުފިޔާ ހުރި އިރު، މީގެ ތެރޭގައި ވިޔަފާރި ބޭންކުތަކުން އެމްއެމްއޭގައި ބަހައްޓާފައިވާ 2.3 ބިލިއަން ރުފިޔާ އާއި އޭޝިއަން ކްލިއަރިންގ ޔޫނިއަނަށް ދައްކަންޖެހޭ 871.5 މިލިއަން ރުފިޔާ ހިމެނެ އެވެ. އަދި އެހެނިހެން ލައިބިލިޓީޒްގެ ގޮތުގައި 4.9 ބިލިއަން ރުފިޔާ ހުރިކަން ފާހަގަކުރެވެ އެވެ.

ދިވެހި ރުފިޔާގެ ލައިބިލިޓީޒްގެ ގޮތުގައި ޖުމްލަ 18.2 ބިލިއަން ރުފިޔާ ހުރި އިރު، މީގެ ތެރެއިން އެންމެ ބޮޑު އަދަދަކީ ވިޔަފާރި ބޭންކުތަކުން އެމްއެމްއޭގައި ބަހައްޓާފައިވާ 9.4 ބިލިއަން ރުފިޔާ އެވެ. މީގެ އިތުރުން ބާޒާރުގައި ދައުރުވާ ފައިސާ ނުވަތަ ކަރަންސީ އިން ސާކިއުލޭޝަންގެ ގޮތުގައި 5.07 ބިލިއަން ރުފިޔާ ހުރި އިރު، ރިޕަރޗޭސް އެގްރީމަންޓްގެ ދަށުން ވިއްކާފައިވާ ސެކިއުރިޓީޒްގެ ގޮތުގައި 2.8 ބިލިއަން ރުފިޔާ ހުއްޓެވެ.

އެމްއެމްއޭގެ އިކުއިޓީ ނުވަތަ ރައުސްމާލުގެ ގޮތުގައި ޖުމްލަ 1.8 ބިލިއަން ރުފިޔާ ހުރި އިރު، މީގެ ތެރޭގައި ހިމެނެނީ 50 މިލިއަން ރުފިޔާގެ ކެޕިޓަލް އާއި 1.7 ބިލިއަން ރުފިޔާގެ ރިޒާވް އެވެ. ރިޒާވްގެ ތެރޭގައި ޖެނެރަލް ރިޒާވްގެ އިރުން، ބޭރު ފައިސާގެ އަގަށް އަންނަ ބަދަލުތަކުން އުފެދޭ ފޮރިން އެސެޓް ރީވެލުއޭޝަން ރިޒާވް ފަދަ ބައިތައް ހިމެނޭ ކަމަށް އެމްއެމްއޭގެ ރިޕޯޓުގައި ބަޔާންކޮށްފައިވެ އެވެ.