މި އަހަރުގެ ފުރަތަމަ 6 މަސް ދުވަހު ރާއްޖެއިން ބޭރު ކުރި މަހުގެ މިންވަރު ވެސް، މަސް ގަތް މިންވަރު ވެސް ބޮޑުތަނުން ދަށަށް!
2 އޯގަސްޓު 2026 | އާދީއްތަ 08:42މި އަހަރުގެ ފުރަތަމަ ހަ މަސްދުވަހު މަސް ގަތް މިންވަރު 59.9 އިންސައްތަ ދަށަށް ގޮސްފައިވާއިރު، މަސް އެކްސްޕޯޓްކޮށްގެން ލިބުނު އާމްދަނީ ވަނީ 74.5 މިލިއަން ޑޮލަރުން 37.5 މިލިއަން ޑޮލަރަށް ދަށްވެފައި. މީގެ ތެރެއިން ކަނޑުމަހާއި ކަންނެލި ގަތް މިންވަރު ބޮޑުތަނުން މަދުވި ނަމަވެސް، ޕްރޮސެސްކުރި މަހުގެ ބާވަތްތައް ބޭރުކުރި މިންވަރު ވަނީ 6.8 އިންސައްތަ އިތުރުވެފައި
މަސްވެރިކަން: މި އަހަރުގެ ފުރަތަމަ ހަ މަސްދުވަހު މަސް ގަތް މިންވަރު 59.9 އިންސައްތަ ދަށަށް ގޮސްފައިވާއިރު، މަސް އެކްސްޕޯޓްކޮށްގެން ލިބުނު އާމްދަނީ ވަނީ 74.5 މިލިއަން ޑޮލަރުން 37.5 މިލިއަން ޑޮލަރަށް ދަށްވެފައި | ފިޝަރީސް މިނިސްޓްރީ
މި އަހަރުގެ ފުރަތަމަ 6 މަސް ދުވަހުގެ ތެރޭގައި ރާއްޖޭގެ މަސްވެރިކަމުގެ ސިނާއަތުން ބޭރުކުރި މަހުގެ މިންވަރާއި މަސް ގަތް މިންވަރު މިދިޔަ އަހަރުގެ އެ މުއްދަތާ އަޅާބަލާއިރު ބޮޑުތަނުން ދަށަށް ގޮސްފައިވާ ކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ތަފާސްހިސާބުތަކުން ދައްކައިފި އެވެ.
އެމްއެމްއޭ އިން އާންމު ކޮށްފައިވާ ރިޕޯޓުގައި ވަނީ މިނިސްޓްރީ އޮފް ފިޝަރީޒް އާއި މޯލްޑިވްސް ކަސްޓަމްސް ސަރވިސްގެ ތަފާސްހިސާބުތައް ހިމަނާފަ އެވެ. މި ރިޕޯޓަށް ބަލާއިރު 2025 ވަނަ އަހަރުގެ ޖެނުއަރީ މަހުން ފެށިގެން ޖޫން މަހުގެ ނިޔަލަށް 53,426.3 މެޓްރިކް ޓަނުގެ މަސް ގަނެފައިވީ ނަމަވެސް، 2026 ވަނަ އަހަރުގެ އެ މުއްދަތުގައި މި އަދަދު ވަނީ 21,438.5 މެޓްރިކް ޓަނަށް ދަށްވެފަ އެވެ. މިއީ ގާތްގަނޑަކަށް 59.9 އިންސައްތައިގެ ދަށްވުމެކެވެ.
މަސް ގަތް މިންވަރަށް ބަލާއިރު، ކަނޑުމަސް ނުވަތަ ސްކިޕްޖެކް ޓޫނާ ގަތް މިންވަރު ވަނީ 65.2 އިންސައްތަ ދަށަށް ގޮސްފަ އެވެ. އެގޮތުން 2025 ވަނަ އަހަރުގެ ފުރަތަމަ ހަ މަސްދުވަހު 46,610.6 މެޓްރިކް ޓަނުގެ ކަނޑުމަސް ގަނެފައިވާއިރު، 2026 ވަނަ އަހަރުގެ އެ މުއްދަތުގައި ގަނެފައިވަނީ 16,230.4 މެޓްރިކް ޓަނުގެ މަހެވެ. މީގެ އިތުރުން ރީނދޫ އުރަހަ ކަންނެލި ގަތް މިންވަރު 6,637.4 މެޓްރިކް ޓަނުން 4,841.1 މެޓްރިކް ޓަނަށް ވަނީ ދަށްވެފަ އެވެ. މިއީ 27.1 އިންސައްތައިގެ ދަށްވުމެކެވެ. ނަމަވެސް އެހެނިހެން ބާވަތްތަކުގެ މަސް ގަތް މިންވަރު ވަނީ 178.4 މެޓްރިކް ޓަނުން 367.0 މެޓްރިކް ޓަނަށް އިތުރުވެފަ އެވެ.
މަސް އެކްސްޕޯޓް ކުރި މިންވަރަށް ބަލާއިރު، 2026 ވަނަ އަހަރުގެ ފުރަތަމަ 6 މަސްދުވަހު ރާއްޖެއިން ބޭރުކޮށްފައިވަނީ ޖުމްލަ 16,991.1 މެޓްރިކް ޓަނުގެ މަހެވެ. މިއީ 2025 ވަނަ އަހަރުގެ އެ މުއްދަތުގައި ބޭރުކުރި 44,791.3 މެޓްރިކް ޓަނާ އަޅާބަލާއިރު 62.1 އިންސައްތައިގެ ދަށްވުމެކެވެ. މީގެ ތެރެއިން ފިނިކުރި އަދި ތާޒާ މަހުގެ އެކްސްޕޯޓް 67.8 އިންސައްތަ ދަށަށް ގޮސްފައިވާއިރު، ދަޅުގައި ބަންދުކުރި މަހުގެ އެކްސްޕޯޓް ވަނީ 11.6 އިންސައްތަ ދަށަށް ގޮސްފަ އެވެ. މަސް އެކްސްޕޯޓް ކޮށްގެން ލިބުނު އާމްދަނީއަށް ބަލާއިރު، 2025 ވަނަ އަހަރުގެ ފުރަތަމަ ހަ މަސްދުވަހު 74.5 މިލިއަން އެމެރިކާ ޑޮލަރު ލިބިފައިވާއިރު، 2026 ވަނަ އަހަރުގެ އެ މުއްދަތުގައި މި އަދަދު ވަނީ 37.5 މިލިއަން ޑޮލަރަށް ދަށްވެފަ އެވެ.
ލޯކަލް ކުންފުނިތަކުން މަސް ގަންނަ އަގުތަކަށް ބަލާއިރު، 2026 ވަނަ އަހަރުގެ ޖޫން މަހު ކަނޑުމަސް ކިލޯއެއްގެ އަގު ހުރީ 14.0 ރުފިޔާގަ އެވެ. އަދި ރީނދޫ އުރަހަ ކަންނެލި ކިލޯއެއްގެ އަގު ހުރީ 52.7 ރުފިޔާގަ އެވެ. މިއީ 2025 ވަނަ އަހަރުގެ ޖޫން މަހާ އަޅާބަލާއިރު ކަންނެލީގެ އަގު ކުޑަކޮށް ދަށް އަދަދެކެވެ. އައިސް އެޅި ކަނޑުމަސް ކިލޯއެއްގެ އަގު 16.0 ރުފިޔާއިން 20.0 ރުފިޔާއަށް ވަނީ އުފުލިފަ އެވެ. ބައިނަލްއަގުވާމީ ބާޒާރުގައި ކަނޑުމަސް ކިލޯއެއްގެ އަގު 2026 ޖޫން މަހު ހުރީ 26.7 ރުފިޔާގަ އެވެ.
މަސްވެރިކަމުގެ އުފެއްދުންތަކުގެ ތެރެއިން ޕްރޮސެސްކުރި މަހުގެ ބާވަތްތަކުގެ އެކްސްޕޯޓަށް ބަލާއިރު، 2026 ވަނަ އަހަރުގެ ފުރަތަމަ ހަ މަސްދުވަހު ބޭރުކޮށްފައިވަނީ 774.4 މެޓްރިކް ޓަނުގެ މަހެވެ. މިއީ 2025 ވަނަ އަހަރުގެ އެ މުއްދަތުގައި ބޭރުކުރި 724.7 މެޓްރިކް ޓަނާ އަޅާބަލާއިރު 6.8 އިންސައްތައިގެ ކުރިއެރުމެކެވެ. ނަމަވެސް ޖުމްލަ ގޮތެއްގައި މަސްވެރިކަމުގެ ސިނާއަތުގެ ގިނަ ދާއިރާތަކުން ވަނީ ބޮޑު ދަށްވުމެއް ފާހަގަކުރެވިފަ އެވެ. ޚާއްސަކޮށް 2026 ވަނަ އަހަރުގެ ފެބްރުއަރީ އަދި މާޗު މަހަކީ މަސް ގަތް މިންވަރާއި އެކްސްޕޯޓް ކުރި މިންވަރު އެންމެ ބޮޑަށް ދަށްވި ދެ މަސް ދުވަހެވެ.
