ރާއްޖެއަށް ޑޮލަރު ވަންނަ މިންވަރު އިތުރުވި ނަމަވެސް އެމްއެމްއޭއިން ބޭންކުތަކަށް އެއާއި އެއްވަރަށް ޑޮލަރު ދޫނުކުރޭ: އިލްޔާސް ލަބީބު
13 ޖުލައި 2026 | ހޯމަ 10:02ރާއްޖެއަށް ވަންނަ ޑޮލަރު ބޭންކުތަކަށް ދޫކުރުމުގެ ބަދަލުގައި، ސަރުކާރުން އެ ފައިސާ ނަގައި ކުންފުނިތަކުގެ މަޝްރޫއުތަކަށް ބޭނުންކުރާ ކަމަށް ކުރީގެ މެންބަރު އިލްޔާސް ލަބީބު ވަނީ ތުހުމަތު ކުރައްވާފައި. އިގްތިސާދީ ދުވެލި މަޑުޖެހި ވިޔަފާރިތަކަށް ދަތިވަމުންދާތީ، މަރުކަޒީ ބޭންކުން ބޭންކުތަކަށް ޑޮލަރު ދޫކުރާ މިންވަރު އިތުރުކޮށް މި މައްސަލައަށް އަވަސް ހައްލެއް ހޯދުމަށް އޭނާ ގޮވާލެއްވި.
އެމްޑީޕީ އިން ކުރިއަށް ގެންދިޔަ "ޑޮލަރެއް ނެތް" ޕެނަލް ޑިސްކަޝަންގައި ރައްޔިތުންގެ މަޖިލީހުގެ ހުޅުދޫ ދާއިރާގެ ކުރީގެ މެންބަރު އިލްޔާސް ލަބީބު ވާހަކަ ދައްކަވަނީ. | ރާއްޖެއެމްވީ
ރާއްޖެއަށް ޑޮލަރު ވަންނަ މިންވަރު އިތުރުވެފައިވާއިރު، މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ބޭންކުތަކަށް އެއާއި އެއްވަރަށް ޑޮލަރު ދޫނުކުރާކަން ހާމަވެއްޖެ އެވެ.
އާދީއްތަ ދުވަހުގެ ރޭ، އިދިކޮޅު ދިވެހި ރައްޔިތުންގެ ޑިމޮކްރަޓިކް ޕާޓީ (އެމްޑީޕީ) އިން ކުރިއަށް ގެންދިޔަ "ޑޮލަރެއް ނެތް" ޕެނަލް ޑިސްކަޝަންގައި ވާހަކަ ދައްކަވަމުން ރައްޔިތުންގެ މަޖިލީހުގެ ހުޅުދޫ ދާއިރާގެ ކުރީގެ މެންބަރު އިލްޔާސް ލަބީބު ވިދާޅުވީ ރާއްޖެއަށް ޑޮލަރު އިންފްލޯ އިތުރުވެފައިވާއިރު، އެމްއެމްއޭއިން ބޭންކުތަކަށް އެއާއި އެއްވަރަށް ޑޮލަރު ދޫނުކުރާ ކަމަށާއި، މިކަމުގެ ސަބަބުން ބޭންކުތަކުން ވިޔަފާރިތަކަށާއި އާންމު ފަރާތްތަކަށް ޑޮލަރު ނުލިބި ބޮޑެތި ދަތިތައް ކުރިމަތިވަމުންދާ ކަމަށެވެ.
އިލްޔާސް ލަބީބު ވިދާޅުވީ ބްލެކް މާކެޓުގައި ބީއެމްއެލުން ޑޮލަރު ގަންނަން މަޖުބޫރު ވެގެންދިޔައީ ޑޮލަރު ނެތުމުން ކަމަށާއި، މިއީ ސާފު ހެއްކެތް ކަމަށެވެ.
މީގެ އިތުރުން އިލްޔާސް ލަބީބު ވިދާޅުވީ، އެމްއެމްއޭއަށް ލިބޭ ޑޮލަރު ސަރުކާރުން ނަގައި، އެކިއެކި ޕްރޮޖެކްޓުތައް ހިންގާ ނަމުގައި ސަރުކާރު ހިއްސާވާ ކުންފުނިތަކަށް ދޫ ކުރާ ކަމަށެވެ. އޭގެން ވެސް އެނެގަނީ ނާޖާއިޒް ފައިދާ ކަމަށް އޭނާ ތުހުމަތު ކުރެއްވި އެވެ.
އެހެންވީމާ، އަޅުގަނޑުމެންނަށް އެބަ އެނގޭ ބޭންކުގައި ޑޮލަރެއް ނެތްކަން މިހާރު. އެހެންވީމާ، ލިބޭ ޑޮލަރު ސަރުކާރުން އެމްއެމްއޭއިން މި ނަގަނީ. ނަގާފައި ސަރުކާރުން އެކިއެކި ޕްރޮޖެކްޓުތައް ހިންގާ ނަމުގައި އެސްއޯއީތައް މެދުވެރިކޮށް އެބަ ލާރި އެކި ގޮތްގޮތަށް ބޭރުކުރޭ. އެނގިވަޑައިގަންނަވާނެ، މިދޭތެރެއިން ވެސް އަޅުގަނޑުމެންނަށް އަޑުއިވުނު، ސަރުކާރު ހިއްސާވާ ކުންފުނިތަކަށް ބައިވަރު ޕްރޮޖެކްޓުތައް ސަރުކާރުން ދިން ވާހަކަ. ދީފައި އެ ޕްރޮޖެކްޓުތައް، އެ ކުންފުނިތަކުން ބޭނުންވާ ސާމާނުގައި ގަންނަން އިއުލާންކޮށް، އެ މީހުން ބޭރުން އަމިއްލައަށް އެއްޗެހި ގަންނަން އުޅުނީ. އިއުލާންކުރި ކިއެއް ނޫން. އަމިއްލައަށް ސަޕްލައިރުން ހޯދައިގެން އެއްޗެހި ގަންނަން އުޅުނީ ބޮޑު އަގުގައި. ލާރިއެއް ހެދިގޮތެއް ނޭނގި. އެ ތަންތަނަށް ޑޮލަރު ސަރުކާރުން ނަގާފައި މި ދެނީ އެސްއޯއީތަކަށް.ރައްޔިތުންގެ މަޖިލީހުގެ ހުޅުދޫ ދާއިރާގެ ކުރީގެ މެންބަރު އިލްޔާސް ލަބީބު
ރާއްޖޭގެ އިގްތިސާދީ ހާލަތާ ގުޅޭގޮތުން ވަރލްޑް ބޭންކުން ނެރިފައިވާ ރިޕޯޓަށް އިޝާރާތް ކުރައްވައި އިލްޔާސް ލަބީބު ވިދާޅުވީ މި އަހަރު ރާއްޖޭގެ އިގްތިސާދު 3 ޕަސެންޓް ކުރިއަރާނެ ކަމަށް ލަފާކޮށްފައި އޮތް ނަމަވެސް، މިހާރު އެއް ޕަސެންޓަށް ދަށްކޮށްފައިވުމުން ރާއްޖޭގެ އިގްތިސާދީ ހާލަތު ވަރަށް ބޮޑަށް ހީނަރުވެފައިވާ މިންވަރު ސާފުވާ ކަމަށެވެ.
މިހާލަތުގައި އެއްވެސް ވިޔަފާރިއެއް ކުރިއަކަށް ނާރާނެ ކަމަށާއި، ރާއްޖޭގެ ހުރިހާ ވިޔަފާރިތައް މަޑުމަޑުން ފެއިލްވަމުންދާ ކަމަށް އޭނާ ވިދާޅުވި އެވެ.
އިލްޔާސް ލަބީބު ވިދާޅުވީ، ޑޮލަރު ލިބުމުގެ މައްސަލަ ހައްލުނުވާ ނަމަ ރާއްޖޭގެ އިގްތިސާދަށް އިތުރު ބޮޑެތި ގެއްލުންތައް ލިބޭނެ ކަމަށެވެ.
އެހެންކަމުން އިގްތިސާދީ މާހިރުން ވިދާޅުވެ ދެއްވާ އިރުޝާދުތަކާ އެއްގޮތަށް އަމަލުކޮށް، ސަރުކާރުން އެމްއެމްއޭއަށް ލިބޭ ޑޮލަރު ބޭންކުތަކަށް ދޫކުރުމަކީ މިހާރު ވަރަށް މުހިންމު ކަމެއް ކަމަށާއި، މި މައްސަލައަށް އަވަސް ހައްލެއް ހޯދަން ޖެހޭ ކަމަށް އޭނާ ވިދާޅުވި އެވެ.
