ޔޫއޭއީގެ މުހިންމު ދާއިރާތަކަށް ދިން ވަރުގަދަ ސައިބަރ ހަމަލާތައް ނާކާމިޔާބުކޮށްލައިފި

ޔޫއޭއީގެ އޭވިއޭޝަން، ހަކަތަ އަދި ތަޢުލީމީ ދާއިރާއަށް އަމާޒުކޮށް ދިން ވަރުގަދަ ސައިބަރ ހަމަލާތަކެއް އެ ގައުމުގެ ސައިބަރ ސެކިއުރިޓީ ނިޒާމުތަކުން ދެނެގަނެ، ނާކާމިޔާބުކޮށްލާފައިވާ ކަމަށް އެމިރޭޓްސް ނިއުސް އެޖެންސީ (ވަމް) އިން ހޯމަ ދުވަހު ރިޕޯޓްކޮށްފި އެވެ. ޔޫއޭއީގެ ސައިބަރ ސެކިއުރިޓީ ކައުންސިލާ ހަވާލާދީ އެ އެޖެންސީން ބުނީ، މިއީ ވަރަށް ބޮޑަށް ރޭވިގެން ދީފައިވާ ކުރިއަރާފައިވާ ހަމަލާތަކެއް ކަމަށެވެ.

ސައިބަރ ސެކިއުރިޓީ ކައުންސިލުން ބުނި ގޮތުގައި، މި ހަމަލާތަކަށް ވަގުތުން އިޖާބަދީ، ހަމަލާދިން ފަރާތްތަކުގެ މަގްސަދު ހާސިލްވުމުގެ ކުރިންނާއި، ގައުމުގެ މުހިންމު ނިޒާމުތަކަށާއި ޚިދުމަތްތަކަށް ބުރޫއެރުމުގެ ކުރިން ވަނީ އެކަން ކޮންޓްރޯލްކޮށްފަ އެވެ. މި ހަމަލާތަކާ ދެކޮޅަށް މަސައްކަތް ކުރީ ދުރާލާ ރައްކާތެރިކަމުގެ ފިޔަވަޅުތައް އަޅައިގެން ކަމަށްވެސް އެ ކައުންސިލުން ފާހަގަކުރި އެވެ.

ސައިބަރ ސެކިއުރިޓީ ކައުންސިލުން ހާމަކުރި ގޮތުގައި، މި ހަމަލާތަކުގައި އެކި އުކުޅުތައް ބޭނުންކޮށްފައިވެ އެވެ. އޭގެ ތެރޭގައި ޑިޖިޓަލް އިންފްރާސްޓްރަކްޗަރާއި ނިޒާމުތަކުގެ ތެރެއަށް ވަދެގަތުމަށް ކުރި މަސައްކަތްތަކާއި، އެކައުންޓްތަކާއި އޮޕަރޭޝަނަލް ޑޭޓާ ނުވަތަ މަސައްކަތްތަކާ ގުޅޭ މައުލޫމާތުތަކަށް އަމާޒުކޮށް ދިން ހަމަލާތައް ހިމެނެ އެވެ.

މީގެ އިތުރުން، ހަމަލާދިން ފަރާތްތަކުން ވަނީ ވަކި ބަޔަކަށް އަމާޒުކޮށްގެން 'ފިޝިންގ' ކެމްޕޭންތައް ހިންގައި، ސިސްޓަމްތަކުގެ ތެރެއަށް ވަނުމަށްޓަކައި ޔޫޒަރުން ނުވަތަ ބޭނުންކުރާ ފަރާތްތަކުގެ މައުލޫމާތު ހޯދުމަށް މަސައްކަތް ކޮށްފައި ކަމަށްވެސް އެ ކައުންސިލުން ބުންޏެވެ.

ގައުމީ ސައިބަރ ސެކިއުރިޓީ ޓީމުތަކުން ވަނީ މި ހަރަކާތްތައް ކާމިޔާބުކަމާއެކު ދެނެގަނެ، އެކަންކަން ހުއްޓުވާފަ އެވެ. އަދި މި ނުރައްކާތައް ނައްތާލައި، އިތުރަށް ފެތުރުނަ ނުދިނުމަށްޓަކައި އަޅަންޖެހޭ ފަންނީ ފިޔަވަޅުތައް އަޅާފައިވާ ކަމަށް ސައިބަރ ސެކިއުރިޓީ ކައުންސިލުން މައުލޫމާތުދެއެވެ.

ނަމަވެސް، މި ހަމަލާތަކުގެ ފަހަތުގައިވަނީ ކޮން ބައެއްކަން އެ ކައުންސިލުން ހާމަކޮށްފައެއް ނުވެ އެވެ.