އީރާންގެ ހަތަރު ބޭންކަކަށް ސައިބަރ އެޓޭކެއް ދީފި

އީރާންގެ މައިގަނޑު ހަތަރު ބޭންކަކަށް އަމާޒުކޮށް ދިން ސައިބަރ އެޓޭކެއް ނުވަތަ ހެކް ކުރުމުގެ ހާދިސާއަކާ ގުޅިގެން، އެ ބޭންކު ތަކުން ދެމުންދާ ބައެއް ޚިދުމަތް ތަކަށް ބުރޫ އަރާފައިވާ ކަމަށް އެ ގައުމުގެ ދައުލަތުގެ މީޑިއާ އިން ރިޕޯޓު ކޮށްފި އެވެ.

މި ހަމަލާއާ ގުޅިގެން ބޭންކު ތަކުގެ ޚިދުމަތް ތަކަށް ދަތި ތަކެއް ކުރިމަތިވި ނަމަވެސް، ކަސްޓަމަރުންގެ އެއްވެސް މައުލޫމާތެއް ގެއްލިފައި ނުވާ ކަމަށް އީރާންގެ ބޭންކިންގ ކޯޑިނޭޝަން ކައުންސިލް އިން ވަނީ ހާމަ ކޮށްފައި އެވެ.

އާދީއްތަ ދުވަހު އެ ކައުންސިލް އިން ނެރުނު ބަޔާނެއްގައި ބުނެފައި ވަނީ، މި ސައިބަރ ހަމަލާ އަމާޒު ކޮށްފައި ވަނީ ބޭންކް މެއްލީ، ބޭންކް ތެޖާރަތު، ބޭންކް ސާދިރާތު އަދި އެކްސްޕޯޓް ޑިވެލޮޕްމަންޓް ބޭންކް އޮފް އީރާން އިން ބޭނުން ކުރާ މުއާސަލާތީ އޮނިގަނޑަކަށް ކަމަށެވެ. މި ހަމަލާއާ ގުޅިގެން ރައްކާތެރި ކަމުގެ ފިޔަވަޅެއްގެ ގޮތުން ބައެއް ޚިދުމަތްތައް ވަގުތީ ގޮތުން މެދު ކަނޑާލަން ޖެހުނު ކަމަށް ވެސް އެ އިދާރާ އިން ބުނެފައިވެ އެވެ.

މި ހާދިސާ ހިނގުމާ އެކު ބޭންކު ތަކުގެ ފަންނީ ޓީމު ތަކުން ވަނީ ހަމަލާ އިން ރައްކާތެރި ވުމަށް އަވަސް ފިޔަވަޅު ތަކެއް އަޅާފައި އެވެ. ބޭންކިންގ ކައުންސިލް އިން ބުނި ގޮތުގައި، ހެކަރުންނަށް ކަސްޓަމަރުންގެ އެއްވެސް އަމިއްލަ މައުލޫމާ ތަކަށް އެކްސެސް ވެވިފައި ނުވެ އެވެ. އަދި ބޭންކު ތަކުގެ އެއްވެސް ޑޭޓާއެއް ނުވަތަ މައުލޫމާތެއް ފޮހެވިފައި ނުވާ ކަމުގެ ޔަގީންކަން ވެސް އެ ކައުންސިލް އިން ވަނީ ދީފައި އެވެ.

މިހާރު ކުރިއަށް ދަނީ ބޭންކު ތަކުގެ ޚިދުމަތްތައް އާންމު ހާލަތަށް ގެނައުމުގެ މަސައްކަތް ކަމަށް އީރާންގެ ދައުލަތުގެ މީޑިއާ އިން ރިޕޯޓު ކޮށްފައިވެ އެވެ. މި ހަމަލާގެ ސަބަބުން ބައެއް އޮންލައިން ޚިދުމަތްތަކާއި، ބޭންކިންގ ޓްރާންސެކްޝަން ތަކަށް ވަގުތީ ގޮތުން ބުރޫ އެރި ނަމަވެސް، މާލީ ނިޒާމަށް ބޮޑު ގެއްލުމެއް ލިބިފައި ނުވާ ކަމަށް ކަމާ ބެހޭ ފަރާތް ތަކުން ބުނެ އެވެ.

މި ސައިބަރ ހަމަލާ ދީފައި ވަނީ ކޮން ބައެއްކަން ނުވަތަ ކޮން ގައުމަކުންކަން އީރާންގެ ސަރުކާރުން މިހާތަނަށް ހާމަ ކޮށްފައި ނުވެ އެވެ. ނަމަވެސް ފަހަކަށް އައިސް އީރާންގެ މުހިންމު އިންފްރާސްޓްރަކްޗާ ތަކަށް އަމާޒުކޮށް މިފަދަ ސައިބަރ ހަމަލާތައް ދިނުން ވަނީ އިތުރު ވެފައި އެވެ. މި ހާދިސާއާ ގުޅިގެން އިތުރު ތަހުގީގުތައް ކުރިއަށްދާ ކަމަށް ވެސް ރިޕޯޓުތައް ބުނެ އެވެ.