ދުބާއީގައި ލޯބިވެރިޔާ މަރާލި ތުހުމަތުގައި ޓިކްޓޮކް އިންފްލުއެންސަރަށް މަރުގެ އަދަބު ކުރިމަތިވެދާނެ ކަމުގެ ބިރު ބޮޑުވެއްޖެ

ދުބާއީގައި އޭނާގެ ލޯބިވެރިޔާ މަރާލި ކަމުގެ ތުހުމަތު ކުރެވޭ ޓިކްޓޮކް އިންފްލުއެންސަރެއް ކަމަށްވާ 23 އަހަރުގެ ބްރޫކް ޖޯޖަށް، މަރުގެ އަދަބު ކުރިމަތިވެދާނެ ކަމަށް އިންސާނީ ހައްގުތަކަށް މަސައްކަތްކުރާ ޖަމާއަތަކުން ބުނެފިއެވެ.

އިނގިރޭސިވިލާތުގެ ރައްޔިތެއް ކަމަށްވާ ބްރޫކް ޖޯޖްގެ މައްޗަށް ދައުވާކޮށްފައިވަނީ، އިންޓަނެޓް މެދުވެރިކޮށް ދިމާވެގެން އުޅުނު އޭނާގެ ލޯބިވެރިޔާއަށް ވަޅިން ހަމަލާދީ މަރާލި ކަމުގެ ތުހުމަތުގައެވެ. މިކަން ހާމަކޮށްފައިވަނީ "ޑިޓެއިންޑް އިން ދުބާއީ" ނަމަކަށް ކިޔާ އެޑްވޮކަސީ ގްރޫޕަކުންނެވެ.

އެ ޖަމާއަތުން ބުނި ގޮތުގައި، ޔުނައިޓެޑް އެރަބް އެމިރޭޓްސް (ޔޫއޭއީ) ގައި އޭނާގެ ބައިވެރިޔާ ދިން އަނިޔާވެރި ހަމަލާއަކުން އަމިއްލަ ނަފްސު ދިފާއުކުރުމަށް ވަޅިއެއް ނެގި ކަމަށް ބްރޫކް ބުނެފައިވެއެވެ. އެ ޖަމާއަތުން ވަނީ އޭނާ ކަފާލާތުގެ ދަށުން ދޫކޮށްލުމަށާއި، މި މައްސަލައަކީ ގެވެށި އަނިޔާގެ މައްސަލައެއްގެ ގޮތުގައި ބެލުމަށް ގޮވާލާފައެވެ.

އިނގިރޭސިވިލާތުގެ ފޮރިން ކޮމަންވެލްތު އެންޑް ޑިވެލޮޕްމަންޓް އޮފީހުން ބުނީ، ޔޫއޭއީގައި ބަންދުކޮށްފައިވާ އިނގިރޭސި އަންހެނަކަށާއި އޭނާގެ އާއިލާއަށް އެހީތެރިކަން ފޯރުކޮށްދެމުންދާ ކަމަށެވެ.

ބްރޫކް ޖޯޖް ހައްޔަރުކުރީ ޖޫން މަހުގެ 22 ވަނަ ދުވަހުގެ ފަތިހުގެ ވަގުތެއްގައެވެ. އޭނާގެ މައްޗަށް އުފުލާފައިވަނީ ރާވައިގެން މީހަކު މަރާލުމުގެ ދައުވާއެވެ.

މި ކުށް ސާބިތުވެއްޖެ ނަމަ، ޔޫއޭއީގެ ގާނޫނުތަކުގެ ދަށުން އޭނާ މަރަން ހުކުމް ކުރާނެއެވެ.

ދުބާއީއަށް ކުރި ފުރަތަމަ ދަތުރުގައި ބްރޫކް އެ ސިޓީ ސިފަކޮށްފައިވަނީ އޭނާގެ ހަޔާތުގައި އައި އެންމެ އުފާވެރި ދުވަސްތަކުގެ ގޮތުގައެވެ. ނަމަވެސް، "ޑިޓެއިންޑް އިން ދުބާއީ" ގެ ޗީފް އެގްޒެކެޓިވް ރާދާ ސްޓާލިން ބުނި ގޮތުގައި، އެ ސިޓީއަށް ކުރި ދެވަނަ ދަތުރުގައި އެ ދެމީހުންގެ ގުޅުން ގޯސްވެ، އަނިޔާވެރިކަމަށް ބަދަލުވިއެވެ.

ސްޓާލިން ބުނީ، ބްރޫކްގެ ބައިވެރިޔާ އޭނާގެ މައްޗަށް ބާރު ފޯރުވައި އަނިޔާކުރަން ފެށި ކަމަށާއި، ބްރޫކް ދުބާއީން ފުރަން މަސައްކަތް ކުރީ އޭނާގެ ގައިގައި ބައިވެރިޔާ ތަޅައި، ޕާސްޕޯޓް އަތުލައި، އަދި އެމީހުން ދިރިއުޅޭ އެޕާޓްމަންޓުގައި ހަމަލާދިނުމުން ކަމަށް ބްރޫކް ބުނެފައިވާ ކަމަށެވެ.

އޭނާގެ ފުރާނައަށް ނުރައްކާވެދާނެ ކަމުގެ ބިރު އޮތުމުން، އަތްފޯރާ ފަށުގައި އޮތް ބަދިގޭގައި ބޭނުންކުރާ ވަޅިއެއް ނަގައި، އަމިއްލަ ނަފްސު ދިފާއުކުރީ ކަމަށް ބްރޫކް ބުނި ކަމަށް ސްޓާލިން އިތުރަށް ބުންޏެވެ.