ފީފާގެ އިސްވެރިންގެ ކުއްލި ބައްދަލުވުމަކަށް އިންފަންޓީނޯ ގޮވާލައްވައިފި
5 އޯގަސްޓު 2026 | ބުދަ 07:08ފީފާގެ މުބާރާތްތައް ހިންގުން އަމިއްލަ ބަޔަކަށް ވިއްކާލުމަށް ރައީސް އިންފަންޓީނޯ ހުށަހެޅުއްވި "ފީފާ ފޯވާޑް އެންޓަޕްރައިޒް" މަޝްރޫއާ ދެކޮޅަށް އެ އިދާރާގެ އިސްވެރިން ވަނީ ތެދުވެފައި. މި މަޝްރޫއުގެ ސަބަބުން ފުޓްބޯޅައިގެ ނަޒާހަތްތެރިކަން ގެއްލޭނެ ކަމަށް ބުނެ އާސީން ވެންގާ އާއި ސެކްރެޓަރީ ޖެނެރަލް ފާޑުކިޔާފައިވާއިރު، މި މައްސަލައިގައި އުފެދިފައިވާ ހަމަނުޖެހުންތަކަށް ހައްލެއް ހޯދުމަށް މޮރޮކޯގައި ކުއްލި ބައްދަލުވުމެއް ބޭއްވުމަށް ވަނީ ނިންމާފައި
ދުނިޔޭގެ ފުޓްބޯޅައިގެ މައި އިދާރާ، ފީފާގެ ރައީސް ޖިއާނީ އިންފަންޓީނޯ | ގެޓީ އިމޭޖަސް
ފީފާގެ މުބާރާތްތަކާއި އަދި އިވެންޓްތައް ހިންގުމުގެ މަސައްކަތް އަމިއްލަ ބަޔަކަށް ވިއްކާލުމަށް ރޭވި ރޭވުމާ ގުޅިގެން ހަމަނުޖެހުންތައް އުފެދި އިދާރާގެ ރައީސް ޖިއާނީ އިންފަންޓީނޯއަށް އަމާޒުވަމުންދާ ފާޑުކިޔުންތައް އިތުރުވެފައިވާ ދަނޑިވަޅެއްގައި، ފީފާގެ އިސްވެރިންގެ ކުއްލި ބައްދަލުވުމަކަށް އޭނާ ގޮވާލައްވައިފި އެވެ. މި ބައްދަލުވުން ބޭއްވުމަށް ހަމަޖެހިފައިވަނީ މި އަންގާރަ ދުވަހު މޮރޮކޯގަ އެވެ.
ފީފާގެ ގްލޯބަލް ފުޓްބޯލް ޑިވެލޮޕްމަންޓްގެ އިސްވެރިޔާ އާސީން ވެންގާ އާއި، ސެކްރެޓަރީ ޖެނެރަލް މަޓިއަސް ގްރާފްސްޓްރޯމްގެ އިތުރުން އުރުދުންގެ ފުޓްބޯޅަ އެސޯސިއޭޝަންގެ ރައީސް ޕްރިންސް އަލީ ވަނީ، އިންފަންޓީނޯ ހުށަހެޅުއްވި "ފީފާ ފޯވާޑް އެންޓަޕްރައިޒް" މަޝްރޫއާ ދެކޮޅުކަން ވަރަށް ސާފުކޮށް ހާމަކުރައްވާފަ އެވެ.
ވޭތުވެދިޔަ ހަފުތާގައި މޮރޮކޯގައި ހުންނެވި އިންފަންޓީނޯ، ރަބާތުގައި އެގްޒެކެޓިވް ބައްދަލުވުމެއް ބޭއްވުމަށް ނިންމެވީ މި މައްސަލައިގައި އުފެދިފައިވާ ހޫނު ބަހުސްތަކަށް ހައްލެއް ހޯއްދެވުމުގެ މަގުސަދުގަ އެވެ.
ބީބީސީ ސްޕޯޓްސް އިން ހާމަކޮށްފައިވާ ގޮތުގައި، މި ބައްދަލުވުމުގައި ގްރާފްސްޓްރޯމްގެ އިތުރުން ފީފާގެ މެނޭޖްމަންޓް ބޯޑުގެ އިސް މެންބަރުން ބައިވެރިވާނެ އެވެ. އޭގެ ތެރޭގައި ފައިނޭންސް ޗީފް ތޯމަސް ޕެޔާ، ލީގަލް ޗީފް އެމީލިއޯ ގާސިއާ ސިލްވެރޯ، ޗީފް އޮފް ސްޓާފް ޑެނިއަލް އޯޓޫލް، ޗީފް އޮފް މެމްބަރ އެސޯސިއޭޝަންސް އެލްޚާން މަމަޑޯވް އަދި މީޑިއާ ރިލޭޝަންސް ޑައިރެކްޓަރު ބްރަޔަން ސްވަންސަން ހިމެނެ އެވެ.
ފީފާ މެދުވެރިކޮށް ނެރުއްވި ބަޔާނެއްގައި ވެންގާ ވިދާޅުވީ، އެ މަޝްރޫއު ހުއްޓާލުމަކީ "ކޮންމެހެން ކުރަންޖެހޭ އަދި އެކަމާ މެދު ސުވާލު އުފެއްދުމުގެ ޖާގައެއް ނެތް" ކަމެއް ކަމަށެވެ.
ގްރާފްސްޓްރޯމް ފީފާގެ މުވައްޒަފުންނަށް ފޮނުއްވި އެތެރޭގެ އީމެއިލެއްގައި، ވޭތުވެދިޔަ ހަފުތާގައި ހިނގައިދިޔަ ކަންތައްތަކަކީ "ހިތާމަވެރި އަދި ބަލައިގަނެވޭނެ ކަންތައްތަކެއް ނޫން" ކަމަށް ސިފަކުރައްވާފައިވެ އެވެ.
މީގެއިތުރުން ޕްރިންސް އަލީ ވަނީ، މުބާރާތްތަކުގެ އިނާމު ފައިސާ ނުދީ ހިފެހެއްޓުމާއި އިންފަންޓީނޯ އަލުން އިންތިޚާބު ކުރުމަށް ތާއީދު ހޯދުމަށް ފީފާއިން ކުރަމުންދާ މަސައްކަތްތަކަކީ "ބިރުދެއްކުމުގެ" އަމަލުތަކެއްގެ ގޮތުގައި ތުހުމަތު ކުރައްވާފަ އެވެ.
ވެންގާ 2019 ވަނަ އަހަރުން ފެށިގެން ފީފާގައި އަދާކުރައްވަމުން ގެންދަވާ މަގާމަކީ ފުޓްބޯޅައިގެ ޑޭޓާ އެނަލިސިސް އާއި، އޮންލައިން ތަމްރީނުތަކާއި ޒުވާން ކުޅުންތެރިންގެ މުބާރާތްތައް ބެލެހެއްޓުމުގެ މަގާމެވެ.
އާސެނަލްގެ ކުރީގެ ކޯޗު ވެންގާ މީގެ ކުރިން ވަނީ، ކޮންމެ ދެ އަހަރަކުން އެއްފަހަރު ފިރިހެނުންގެ ވޯލްޑް ކަޕް ބޭއްވުމަށް އިންފަންޓީނޯ ހުށަހެޅުއްވި ހުށަހެޅުމަށް ތާއީދުކޮށްފަ އެވެ.
ނަމަވެސް، އިންފަންޓީނޯގެ އިންވެސްޓްމަންޓް ޕްލޭން އާންމުކުރިތާ ހަފުތާއެއް ފަހުން، ވެންގާ ވަނީ ފީފާގެ ފަރާތުން ނެރުއްވި ބަޔާނެއްގައި އެ އިދާރާގެ "ދެފުށް ފެނުމާއި ނަޒާހަތްތެރިކަން" ކަށަވަރުކުރުމަށް ގޮވާލައްވާފަ އެވެ.
ވެންގާގެ ބަޔާނުގައި ވިދާޅުވެފައިވަނީ، ފީފާގައި ދާދި ފަހުން ހިނގައިދިޔަ ކަންތައްތަކާ ގުޅިގެން އޭނާގެ ފަރާތުން ކަންތައްތަކެއް ސާފުކޮށްދޭން ޖެހޭ ކަމަށް ގަބޫލުކުރައްވާ ކަމަށެވެ.
އޭނާ އިތުރަށް ވިދާޅުވީ، އެ ސްޓްރެޓީޖިކް ޕްލޭން އެކުލަވާލުމުގައި އޭނާގެ އެއްވެސް ބައިވެރިވުމެއް ނެތް ކަމަށާއި، އެ މަޝްރޫއާ ބެހޭ މައުލޫމާތު ފުރަތަމަ ލިބިވަޑައިގަތީ މީޑިއާ ރިޕޯޓްތަކުން ކަމަށެވެ.
އަދި އެ މަޝްރޫއު އަނބުރާ ގެންދަން ނިންމި ނިންމުމަކީ ކޮންމެހެން ކުރަންޖެހޭ ކަމެއް ކަމަށާއި، އެއީ ފީފާއަކީ މި ކުޅިވަރަށް އިޚްލާސްތެރިކަމާއި، ދެފުށް ފެންނަ ގޮތެއްގައި އަދި ނަޒާހަތްތެރިކަމާއެކު ޚިދުމަތްކުރާ މިނިވަން އިދާރާއަކަށް ވާންޖެހޭނެ ކަމަށް އޭނާ ގަބޫލުކުރައްވާތީ ކަމަށްވެސް ވެންގާ ވިދާޅުވި އެވެ.
ޔޫއެފާއިން ގާނޫނީ ފިޔަވަޅު އަޅާނެ ކަމުގެ އިންޒާރުދީ ފީފާއަށް ފޮނުވި ލިޔުމުގައި ނަން ހިމަނާފައިވާ ފީފާގެ 18 އޮފިޝަލުންގެ ތެރޭގައި ވެންގާ ހިމެނިވަޑައިގަންނަވަ އެވެ.
މި މައްސަލައިގައި މިހާތަނަށް އިސްތިއުފާ ދެއްވި ފީފާގެ ހަމައެކަނި އޮފިޝަލަކީ، އިންފަންޓީނޯގެ ގްލޯބަލް ސްޓްރެޓީޖީ އެންޑް ގަވަރނަންސްގެ ސީނިއާ އެޑްވައިޒަރު ކާލޯސް ކޯޑޭރޯ އެވެ. އޭނާ އިސްތިއުފާ ދެއްވަމުން ވިދާޅުވީ، އެ ހުށަހެޅުމަކީ ފުޓްބޯޅައަށް އޮތް "ގޯސް އެއްބަސްވުމެއް" ކަމަށާއި، އޭގެ ސަބަބުން ފުޓްބޯޅައިގެ މުސްތަގުބަލު "ރަހުނު ކުރެވޭނެ" ކަމަށެވެ.
