ހެދުނު ގޯސްތަކަށް "އިޚްލާސްތެރިކަމާއެކު މާފަށް އެދެން": އިންފަންޓީނޯ

ފީފާގެ މުބާރާތްތަކުގެ ހިއްސާ އަމިއްލަ އިންވެސްޓަރުންނަށް ވިއްކާލުމަށް ރާވާފައިވާ އުސޫލާ ގުޅިގެން ކުރިމަތިވި ފާޑުކިޔުންތަކާ ގުޅިގެން، ފީފާގެ ރައީސް ޖިއާނީ އިންފަންޓީނޯ ހެދިފައިވާ "ގޯސްތަކަށް" މާފަށް އެދިވަޑައިގެންފި އެވެ. ނަމަވެސް، މޮރޮކޯގައި ބޭއްވި މަތީ ފަންތީގެ އެގްޒެކެޓިވްންގެ ބައްދަލުވުމެއްގައި އޭނާއަށް ތާއީދު އޮތްކަން ހާމަކުރުމާއެކު، އިންފަންޓީނޯ މަގާމުގައި ދެމިހުންނަވާނެކަން މިހާރު ވަނީ ކަށަވަރުވެފަ އެވެ.

ދުނިޔޭގެ ފުޓްބޯޅައިގެ މައި އިދާރާ، ފީފާގެ "ފީފާ ފޯވާޑް އެންޓަޕްރައިޒް" (އެފް.އެފް.އީ) މަޝްރޫއާ ގުޅިގެން އަމާޒުވި ފާޑުކިޔުންތަކާ ގުޅިގެން، އިންފަންޓީނޯ ވަނީ ބުދަ ދުވަހު މޮރޮކޯގެ ރަބާތުގައި ހުންނަ ފީފާގެ އެފްރިކާ އޮފީހަށް މެނޭޖްމަންޓް ބޯޑުގެ މެންބަރުން ހާޒިރުކުރައްވާފަ އެވެ. މި ބައްދަލުވުން ނިމުނުތާ ހަތަރު ގަޑިއިރު ނުވަނީސް، ފީފާއިން ވަނީ އިންފަންޓީނޯއަށް ތާއީދު އޮތްކަން ހާމަކޮށް ބަޔާނެއް ނެރެފަ އެވެ.

ޔޫރަޕްގެ ފުޓްބޯޅައިގެ މައި އިދާރާ، ޔޫއެފާއިން މިދިޔަ ހަފުތާ ބަންދުގައި ބުނެފައިވަނީ އިންފަންޓީނޯއަށް އޮތް އިތުބާރު ގެއްލިފައިވާ ކަމަށެވެ. އަދި އެފް.އެފް.އީ މަޝްރޫއަކީ ނުފޫޒުން ފުރިފައިވާ، ދެފުށް ނުފެންނަ، އަދި ދަށު ދަރަޖައިގެ މުއާމަލާތެއްގެ ގޮތުގައި ޔޫއެފާއިން ވަނީ ސިފަކޮށްފަ އެވެ.

މި މަޝްރޫއަށް ފީފާގެ އެތެރެއިންވެސް ބޮޑެތި ފާޑުކިޔުންތަކެއް ވަނީ އަމާޒުވެފަ އެވެ. އޭގެ ތެރޭގައި ބުދަ ދުވަހުގެ ބައްދަލުވުމުގައި ބައިވެރިވެވަޑައިގެންނެވި ސެކްރެޓަރީ ޖެނެރަލް މަޓިއަސް ގްރާފްސްޓްރޯމް ހިމެނިވަޑައިގަންނަވަ އެވެ. އޭނާ އަންގާރަ ދުވަހު ފީފާގެ މުވައްޒަފުންނަށް ފޮނުއްވި މެމޯއެއްގައި ވިދާޅުވެފައިވަނީ، މި ކަން ހިނގައިދިޔަ ގޮތަކީ ވަރަށް ދެރަ އަދި ބަލައިގަނެވޭނެ ކަމެއް ނޫން ކަމަށެވެ.

އެހެންނަމަވެސް، ބައްދަލުވުމަށްފަހު ނެރުނު ބަޔާނުގައި ގްރާފްސްޓްރޯމް އާއި މެނޭޖްމަންޓް ބޯޑުން ވަނީ އިންފަންޓީނޯ ރައީސްގެ މަގާމުގައި ހުންނެވުމަށް ފުރިހަމައަށް ތާއީދުކުރާކަން އަލުން ކަށަވަރުކޮށްދީފަ އެވެ.

ބީބީސީއަށް ލިބިފައިވާ ސިޓީއެއްގައިވާ ގޮތުން، އިންފަންޓީނޯ އާއި ގްރާފްސްޓްރޯމް ވަނީ ފީފާގެ ނައިބު ރައީސުންނަށާއި، ކައުންސިލް މެންބަރުންނަށް އަދި 211 މެންބަރު އެސޯސިއޭޝަނަށް ސޮއިކޮށް ސިޓީއެއް ފޮނުއްވާފަ އެވެ. އެ ސިޓީގައި، ހެދުނު ގޯސްތަކަށް "އިޚްލާޞްތެރިކަމާއެކު މާފަށް އެދޭ" ކަމަށާއި، އެފަދަ ކަމެއް ތަކުރާރު ނުވާނެ ކަމުގެ ޔަގީންކަން ވަނީ ދީފައެވެ.

މި ބައްދަލުވުމަށްފަހު، ރަބާތުގައި ބޭއްވި އެފްރިކާގެ އަންހެނުންގެ ފުޓްބޯޅަ މުބާރާތުގެ މެޗެއް ބައްލަވާލެއްވުމަށް އިންފަންޓީނޯ އާއި ގްރާފްސްޓްރޯމް އެކުގައި ވަޑައިގެން ތިއްބަވާ ފޮޓޯތަކެއް ވެސް ވަނީ އާންމުވެފަ އެވެ.

އިންފަންޓީނޯ ކުރިން ހުށަހަޅާފައިވަނީ، ފިރިހެން އަދި އަންހެން ވޯލްޑް ކަޕް ހިމެނޭހެން ފީފާގެ މުބާރާތްތަކަށް އަމިއްލަ އިންވެސްޓަރުންގެ އެހީ ހޯދުމަށް "އެފް.އެފް.އީ" ގެ ނަމުގައި އުފައްދާ ކުންފުންޏަށް ތާއީދުކޮށްފިނަމަ، ކޮންމެ އެސޯސިއޭޝަނަކަށް 40 މިލިއަން ޑޮލަރު (30 މިލިއަން ޕައުންޑް) ދިނުމަށެވެ.

ބުދަ ދުވަހުގެ ބައްދަލުވުމުގައި އެފް.އެފް.އީ މަޝްރޫއާ ގުޅޭގޮތުން ހެދުނު "ގޯސްތައް" ގަބޫލުކޮށްފައިވާ ކަމަށް ފީފާއިން ބުންޏެވެ. އަދި ފީފާ ކައުންސިލާއި މެންބަރު އެސޯސިއޭޝަންތައް މި ނިންމުންތަކުން ބާކީކޮށްލުމަކީ ގަސްތުގައި ކުރި ކަމެއް ނޫން ކަމަށާއި، އެ ކަން ކުރިއަށް ގެންދަންޖެހޭނީ މިއަށްވުރެ ރަނގަޅު ގޮތަކަށް ކަމަށްވެސް ފީފާއިން އެއްބަސްވެފައިވެ އެވެ.

މީގެ އިތުރުން، ޖުލައި 28 ވަނަ ދުވަހު "ދަ ޓައިމްސް" ނޫހުން މި މަޝްރޫއުގެ ޚަބަރު ފެތުރުމާ ގުޅިގެން، އެ ކަމާ މެދު އަމަލުކުރެވުނު ގޮތުގައިވެސް ގޯސްތަކެއް ހުރިކަން ފީފާއިން ވަނީ ގަބޫލުކޮށްފަ އެވެ.

އެހެންނަމަވެސް، ފީފާގެ ބަޔާނުގައި ބުނެފައިވަނީ އެ އިދާރާގެ އަބުރަށާއި، ހިންގުމުގެ ނިޒާމަށް އަމާޒުކޮށްދޭ އެއްވެސް ހަމަލާއަކަށް ދެން ފުރުސަތު ނުދޭނެ ކަމަށެވެ. އަދި ފީފާގެ ނަމާއި އަބުރު ރައްކާތެރިކުރުމަށް އަޅަންޖެހޭ ހުރިހާ ފިޔަވަޅެއް އަޅާނެ ކަމަށްވެސް ބުނެފައިވެ އެވެ.

މީގެ ކުރިން "ދަ ޓައިމްސް" ނޫހުން ރިޕޯޓްކޮށްފައިވާ ގޮތުގައި، 2030 ވަނަ އަހަރުގެ ވޯލްޑް ކަޕް ފައިނަލް މޮރޮކޯގައި ބޭއްވުމަށް އިންފަންޓީނޯ ވަނީ އެ ގައުމަށް ވައުދުވެފަ އެވެ. އެއީ އޭނާގެ މަޝްރޫއަށް މޮރޮކޯގެ ތާއީދު ހޯދުމުގެ ބަދަލުގެ ގޮތުގަ އެވެ. ނަމަވެސް ފީފާއިން ވަނީ މި ވާހަކަ ދޮގުކޮށްފަ އެވެ.

ފީފާއިން ބުނީ އެއީ ދޮގު އަދި އޮޅުވާލުމެއް ކަމަށާއި، ސްޕެއިން އަދި ޕޯޗުގަލްއާއެކު ބާއްވާ މި މުބާރާތުގެ ފައިނަލް އޮންނާނެ ތަނެއް ނިންމާނީ ފަހުން ކަމަށެވެ.

އިތުރު ފާޑުކިޔުންތަކާއެކުވެސް އެތެރޭގެ ތާއީދު

އިންފަންޓީނޯ އުންމީދު ކުރައްވަނީ، އޭނާގެ 10 އަހަރުގެ ދައުރުގައި ކުރިމަތިވި މި ބޮޑު މައްސަލައަށް މި ބައްދަލުވުމާއެކު ނިމުމެއް އަންނާނެ ކަމަށެވެ.

ނަމަވެސް، ފީފާގެ އެގްޒެކެޓިވްންގެ ތާއީދު އިންފަންޓީނޯއަށް ލިބުނު ނަމަވެސް، އޭނާއަށް އަމާޒުވާ ފާޑުކިޔުންތައް ދަނީ އިތުރުވަމުންނެވެ.

އެމެރިކާ އަދި މެކްސިކޯއާއެކު އެންމެ ފަހުން ވޯލްޑް ކަޕް ބޭއްވި ކެނެޑާގެ ބޮޑުވަޒީރު މާކް ކާނީ ވިދާޅުވީ، އިންފަންޓީނޯއަށް އޮތް އިތުބާރު މިހާރު ގެއްލިފައިވާ ކަމަށެވެ.

މީގެ އިތުރުން، ބާސެލޯނާ އަދި ރެއާލް މެޑްރިޑްގެ ކުރީގެ ތަރި ލުއިސް ފީގޯ ވަނީ އިންފަންޓީނޯ ވަގުތުން އިސްތިއުފާ ދިނުމަށް ގޮވާލާފަ އެވެ. ފީގޯއަކީ 2015 ވަނަ އަހަރު ފީފާގެ ރައީސްކަމަށް ވާދަކުރި ފަރާތެކެވެ.

ފީގޯ ބުނީ، އިންފަންޓީނޯ ވަނީ އޭނާ ރަނގަޅު ކުރާނެ ކަމަށް ވައުދުވި މަގާމުގެ ގަދަރު ކުޑަކޮށްލާފައި ކަމަށެވެ. އަދި އޭނާގެ އަމިއްލަ އަބުރު ސަލާމަތްކުރަން މިހާރު މާ ލަސްވެފައިވީ ނަމަވެސް، ފުޓްބޯޅަ ސަލާމަތްކުރަން އަދި ވަގުތު އެބައޮތް ކަމަށް ފީގޯ ބުންޏެވެ.

އެހެންނަމަވެސް، އުމުރުން 56 އަހަރުގެ އިންފަންޓީނޯ ތައްޔާރުވަމުންދަނީ ހަތަރުވަނަ ދައުރަކަށް ކުރިމަތިލުމަށެވެ.

އިންފަންޓީނޯއާ ވާދަކުރަން ބޭނުންވާ ފަރާތްތަކަށް ނަން ހުށަހެޅުމުގެ ފުރުސަތު ނޮވެމްބަރު 18 އާ ހަމައަށް އޮންނާނެ އެވެ. އިންތިޚާބު ބޭއްވުމަށް ހަމަޖެހިފައިވަނީ 2027 ވަނަ އަހަރުގެ މާރިޗު މަހު މޮރޮކޯގައި ބާއްވާ ފީފާ ކޮންގްރެސްގަ އެވެ.

އިންތިޚާބު ކާމިޔާބުކުރުމަށް ފީފާގެ 211 މެންބަރުންގެ ތެރެއިން 106 ވޯޓު ބޭނުންވެ އެވެ.

ނަމަވެސް ޔޫއެފާގެ ވިސްނުން ހުރީ މިއާ މުޅިން ތަފާތުކޮށެވެ.

ޔޫއެފާއިން ވަނީ އިންފަންޓީނޯގެ ލީޑަރޝިޕަށް އޮތް އިތުބާރު ގެއްލިފައިވާ ކަމަށް ބުނެ، ފީފާއާ ދެކޮޅަށް ގާނޫނީ ފިޔަވަޅު އަޅާނެ ކަމުގެ އިންޒާރު ދީފަ އެވެ.

މި ހަފުތާގެ ކުރީކޮޅު ވޭލްސް ހިމެނޭހެން ބައެއް ގައުމުތަކުން ވަނީ އިންފަންޓީނޯ އިންތިޚާބު ކުރުމަށް ދީފައިވާ ތާއީދު އަނބުރާ ގެންގޮސްފަ އެވެ. އަދި އިންގްލެންޑުންވެސް މިފަދައިން އަމަލުކުރާނެ ކަމަށް ބެލެވެ އެވެ.

ފީފާއިން ބުނީ ގޯސްތަކެއް ހެދުނު ނަމަވެސް، ހުރިހާ ކަމެއްވެސް ކޮށްފައިވަނީ ފީފާގެ ގަވާއިދުތަކާ އެއްގޮތަށް ކަމަށެވެ. އަދި މި ބައްދަލުވުމުގެ ނަތީޖާއާއެކު ފީފާގެ ހިންގުން ހަރުދަނާވެ، އިދާރާއަށް އޮތް އިތުބާރު އަލުން ލިބޭނެ ކަމަށް ފީފާއިން ގަބޫލުކުރެ އެވެ.

އެހެންނަމަވެސް، މިފަދަ ބަޔާންތަކަކުން ޔޫއެފާގެ ނުރުހުން ކުޑަވާނެ ކަމަކަށް ނުބެލެވެ އެވެ.

ޔޫއެފާގެ ރައްދުދޭނީ ކިހިނެއް؟

އިންފަންޓީނޯގެ އެފް.އެފް.އީ މަޝްރޫއު ފެންމަތިވީއްސުރެ ޔޫއެފާއިން ދަނީ ވަރަށް ހަލުވިކަމާއެކު ފިޔަވަޅުތައް އަޅަމުންނެވެ.

ފުރަތަމަ މި މަޝްރޫއު ބަލައިނުގަތުމަށް ނިންމުމަށްފަހު، ޔޫއެފާގެ 55 މެންބަރު ގައުމުން ވަނީ ފީފާގެ މުބާރާތްތައް ބޮއިކޮޓް ކުރާނެ ކަމުގެ އިންޒާރު ދީފަ އެވެ. އަދި އިންފަންޓީނޯއަށް އިތުބާރު ނެތްކަމުގެ ވޯޓެއް ނެގުމާ ހަމައަށް ކަންތައްތައް ވަނީ ގޮސްފަ އެވެ.

ނަމަވެސް ޔޫއެފާއަށް އޮތް އެންމެ ބޮޑު ގޮންޖެހުމަކީ އެހެން ކޮންފެޑަރޭޝަންތަކުގެ ތާއީދު ނުލިބުމެވެ.

އިންފަންޓީނޯ އޭނާގެ ނިންމުން ބަދަލުކުރި ފަހުން، އޭނާއަށް ފާޑުކިޔާފައިވަނީ ހަމައެކަނި ކޮންކާކަފް (Concacaf) އިންނެވެ. ނަމަވެސް ޔޫއެފާއާ ޚިލާފަށް، އެ އިދާރާއިން އިންފަންޓީނޯއަށް އޮތް އިތުބާރު ގެއްލިއްޖެ ކަމަކަށް ނުބުނެ އެވެ.

އޭޝިއާގެ ފުޓްބޯޅަ ފެޑަރޭޝަނުން މި މަޝްރޫއު ބަލައިނުގަތް ނަމަވެސް، އިންފަންޓީނޯ އެ މަޝްރޫއު ހުއްޓާލުމުން އެ އިދާރާއިން އިތުރު ބަޔާނެއް ނެރެފައެއް ނުވެ އެވެ.

ޔޫއެފާއަކީ ބާރުގަދަ އިދާރާއަކަށް ވިޔަސް، އެކަނި މަސައްކަތް ކޮށްގެން އިންފަންޓީނޯ މަގާމުން ދުރުކުރުމަކީ ފަސޭހަ ކަމެއް ނޫނެވެ. އެ ކަމަށް ދުނިޔޭގެ އެހެން ގައުމުތަކުގެ ތާއީދު ބޭނުންވެ އެވެ.

ޔޫރަޕުން ބޭރުން މިހާތަނަށް އިންފަންޓީނޯ މަގާމުން ވަކިވުމަށް ގޮވާލާފައިވަނީ ހަމައެކަނި އުރުދުންއިންނެވެ. އުރުދުންއަކީ އިންފަންޓީނޯ އަލުން އިންތިޚާބު ކުރުމަށް ތާއީދުކޮށް ސޮއިނުކުރާ މަދު ގައުމުތަކުގެ ތެރެއިން ގައުމެކެވެ.

އިންފަންޓީނޯއަށް ތާއީދުކުރާ ގައުމުތަކުގެ ލިސްޓު މާ ދިގުވެފައި، އޭގެ ތެރޭގައި އޭނާގެ ބާރުގަދަ އޭޝިއާ އާއި އެފްރިކާގެ ގައުމުތައް ހިމެނެ އެވެ.

ފާއިތުވި ދުވަސްތަކުގައި މިސްރު، މޮރޮކޯ، ނައިޖާ، މޮރިޓޭނިއާ، ކޮންގޯ އަދި ފިލިޕީންސް ފަދަ ގައުމުތަކުން ވަނީ އިންފަންޓީނޯއަށް ތާއީދުކޮށްފަ އެވެ.

މި ގައުމުތަކަކީ އިންފަންޓީނޯގެ "ފީފާ ފޯވާޑް" ޕްރޮގްރާމްގެ ދަށުން ކޮންމެ ތިން އަހަރަކުން 8 މިލިއަން ޑޮލަރުގެ އެހީ ލިބޭ ގައުމުތަކެވެ.

ޔޫއެފާއަށް އޮތް މަސައްކަތަކީ، މިފަދަ މާލީ އެހީތައް ދެފުށް ފެންނަ ގޮތަކަށް ފޯރުކޮށްދޭނެ އެހެން ކެންޑިޑޭޓަކު ހުރިކަން މި ގައުމުތަކަށް ވިސްނައިދިނުމެވެ. ނަމަވެސް، މިހާރުވެސް މި ގައުމުތަކުގެ ވަފާތެރިކަން އޮތީ އިންފަންޓީނޯއަށެވެ.

އިންފަންޓީނޯއަށް ކަންކަން ރަނގަޅު ކުރެވިދާނެތަ؟

މީގެ ކުރިން ކުރިމަތިވި އެއްވެސް މައްސަލައަކުން އިންފަންޓީނޯގެ މަގާމަށް ގުޑުމެއް ނާދެއެވެ. އޭގެ ތެރޭގައި 2034 ވަނަ އަހަރުގެ ވޯލްޑް ކަޕް ބޭއްވުމުގެ ފުރުސަތު ސައުދީ އަރަބިއްޔާއަށް ލިބުނު ގޮތާއި، އެމެރިކާގެ ކުރީގެ ރައީސް ޑޮނަލްޑް ޓްރަމްޕަށް "ފީފާ ޕީސް ޕްރައިޒް" އެރުވުން ފަދަ ކަންކަން ހިމެނެ އެވެ.

ނަމަވެސް، މިފަހަރު ފީފާގެ މުބާރާތްތަކުގެ ވިޔަފާރި އާއި ޓިކެޓް ވިއްކުމުގެ ހައްގުތައް އަމިއްލަ ބަޔަކަށް ވިއްކާލަން އުޅުމަކީ ގިނަ ބަޔަކަށް ބަލައިގަނެވޭނެ ކަމަކަށް ނުވި އެވެ.

އެއީ ހަމައެކަނި އެ ކަމުގެ ސަބަބުން ފެންނަން އޮތް މަންޒަރު ގޯސްވުމުން އެކަންޏެއް ނޫނެވެ. އެ މަޝްރޫއަކީ ފީފާގެ އިސްވެރިންނަށް ސިއްރުން ކުރިއަށް ގެންދިޔަ ކަމަކަށް ވުމާއި، އެ މުއާމަލާތުގެ ފައިދާ ލިބޭ ފަރާތަކީ ޓްރަމްޕްގެ ދަނބިދަރި ޖެރެޑް ކުޝްނާގެ ކޮއްކޮ ޖޯޝުއާ ކުޝްނާ ކަމަށް ވުމަކީވެސް މައްސަލަ ބޮޑުވި ސަބަބެކެވެ.

އެހެންކަމުން، އިންފަންޓީނޯއަށް މިހާރު ޖެހިފައިވަނީ 211 މެންބަރު ގައުމުގެ އިތުރުން، އޭނާއާ އެންމެ ގާތްކޮށް މަސައްކަތްކުރާ ފަރާތްތަކުގެ އިތުބާރު އަލުން ހޯދުމަށެވެ.

މި މައްސަލައާ ގުޅިގެން އިންފަންޓީނޯގެ ސީނިއާ އެޑްވައިޒަރު ކާލޯސް ކޯޑޭރޯ ވަނީ އިސްތިއުފާ ދެއްވާފަ އެވެ. ނަމަވެސް، ފާޑުކިޔުންތައް އަމާޒުކުރި ނަމަވެސް ގްރާފްސްޓްރޯމް އާއި، އާސެން ވެންގާ އަދި ކެވިން ލަމޫރް ފަދަ ފަރާތްތަކުން އިސްތިއުފާއެއް ނުދެ އެވެ.

ކުރިއަށް އޮތް ތަނުގައި އިންފަންޓީނޯއަށް ޖެހިވަޑައިގަންނަވާނީ އިސްލާހީ ބަދަލުތަކެއް ގެންނާނެ ގޮތުގެ ޗާޓެއް އެކުލަވާލުމަށެވެ.

މީގެ ތެރޭގައި، މިފަދަ މަޝްރޫއުތައް ސިއްރުން ރޭވުމުގެ ފުރުސަތު ނޯންނާނެ ފަދަ ހަރުދަނާ ނިޒާމެއް ގާއިމުކުރުން ހިމެނިދާނެއެވެ. ނުވަތަ 64 ޓީމު ބައިވެރިވާ ވޯލްޑް ކަޕެއް ބޭއްވުމަށް ގެންގުޅޭ ވިސްނުން ދޫކޮށްލުން ނުވަތަ ފީފާގެ ފައިސާގެ ރިޒާވް މެންބަރު ގައުމުތަކަށް ހުޅުވާލުން ފަދަ ކަމެއް އޭނާ ކުރައްވަފާނެ އެވެ.