މޮންޓެރޭ ކޮޅަށް ލަނޑު ޖެހުމަށް ފަހު، ޑި ޕޯލް އެ ލަނޑު ޚާއްސަ ކުރީ ބައްޕަ މަރުވުމުގެ ސަބަބުން ޓީމާ ދުރުގައި ހުރި މެސީ އަށް

ލީގްސް ކަޕްގައި އިންޓަރ މިއާމީ އިން މޮންޓެރޭއާ ދެކޮޅަށް ކުޅުނު މެޗުގައި ލަނޑު ޖެހުމަށް ފަހު، ރޮޑްރީގޯ ޑި ޕޯލް އެ ލަނޑު ލިއޮނަލް މެސީ އަށް ޚާއްސަކޮށްފި އެވެ.

އާޖެންޓީނާ އާއި އިންޓަރ މިއާމީގެ ކެޕްޓަންކަން ވެސް ކުރަމުން އަންނަ މެސީ މިވަގުތު ހުރީ، އޭނާގެ ބައްޕަ ޖޯޖް މެސީ މަރުވުމުގެ ސަބަބުން ޓީމާ ދުރުގައި އެވެ. ބައްޕަ މަރުވުމާ އެކު މެސީ ވަނީ އާޖެންޓީނާ އަށް ގޮސްފި އެވެ. އެކަމުގެ ސަބަބުން، މިއާމީ އިން މޮންޓެރޭއާ ދެކޮޅަށް ކުޅުނު މެޗުގައި މެސީ ކުޅެފައި ނުވެ އެވެ. 

މޮންޓެރޭއާ ދެކޮޅަށް ކުޅުނު މެޗުގައި، މެސީގެ ބައްޕަގެ ހަނދާނުގައި މިއާމީގެ ހުރިހާ ކުޅުންތެރިން ވެސް ނުކުތީ އަތުގައި ކަޅު ކުލައިގެ ބޭންޑެއް އަޅައިގެންނެވެ. މި މެޗުގައި ޑި ޕޯލް ޖެހި ލަނޑަށް ފަހު، އޭނާ ވަނީ އަސަރުގަދަ ގޮތަކަށް އެ ލަނޑު ފާހަގަކޮށް، މެސީ އަށް އެ ލަނޑު ޚާއްސަކޮށްފައި އެވެ. 

މިއާމީ އަށް ކުޅެމުން އަންނަ ބްރެޒިލްގެ ކަސެމީރޯ ތަނަވަސްކޮށްދިން ފުރުސަތެއްގައި އެ ލަނޑު ޖެހުމަށް ފަހު، ޑި ޕޯލް ވަނީ އޭނާ ލައިގެން ހުރި ޖާޒީ ބާލައި، އެ ޖާޒީގެ ދަށުން މެސީގެ ނަން ޖަހާފައިވާ މިއާމީ ޖާޒީ ދައްކާލައިފަ އެވެ. ޑި ޕޯލް އާއި މެސީ އަކީ ޤައުމީ ޓީމުގެ އިތުރުން، މިއާމީގައި ވެސް ވަރަށް ގާތް ދެ ކުޅުންތެރިންނެވެ. 

އެންމެ ބޮޑަށް އެކަން ފާހަގަ ވެގެން ދަނީ އަބަދުވެސް މެސީގެ އެންމެ ގާތުގައި ޑި ޕޯލް ހުންނާތީ އެވެ. ބައެއް ފަރާތްތަކުން ވަނީ، ޑި ޕޯލް އަކީ މެސީގެ ބޮޑީގާޑުގެ ގޮތުގައި ވެސް ސިފަކޮށްފައި އެވެ. މެސީ އާއި ޑި ޕޯލްއާ ދެމެދު އޮންނަ ގާތް ގުޅުމަކީ އަބަދުވެސް ފާހަގަ ކޮށްލެވޭ ގުޅުމެކެވެ. 

އެ މެޗުގައި މިއާމީ 2-1 އިން ބަލިވި ނަމަވެސް، ޑި ޕޯލްގެ އަމަލު ގިނަ ބަޔަކަށް ވަނީ ވަރަށް ބޮޑަށް ފާހަގަވެފައި އެވެ.