ކަސެމީރޯ، އިންޓަރ މިއާމީ އަށް ސޮއިކޮށްފި

މެންޗެސްޓަރ ޔުނައިޓެޑު ދޫކޮށްލި ބްރެޒިލްގެ ކަސެމީރޯ، އެމެރިކާާގެ އިންޓަރ މިއާމީ އަށް ސޮއިކޮށްފި އެވެ.

ދާދި ފަހުން ނިމުނު ފީފާ ވޯލްޑް ކަޕްގެ ކުރިން ވެސް، ކަސެމީރޯ މިއާމީ އަށް ބަދަލުވާ ވާހަކަ އޮތީ ދެކެވިފައި އެވެ. އެގޮތުން މިއާމީ އިން އޭނާ ހޯދުމުގެ ޑީލް އޭރު ވެސް ކާމިޔާބު ކޮށްފައިވާ ކަމަށް ބުނެފައިވެ އެވެ. 

ވޯލްޑް ކަޕަށް ފަހު ބުދަ ދުވަހު މިއާމީ އިން ވަނީ ކަސެމޯރީ އެ ކުލަބަށް ސޮއި ކޮށްފައިވާކަން ރަސްމީކޮށް އިއުލާން ކޮށްފައި އެވެ. އުމުރުން 34 އަހަރުގެ ކަސެމީރޯ މިއާމީ އަށް ބަދަލުވެފައި ވަނީ އެއް އަހަރު ދުވަހުގެ އެއްބަސްވުމެއްގެ ދަށުންނެވެ. އެ އެއްބަސްވުމުގެ މުއްދަތު ހަމަވާނީ 2027 ވަނަ އަހަރުގެ ސީޒަންގެ ނިޔަލަށެވެ. ނަމަވެސް، އެއްބަސްވުމުގެ މުއްދަތު ހަމަވުމުން 2029 ވަނަ އަހަރާ ހަމައަށް އެއްބަސްވުން އައު ކުރުމުގެ ފުރުސަތު ވެސް އޮންނާނެ އެވެ.

މިއާމީ އަށް ބަދަލުވުމަށް ފަހު ވާހަކަ ދައްކަމުން ކަސެމީރޯ ބުނެފައި ވަނީ، އެ ކުލަބަށް ބަދަލުވެވުމުން އޭނާާ ވަރަށް ހިތްހަމަ ޖެހޭ ކަމަށާއި، އެ ކުލަބުގެ ޖާޒީގައި ކުޅެން ކެތް މެދުވެފައި ހުރި ކަމަަށެވެ. މިއާމީ އިން އޭނާ އަށް ކުރި އިތުބާރަށް ޝުކުރު އަދާ ކުރާކަން ފާާހަގަކޮށް ކަސެމީރޯ ބުނީ، އެ ކުލަބަށް ކާމިޔާބު ހޯދައި ދިނުމަށް އޭނާ ހުރިހާ މަސައްކަތެއް ކުރާާނެ ކަމަށެވެ. އޭނާ ގެނައުމަށް މިއާމީ އިން ކުރި މަސައްކަތަކީ، އޭނާގެ މުހިންމުކަން އިހުސާސް ކުރެވޭ ކަމެއް ކަމަށް ވެސް ކަސެމީރޯ ވަނީ ބުނެފައި އެވެ.

މިއާމީގައި ކަސެމީރޯ ބޭނުން ކުރާނީ ފަސް ނަންްބަރު ޖާޒީ އެވެ. އާޖެންޓީނާގެ ކެޕްޓަން ލިއޮނަލް މެސީ ކެޕްޓަންކަން ކުރަމުން އަންނަ މިއާމީ އަށް ކަސެމީރޯ ބަދަލުވީއިރު، މިއީ މެސީއާ އެއް ޓީމަކަށް އޭނާ ކުޅޭ ފުރަތަމަ ފަހަރެވެ. މީގެ ކުރިން މެސީ ބާސެލޯނާ އަށް ކުޅުނުއިރު، އަދި ކަސެމީރޯ ރެއާލް މެޑްރިޑަށް ކުޅުނުއިރު މި ދެ ކުޅުންތެރިން ވަނީ ބައްދަލު ކޮށްފައި އެވެ.

މިއާމީ އަކީ ކަސެމީރޯގެ ކެރިއަރުގައި އޭނާ ކުޅޭނެ ފަސް ވަނަ ކުލަބެވެ. ބްރެޒިލްގެ ސައު ޕައޮލޯ އިން ކެރިއަރު ފެށި ކަސެމީރޯ ވަނީ، ރެއާލް މެޑްރިޑާއި، ޕޯޓޯ އަދި މެންޗެސްޓަރ ޔުނައިޓެޑަށް ވެސް ކުޅެފައި އެވެ. މީގެ އިތުރުން ކަސެމީރޯ އަކީ ބްރެޒިލްގެ ޤައުމީ ޓީމަށް ވެސް ކުޅެމުން އަންނަ ކުޅުންތެރިޔެކެވެ.