ވޯލްޑް ކަޕްގެ ނާކާމިޔާބަށް ފަހު، މެސީ ފުރަތަމަ ފަހަރަށް އާންމުންގެ ތެރެއަށް

ފީފާ ވޯލްޑް ކަޕްގެ ފައިނަލްގައި ސްޕެއިން އަތުން އާޖެންޓީނާ ބަލިވި މެޗަށް ފަހު، އެ ޓީމުގެ ކެޕްޓަން ލިއޮނަލް މެސީ ފުރަތަމަ ފަހަރަށް އާންމުންގެ ތެރެއިން ފެނިއްޖެ އެވެ.

މެސީ ފެނިފައި ވަނީ އޭނާގެ އުފަން ރަށުގައި ކުރިއަށް ދިޔަ ފުޓުބޯޅަ މެޗެއް ބެލުމުގެ ތެރެއިންނެެވެ. މެސީ މިވަގުތު ހުރީ އޭނާގެ އާއިލާ އާއެކު، އާޖެންޓީނާގެ ރޮސާރިއޯގައި އެވެ. 

ހޮނިހިރު ދުވަހު އާންމުންގެ ތެރެއިން މެސީ ފެނިފައި ވަނީ އާޖެންޓީނާގެ ހަތަރު ވަނަ ޑިވިޝަން ނުވަތަ، ސީ ލީގުގައި އޭނާގެ އަމިއްލަަ އާއިލާ އިން ހިންގާ ކުލަބެއް ކަމަށްވާ ލިއޯނެސް އެފްސީ އާއި ސެންޓްރަލް ކޯޑޯބާ ބައްދަލު ކުރި މެޗު ބަލަން ގޮސް ހުއްޓައި އެވެ. އެންޓޯނިއޯ ޑި ޖިއާކޯމޯ ސްޓޭޑިއަމް އިން މެސީ ފެނިފައި ވަނީ ކަޅު ކުލައިގެ ހުޑީއެއް ލައިގެން ހުއްޓައި އެވެ. 

ދަނޑުގެ ގޯލުގެ ފަހަތުގައި ހުރި އެކަހެރި ސަރަހައްދެއްގައި މެޗު ބެލުމަށް މެސީ ހުރިއިރު، ގިނަ ބަޔަކަށް އޭނާ ފެނިފައިވެ އެވެ. އަދި ގިނަ ބަޔަކު ވަނީ މެސީގެ ވީޑިއޯ އާއި ފޮޓޯ ނަގައި، ސޯޝަލް މީޑިއާގައި އާންމުކޮށްފައި އެވެ. އެވަގުތު ދަނޑުގައި ތިބި ކުޑަ ކުދިންތަކެއް މެސީގެ ނަމުން އޭނާ އަށް ގޮވާ އަޑު ވެސް އިވެ އެވެ. މެސީ ވަނީ ހިނިތުންވެލައިގެން ހުރެ، ދަނޑުގައި ތިބި މީހުންނަށް އަތުން އިޝާރާތްކޮށްލައިފަ އެވެ. 

އާޖެންޓީނާގައި މިވަގުތު މެސީ ޗުއްޓީ ހޭދަ ކުރަމުން އަންނައިރު، އަންނަ ހަފުތާގައި އެމެރިކާގެ ނޯތު ކެރޮލައިނާގެ ޝާލޮޓްގައި ކުޅުމަށް ހަމަޖެހިފައިވާ އެމްއެލްއެސް އޯލް ސްޓާ މެޗުގައި މެސީ ނުކުޅޭނެ އެވެ. މެސީ ނެތުމަކީ މި މެޗުގެ މާކެޓިން އަށް ލިބޭ ބޮޑު ގެއްލުމަކަށް ވީ ނަމަވެސް، އެ މެޗުގެ ސްކޮޑުގައި މަޝްހޫރު އެހެން ކުޅުންތެރިން ހިމެނެ އެވެ. އޭގެ ތެރޭގައި ލޮސް އެންޖެލެސް އެފްސީގެ ސޮން ހިއުން މިން އާއި ވެންކޫވާ ވައިޓްކެމްޕްސްގެ ތޯމަސް މުލާ ވެސް ހިމެނެ އެވެ. 

އެމެރިކާގެ އިންޓަރ މިއާމީ އަށް ކުޅެމުން އަންނަ މެސީ، އެ ކުލަބުގެ ފަރިތަކުރުންތަކާ ގުޅުމަށް ހަމަޖެހިފައި ވަނީ އޯގަސްޓު މަހުގެ ތެރޭގައި ކަމަށް ރިޕޯޓުތައް ބުނެ އެވެ. މިވަގުތު މެސީ ހުރީ 21 ދުވަހުގެ ޗުއްޓީއެއްގައި ކަމަށާއި، އޭނާ ގެންދަނީ އާއިލާ އާއެކު ވަގުތު ހޭދަ ކުރަމުން ކަމަށް ރިޕޯޓުތައް ބުނެ އެވެ.