ވޯލްޑް ކަޕަށް ފަހު އެނބުރި އައިސް، މިއާމީގައި މެސީ ކުޅުނު ފުރަތަމަ މެޗު އެއްވަރުވެއްޖެ

މޭޖާ ލީގު ސޮކާ (އެމެރިކާާ ލީގު)ގައި ކޮލަމްބަސްއާ ދެކޮޅަށް ކުޅުނު މެޗުން އިންޓަ މިއާމީ އެއްވަރުވެއްޖެ އެވެ.

އާދިއްތަ ދުވަހުގެ ހެނދުނު ކުޅުނު މެޗު ނިމުނީ ދެ ޓީމު 2-2 އިން އެއްވަރު ވެގެންނެވެ. މެޗުގައި މިއާމީ އިން ދެ ފަހަރެއްގެ މަތިން ލަނޑު ޖަހައި ލީޑު ނެގިއިރު ވެސް، ކޮލަމްބަސް އިން ނަތީޖާ ހަމަހަމަ ކުރި އެވެ.

މެޗު ފަށައިގެން 16 ވަނަ މިނެޓުގައި މިއާމީ އަށް ލީޑު ނަގައިދިނީ އުރުގުއޭގެ ލުއިސް ސުއަރޭޒް އެވެ. ނަމަވެސް، ފުރަތަމަ ހާފުގެ 34 ވަނަ މިނެޓުގައި ދާދި ފަހުން މިއާމީ އަށް ބަދަލުވި ބްރެޒިލްގެ ކަސެމީރޯ އަތުން ބައި ކޮޅަށް ވަތް ލަނޑާ އެކު، ކޮލަމްބަސް އަށް މެޗުގެ ނަތީޖާ ވަނީ ހަމަހަމަވެފައި އެވެ.

ދެ ވަނަ ފަހަރަށް މިއާމީ އިން ލީޑު ނެގީ މެޗުގެ ފުރަތަމަ ހާފުގެ އިތުރު ވަގުތުގައި އެވެ. އެ ލަނޑު މިއާމީ އަށް ޖަހައިދިނީ ނޯ އާލެން އެވެ. މެޗުގެ ދެ ވަނަ ހާފު ފަށައިގެން ކުރީ ކޮޅު މިއާމީގެ ކެޕްޓަން މެސީ ވަނީ ކުޅެން ނުކުމެފައި އެވެ. މިއީ މިދިޔަ ޖުލައި މަހު އެމެރިކާގައި ނިމުނު ވޯލްޑް ކަޕަށް ފަހު، މިއާމީގައި މެސީ ކުޅުނު ފުރަތަމަ މެޗެވެ.

މެޗުގެ ފުރިހަމަ ވަގުތު ހަމަވާން ހަ މިނެޓަށް ވެފައި ވަނިކޮށް، ކޮލަމްބަސް އިން ވަނީ ދެ ވަނަ ފަހަރަށް ލަނޑު ޖަހައި ނަތީޖާ ހަމަހަމަ ކޮށްފައި އެވެ. އެ ލަނޑު އެ ޓީމަށް ޖަހައިދިނީ ބްރައިސް މެންޑޭޒް އެވެ. މެޗުގައި އިތުރު ލަނޑު ޖަހަން މިއާމީ އިން މަސައްކަތް ކުރި ނަމަވެސް، އެކަން ކާމިޔާބެއް ނުވި އެވެ.

މެޗު އެއްވަރުވީއިރު މިއާމީ އޮތީ ލީގު ތާވަލްގެ ދެ ވަނައިގައި އެވެ. އެއީ މިހާތަނަށް އެ ޓީމު ކުޅެފައިވާ 18 މެޗުން 38 ޕޮއިންޓާ އެކު އެވެ. ހަމަ އެ އަދަދަށް މެޗު ކުޅެގެން އެއް ވަނައިގައި ނޭޝްވީލް އަށް ލިބެނީ 40 ޕޮއިންޓެވެ.