ނައިޖީރިއާ ގައި އެއްފަހަރާ 1،500 ކައިވެނިކޮށްފި

ނައިޖީރިއާގެ އުތުރުގެ ސިޓީއެއް ކަމަށްވާ ކާނޯގައި، އެކުގައި 1،500 ކައިވެނިކުރުމަށް ބޭއްވި ބޮޑު ހަފުލާއާއެކު، ވޭތުވެދިޔަ ހަފުތާގައި އެ ސިޓީއަށް ވަނީ އުފާވެރިކަމާއި ކުލަގަދަ ދިރުމެއް އައިސްފަ އެވެ.

މިދިޔަ ދުވަސްތަކުގައި އެ ސިޓީގެ މަގުތަކުން ފެނިގެންދިޔައީ، ކައިވެނިކުރާ ޖޯޑުތަކާއި އެމީހުންގެ އާއިލާތަކުން ހެދުންތައް ތައްޔާރުކުރުމާއި، މި މުނާސަބަތާ ގުޅިގެން ރޭވިފައިވާ އެކި ހަރަކާތްތަކުގައި ބައިވެރިވަމުންދިޔަ މަންޒަރުތަކެވެ.

މިދިޔަ ހުކުރު ދުވަހު، ރަތް ކުލައިގެ ބޮލު ފޮތި ނުވަތަ ހިޖާބު އަޅައިގެން ތިބި އަލަތު އަނބިންނާއި، އެއާ ގުޅޭ ރަތް ތޮތްޕާއި ހުދު ކުލައިގެ ހެދުން އަޅައިގެން ތިބި ފިރިހެނުން  ވަނީ، އެ ސިޓީގެ މުސްލިމުންގެ ދީނީ އަދި ސަގާފީ ލީޑަރު ކަމަށްވާ "އަމީރު" ގެ ގަނޑުވަރަށް ޒިޔާރަތްކޮށްފަ އެވެ. އެތަނުގައި ބޭއްވުނު ރަސްމީ ހަފުލާގައި އެ އެންމެން ވަނީ ރަސްމީކޮށް ކައިވެނީގެ ގޮތުން ގުޅިފަ އެވެ.

ކައިވެނީގެ މި އުފާވެރި ހަރަކާތްތައް ނިންމާލުމުގެ ގޮތުން ހޮނިހިރު ދުވަހު ވަނީ، ގަވަރުނަރު އައްބާ ކަބީރު ޔޫސުފް ކައިވެނީގެ ހެނދުނުގެ ނާސްތާއެއް ބާއްވާފަ އެވެ. މި ހަފުލާގައި ގަވަރުނަރު ވަނީ އަލަތު ކައިވެނިކުރި ކުރި މީހުންނަށް ބަރަކާތައް އެދިވަޑައިގެންފަ އެވެ.

ކާނޯ ސްޓޭޓް ސަރުކާރުން އިސްނަގައިގެން ކުރިއަށްގެންދިޔަ މި މަޝްރޫއަށް 1.5 ބިލިއަން ނައިރާ (1 މިލިއަން ޑޮލަރު ނުވަތަ 815،000 ޕައުންޑް) ހޭދަކޮށްފައިވެ އެވެ. މި ފައިސާ ހޭދަކޮށްފައިވަނީ ކައިވެނިކުރި މީހުންނަށް އެހީތެރިވުމުގެ ގޮތުން، ކައިވެނީގެ ރަން ދިނުމަށާއި، އެމީހުން އަލަށް ދިރިއުޅެން ފަށާ ގޭގެ ފަރުނީޗަރު ހޯދައިދިނުމަށެވެ.

މި ސްކީމަކީ ކައިވެނިކުރުމަށް ބޭނުންވާ ބޮޑެތި ޚަރަދުތައް އަމިއްލައަށް ހަމަޖެއްސުމުގެ މާލީ ތަނަވަސްކަން ނެތް، އާމްދަނީ މަދުން ލިބޭ މީހުންނަށް އަމާޒުކޮށްގެން ހިންގާ ޕްރޮގްރާމެކެވެ.

ކޮންމެ އަހަރަކު ބާއްވާ މި ހަރަކާތް އެންމެ ފުރަތަމަ ފެށީ 2012 ވަނަ އަހަރު އޭރު ހުންނެވި ގަވަރުނަރެވެ. އެ އަހަރު 100 ކައިވެނި އަމީރުގެ ގަނޑުވަރުގައި ކުރިއިރު، އޭގެ ތެރޭގައި ގިނައީ ހުވަފަތްވެފައިވާ އަންހެނުންނާއި ވަރިވެފައިވާ މީހުންނެވެ.

އޭގެ ފަހުން އައި ގަވަރުނަރުންގެ ދައުރުގައި ވެސް މިގޮތަށް ގިނަ ބަޔަކު އެކުގައި ކައިވެނިކުރުމުގެ ހަރަކާތްތައް ކުރިއަށް ގެންގޮސްފައިވެ އެވެ. އަދި މިކަމަށް އޮތް ތަރުހީބު ބޮޑުވެ، އެއްފަހަރާ ކައިވެނިކުރާ މީހުންގެ އަދަދު އަހަރަކަށްވުރެ އަހަރެއް އިތުރުވަމުން ގޮސް، ގިނަ އަނބިން ހޯދާ ކައިވެނިތައް ވެސް މިހާރު މި ޕްރޮގްރާމުގައި ހިމެނެ އެވެ. މި ސްކީމަށް އޮތް މަގުބޫލުކަން ބޮޑުކަމުން، މިއަހަރު އެކަނިވެސް 5،000 ޖޯޑަކު ވަނީ ބައިވެރިވުމަށް އެދި ހުށަހަޅާފަ އެވެ.

މި ހަރަކާތް އަބަދުވެސް ބަލަހައްޓަނީ އެ ސިޓީގެ އިސްލާމީ ފުލުހުންގެ ފައުޖު ކަމަށްވާ "ހިސްބާ" އިންނެވެ. އެމީހުންގެ އެންމެ މުހިންމު އެއް މަސައްކަތަކީ ކައިވެނިކުރަން އެދޭ މީހުންގެ ކަންކަން ބަލައި، އެއީ އެކަމަށް ޝަރުތު ހަމަވާ ބައެއްތޯ ކަށަވަރުކުރުމެވެ.

ކާނޯއަކީ މުސްލިމުންގެ އަޣުލަބިއްޔަތު އޮންނަ ސިޓީއަކަށް ވުމުން، އެ ސްޓޭޓުގައި އާންމު ގާނޫނީ ނިޒާމުގެ އިތުރުން އިސްލާމީ ޝަރީއަތް ވެސް ހިނގަ އެވެ.

ހިސްބާގެ ޑެޕިއުޓީ ކޮމާންޑަރ-ޖެނެރަލް މުޖާހިދު އަމީނުއްދީން ވިދާޅުވި ގޮތުގައި، ކައިވެނިކުރަން އެދޭ މީހުން ސްކްރީން ކުރުމަކީ ފަސޭހަ މަސައްކަތެއް ނޫނެވެ.

"ކައިވެނިކުރަން ހުށަހަޅާ ޖޯޑަކާ މެދު އެއްވެސް ޝައްކެއް އުފެދޭ ކަމެއް ނުވަތަ އޮޅުވާލުމެއް އުޅޭކަން އެނގިއްޖެ ނަމަ، އަޅުގަނޑުމެން އެމީހުން ޑިސްކޮލިފައި ކުރަން،" އޭނާ ބީބީސީއަށް މައުލޫމާތު ދެއްވަމުން ވިދާޅުވި އެވެ.

އޭނާ ވިދާޅުވި ގޮތުގައި، ބައެއް ޖޯޑުތަކުން ސަރުކާރުން ދޭ އިނާޔަތްތައް ހޯދުމުގެ ބޭނުމުގައި، އެމީހުންނަކީ ހަގީގީ ލޯބީގެ ގުޅުމެއް އޮތް ބައެއްކަން ކަމާބެހޭ ފަރާތްތަކަށް ދެއްކުމަށްޓަކައި ވަރަށް ބޮޑަށް މަސައްކަތް ކުރެ އެވެ. މި ޕްރޮގްރާމުގައި ބައިވެރިވާ ކޮންމެ ޖޯޑަކަށް ސަރުކާރުން ގާތްގަނޑަކަށް 1 މިލިއަން ނައިރާ (735 ޑޮލަރު ނުވަތަ 544 ޕައުންޑް) ހޭދަކުރެ އެވެ.

ހިސްބާއިން މައުލޫމާތު ދޭ ގޮތުގައި، ކޮންމެ ޖޯޑަކަށް ލިބޭ އެހީގެ ތެރޭގައި އާ ގެއެއް ބިނާކުރުމަށް ބޭނުންވާ ޒަރޫރީ ސާމާނު ހިމެނެ އެވެ. އޭގެ ތެރޭގައި އެނދު، ގޮދަޑި، ބެޑްޝީޓް، ބާލީސް، ފަރުނީޗަރު އަދި ކާބޯތަކެތީގެ ސާމާނު ހިމެނެ އެވެ.

މީގެ އިތުރުން، ކޮންމެ އަލަތު އަނތްބަކަށް ރަނުގެ ގޮތުގައި 100،000 ނައިރާ ލިބޭއިރު، ކައިވެންޏަށްފަހު އަމިއްލަ ފައިމައްޗަށް ތެދުވުމަށް އެހީތެރިވުމުގެ ގޮތުން ކުދި ވިޔަފާރި ފެށުމަށް އިތުރު 100،000 ނައިރާގެ ރައުސްމާލު ވެސް ސަރުކާރުން ފޯރުކޮށްދެ އެވެ.

މި ޕްރޮގްރާމުގައި ބައިވެރިވުމުގެ ހުއްދަ ދިނުމުގެ ކުރިން، ކައިވެނިކުރަން އެދޭ ހުރިހާ ޖޯޑުތަކަކުން ސިއްހީ ފުރިހަމަ ޓެސްޓުތަކެއް ހަދަންޖެހެ އެވެ. އޭގެ ތެރޭގައި އެޗް.އައި.ވީ، ހެޕަޓައިޓިސް، މާބަނޑުތޯ ބެލުމުގެ ޓެސްޓު އަދި ޖެނޮޓައިޕް ދިމާވޭތޯ ބަލާ ޓެސްޓުތައް ހިމެނެ އެވެ.

އަމީނުއްދީން ހާމަކުރެއްވި ގޮތުގައި، ބައެއް ޖޯޑުތަކުން ސިއްހީ ޓެސްޓުތަކުގެ ނަތީޖާއަށް ބަދަލު ގެނެސްފައިވާކަން އެނގުމުން، އެމީހުން ވަނީ ޕްރޮގްރާމުން ވަކިކޮށްފަ އެވެ.

އެއް ހާދިސާއެއްގައި، މި ސްކީމުގެ ފައިދާ ހޯދުމުގެ ބޭނުމުގައި، އަންހެނަކު އޭނާގެ އަމިއްލަ ބޭބެއަކީ އޭނާގެ ވާން އުޅޭ ފިރިމީހާ ކަމަށް ދައްކައިގެން ކައިވެނިކުރަން މަސައްކަތް ކުރިކަން ވަނީ ފަޅާއަރާފަ އެވެ.

މި ހަރަކާތްތައް ރިޕޯޓުކުރާތާ އަހަރުތަކެއް ވެފައިވާ އެ ސަރަހައްދުގެ ނޫސްވެރިއެއް ކަމަށްވާ ޔޫސުފް އަލީ އަބްދުﷲ ބުނި ގޮތުގައި، ނައިޖީރިއާގެ އިގްތިސާދީ ހާލަތު ދަށްވުމުގެ ސަބަބުން މިއަހަރު މި ޕްރޮގްރާމުގައި ބައިވެރިވާން އެދޭ މީހުންގެ މެދުގައި އޮތް ކަންބޮޑުވުން ވަނީ އިތުރުވެފަ އެވެ.

"އަޅުގަނޑުމެން އެންމެންނަށް އެނގޭ ފަދައިން، ކައިވެނިކުރުމަކީ ބޮޑު ޚަރަދެއް ހިނގާ ކަމެއް. އަދި މިވަގުތު ގައުމުގެ އިގްތިސާދީ ހާލަތު އޮތީ އެހާ ރަނގަޅަކަށް ނޫން،" އޭނާ ބީބީސީއަށް ކިޔައިދިނެވެ.

"މީގެ ސަބަބުން، މި ލިސްޓުގައި ހިމެނުމަށްޓަކައި ބައެއް މީހުން ކޮންމެ ފަދަ ކަމެއްވެސް ކުރަން ތައްޔާރަށް ތިބޭ." އޭނާ ބުނި ގޮތުގައި، ކުރިން ކައިވެނިކޮށްގެން އުޅޭ ދެމަފިރިއަކު ވެސް، އަލަށް ކައިވެނިކުރަން އުޅޭ ބައެއްގެ ގޮތުގައި ހުށަހަޅައިގެން އުޅެނިކޮށް ފަޅާއަރައި، ޕްރޮގްރާމުން ވަނީ ބޭރުކޮށްފަ އެވެ.

ހޮނިހިރު ދުވަހުގެ ކައިވެނީގެ ބޮޑު ސަޔަށްފަހު، ކައިވެނިކުރި ފަރާތްތަކަށް ގޭތެރޭގެ ސާމާނު ހަވާލުކުރުމުގެ މަސައްކަތް ވަނީ ފަށާފަ އެވެ.

އަލަތު ކައިވެނިކުރި މިހާރު މިހާރު ބުރަކޮށް އުޅެމުންދަނީ އެމީހުންގެ އާ ދިރިއުޅުން އެކުގައި ބިނާކުރުމުގެ މަސައްކަތުގަ އެވެ.