މެކްސިކޯގެ މޭޔަރަކު ކިނބުލަކާ ކައިވެނި ބައްލަވައިގެންފި

މެކްސިކޯގެ ކުޑަ ޓައުނެއްގެ މޭޔަރު،  ކުލަގަދަ ރަސްމިއްޔާތެއްގައި ކިނބުލަކާ ކައިވެނި ބައްލަވައިގެންފި އެވެ.

"ލިޓްލް ޕްރިންސަސް" ނުވަތަ ތުއްތު އަމީރާގެ ނަމުން ނަންދީފައިވާ އުމުރުން ހަތް އަހަރުގެ މި ކިނބުލާ މޭޔަރު ކައިވެނި ބައްލަވައިގަތީ އެ ރަށުގެ ރައްޔިތުންނަށް ނަސީބާއި ކާމިޔާބީ ލިބޭނެ ކަމަށް ގަބޫލުކުރެވޭތީ ކަމަށްވެ އެވެ.

ސަން ޕެޑްރޯ ހުއާމެލޫލާގެ މޭޔަރު ވިކްޓަރ ސޯސާ މި ކިނބުލާ ކައިވެނި ބެއްލެވުމަކީ، އިންސާނުންނާއި އެމީހުންގެ ކަނލާގެ އާ ދެމެދު އޮންނަ ގުޅުން ރަމްޒުކޮށްދޭ ކަމެއް ކަމަށް އެ ރަށުގެ މީހުން ގަބޫލުކުރެ އެވެ.

މި އާދަކާދައަކީ މެކްސިކޯގެ އޮއަކްސާކާ ސްޓޭޓްގެ "ޗޮންޓަލް" އަދި "ހުއާވޭ" ދަރިކޮޅުގެ މީހުންގެ މެދުގައި، ސްޕޭނު މީހުން އެ ގައުމަށް އައުމުގެ އެތައް ގަރުނެއް ކުރިން ފެށިގެން އޮންނަ ސަގާފީ ކަމެކެވެ.

މި ގަދީމީ އާދަކާދަ ފުރިހަމަ ކުރުމަށް، ކިނބޫ އޮންނަނީ ރީތި ހުދުކުލައިގެ ކައިވެނީގެ ހެދުމެއް ލައްވާފަ އެވެ.

މިދިޔަ ހުކުރު ދުވަހު ބޭއްވި މި ރަސްމިއްޔާތުގައި ކިނބުލަށް ކައިވެނީގެ ހެދުން ލެއްވުމުގެ  ޒިންމާއާ ހަވާލުވެ ހުރީ އޮލީވިއާ ޕެރޭޒް ނަމަކަށް ކިޔާ މީހެކެވެ.

އޮލީވިއާ ބުނި ގޮތުގައި، އެމީހުންނަށް މި ކިނބުލަކީ ވަރަށް މުހިންމު އެއްޗެކެވެ. އެއީ އެ ކިނބުލަކީ އެ ސަރަހައްދަށް ފެނާއި، ރަނގަޅު ދަނޑުވެރިކަމާއި، ވާރޭ ގެނެސްދޭ އަމީރާއެއް ކަމަށާއި، އޭގެ ސަބަބުން ކާބޯތަކެއްޗާއި، މަހާއި، އުފެއްދުންތައް ކަނލާގެ މިންވަރުކޮށްދެއްވާނެ ކަމަށް އޭނާ ކިޔައިދިނެވެ.

ކައިވެނީގެ މި ރަސްމިއްޔާތުގައި، ރަށުގެ ފިރިހެނުން އެމީހުންގެ ތޮފިތަކުން ކިނބުލަށް ވިހެމުން ގެންދިޔައިރު، ރަށުގެ ރައްޔިތުން ވަނީ ކިނބޫ އަތްމައްޗަށް ލައިގެން ރަށުގެ މަގުތަކުގައި ހިނގާފަ އެވެ.

މީގެ އިތުރުން، ބައެއް މީހުން ވައިގެ ތެރެއަށް މަސް ހިފަން ގެންގުޅޭ ދާ އުކައި، ކަކޫމައްޗަށް ތިރިވެ، މަސްވެރިކަން ރަނގަޅުކޮށްދިނުމަށް އެދި ކިނބުލުގެ ކައިބައިން އާދޭސްކޮށްފައިވެ އެވެ.