އެފްރިކާގެ މޮޅު ކުޅުންތެރިޔަކަށް ހޮވުނީ ނައިޖީރިރާގެ ލުކްމަން

އެފްރިކާގެ މޮޅު ފުޓުބޯޅަ ކުޅުންތެރިޔަކަށް، އެޓަލަންޓާ އަށް ކުޅެމުން އަންނަ ނައިޖީރިއާގެ ފޯވާޑު އަޑެމޯލާ ލުކްމަން ހޮވިއްޖެ އެވެ.

އެފްރިކާގެ ފުޓުބޯޅައިގެ މައި އިދާާރާ (ކާފް) އިން ހޮވާ އަހަރުގެ މޮޅު ކުޅުންތެރިޔާގެ މަގާމު ލުކްމަން ހޯދީ އައިވަރީ ކޯސްޓުގެ ސިމޯން އަޑިންގްރާ، ދެކުނު އެފްރިކާގެ ރޮންވެން ވިލިއަމްސް، ގިނީގެ ސާހޫ ގުރާސީ އަދި މޮރޮކޯގެ އަޝްރަފް ޙަކީމީއާ ވާދަކޮށެވެ.

އެފްރިކާގެ މޮޅު ކުޅުންތެރިޔަކަށް ލުކްމަން ހޮވުނުއިރު، އޭނާ އަންނަނީ މޮޅު ކުޅުމެއް ދައްކަމުންނެވެ. މިދިޔަ ސީޒަންގައި އޭނާ ވަނީ އެޓަލަންޓާ އަށް ކުޅެދިން 15 މެޗުގައި 17 ލަނޑު ޖަހައިފަ އެވެ. މީގެ އިތުރުން އެ ކުލަބާ އެކު އޭނާ ވަނީ ޔުއެފާ ޔޫރޮޕާ ލީގު ކާމިޔާބު ކޮށްފަ އެވެ.

ކުލަބުގެ އިތުރުން ޤައުމީ ޓީމުގައި ވެސް ލުކްމަން ވަނީ މޮޅު ކުޅުމެއް ދައްކައިފަ އެވެ. މިދިޔަ އަހަރު އޭނާ ވަނީ ނައިޖީރިއާ އާއެކު އެފްރިކަން ކަޕް އޮފް ނޭޝަންސްގެ ފައިނަލްގައި ވެސް ވާދަކޮށްފަ އެވެ. އެ މުބާރާތުގެ ފައިނަލްގައި ނައިޖީރިއާ އަށް ނާކާމިޔާބު ވެފައި ވަނީ، އައިވަރީ ކޯސްޓު އަތުން ބަލިވެފަ އެވެ. އެ މުބާރާތުގެ އެންމެ މޮޅު 11 ކުޅުންތެރިންގެ ތެރޭގައި ވެސް އޭނާ ވަނީ ހިމެނިފަ އެވެ.

މިހާރު ކުރިއަށް ދާ ސީޒަންގައި ވެސް ލުކްމަން އަންނަނީ އެޓަލަންޓާ އާއެކު މޮޅު ކުޅުމެއް ދައްކަމުންނެވެ. މި ސީޒަންގެ މިހާތަނަށް އޭނާ ވަނީ އެޓަލަންޓާ އަށް ކުޅެދިން 19 މެޗުގައި 11 ލަނޑު ޖަހައިފަ އެވެ. މިވަގުތު އެޓަލަންޓާ އޮތީ ވެސް ލީގު ތާވަލްގެ އެއް ވަނަ މަގާމުގަ އެވެ.