ނައިޖީރިއާގެ މިސްކިތެއްގައި ބޮމެއް ގޮއްވުމުގެ ހާދިސާގައި ހަތް މީހަކު މަރުވެއްޖެ

ނައިޖީރިއާގެ އުތުރު ހުޅަނގު ސިޓީއެއްގެ މިސްކިތެއްގައި ބޮމެއް ގޮވުމުގެ ހާދިސާގައި ހަތް މީހަކު މަރުވެއްޖެ އެވެ. 

ނައިޖީރިއާގެ އަސްކަރިއްޔާ އިން ހާމަ ކޮށްފައިވާ ގޮތުގައި މި ހާދިސާ ހިނގާފައި ވަނީ ބުދަ ދުވަހުގެ މަޣްރިބު ނަމާދު ވަގުތުގަ އެވެ. އެ ހަމަލާގެ ޒިންމާ މިހާތަނަށް އެއްވެސް ބަޔަކު އުފުލާފައި ނުވެ އެވެ.

އެކަމާ ގުޅިގެން މައުލޫމާތު ދެމުން އެންޓި އެކްސްޓްރިމިސްޓް މިލިޝިއާގެ ލީޑަރު ބަބަކުރާ ކޮލޯ ބުނީ، އެއީ ބޮމެއް ގޮއްވާލައިގެން ދިން ހަމަލާއެއް ކަމަށް ބެލެވިފައިވާ ކަމަށެވެ. 

މިސްކިތުގެ ލީޑަރުންގެ ތެރޭގައި ހިމެނޭ މަލަލް އަބޫ ޔޫސުފް ބުނެފައިވާ ގޮތުގައި، އެ ހަމަލާގައި އަށް މީހަކު މަރުވެފައިވެ އެވެ. ނަމަވެސް، ރަސްމީ އިދާރާ ތަކުން ސީދާ އަދަދެއް ހާމަ ކޮށްފައި ނުވާއިރު، ކޮލޯ ބުނީ މަރުވެފައި ވަނީ ހަތް މީހުން ކަމަށެވެ. 

ކޮލޯ ބުނީ އެ ބޮން ގޮއްވާލާފައި ވަނީ މިސްކިތުގެ އެތެރޭގައި ބަހައްޓައިގެން ކަމަށާއި، ބެލެވޭ ގޮތުގައި ބޮން ގޮވާފައި ވަނީ ނަމާދު ކުރަން ފެށިތާ ކުޑަ ވަގުތު ކޮޅެއްގެ ތެރޭގައި ކަމަށެވެ. ބައެއް ފަރާތްތަކުން ބުނެފައިވާ ގޮތުގައި އެއީ ސުއިސައިޑް ބޮމުގެ ހަމަލާއެއް ކަމަށް ބެލެވެ އެވެ. 

އެ ހަމަލާގައި ޒަޚަމުވެފައިވާ މީހުންގެ އަދަދު ކަށަވަރުވެފައި ނުވެ އެވެ. ނަމަވެސް،  މޫސާ ޔުޝާއު ނަމަކަށް ކިޔާ މީހަކު އޭއެފްޕީ އަށް މައުލޫމާތު ދެމުން ބުނީ، އަނިޔާވެގެން އެތައް ބަޔަކު ފަރުވާ ދިނުމަށް ގެންދިޔަ މަންޒަރު ފެނުނު ކަމަށެވެ. އާންމުވެފައިވާ ވީޑިއޯ ތަކުގައި ލެއިން ފޯވެފައިވާ މީހަކު ބިން މަތީގައި އޮންނަ މަންޒަރު ފެންނައިރު، މަރުވި މީހުންގެ ހަށިގަނޑުތައް ނިވާ ކޮށްފައިވާ މަންޒަރު ވެސް ފެނެ އެވެ. 

ބޮން ގޮއްވާލި މިސްކިތް ހުރީ މައިދުގުރީގަ އެވެ. އެއީ ބޮރްނޯ ސްޓޭޓްގެ ވެރި ރަށް ކަމަށްވާއިރު، އެ ސަރަހައްދުގައި ބޯކޯ ހަރާމް އަދި އިސްލާމިކް ސްޓޭޓް ވެސްޓް އެފްރިކާ ޕްރޮވިންސް ފަދަ ހަތިޔާރުވެފައި ޖަމާއަތް ތަކުން ދިގު މުއްދަތެއް ވަންދެން ޙަރަކާތްތެރި ވަމުން އާދެ އެވެ. މި ސިޓީގައި ބޮޑެތި ހަމަލާ ތަކެއް ނުހިނގާތާ ވެސް ގިނަ އަހަރު ތަކެއް ވެއްޖެ އެވެ. 

ނައިޖީރިއާގައި 2009 ވަނަ އަހަރުން ފެށިގެން ހަތިޔާރުވެރި ޖަމާއަތް ތަކުގެ ޙަރަކާތްތައް ހިންގަމުން އަންނައިރު، އެ ފަރާތްތަކުގެ ހަމަލާގައި މަދުވެގެން 40،000 މީހުން މަރުވެފައިވާއިރު، ދެ މިލިއަން މީހުން އުތުރު ހުޅަނދު ސަރަހައްދުން ބަދަލުވެފައިވާ ކަމަށް އދ އިން ވަނީ ބުނެފަ އެވެ. 

މި އަނިޔާވެރި އަމަލުތައް މީގެ ދިހަ އަހަރު ކުރިން އޮތް މިންވަރަށް ވުރެ މިހާރު ދަށްވެފައިވާއިރު، މި ހަނގުރާމަ ވަނީ ކައިރި ޤައުމު ތަކަށް ވެސް ފެތިރިގެން ގޮސްފަ އެވެ. އެގޮތުން ނައިޖަރު، ޗާޑް އަދި ކެމަރޫން ފަދަ ޤައުމު ތަކަށް ވެސް އެކަން ވަނީ ފެތުރިފަ އެވެ.