ނައިޖީރިއާގައި ހަތިޔާރު އެޅި ބަޔަކު ހަމަލާދީ 20 މީހުން މަރުވެއްޖެ

ނައިޖީރިއާގެ މެދުތެރޭގެ ސްޓޭޓެއް ކަމަށްވާ ޕްލެޓޯ ސްޓޭޓަށް ހަތިޔާރު އެޅި ބަޔަކު ދިން ހަމަލާއެއްގައި މަދުވެގެން 20 މީހުން މަރުވެފައިވާ ކަމަށް އެ ގައުމުގެ ފުލުހުން އަންގާރަ ދުވަހު ރިޕޯޓްކޮށްފިއެވެ.

މި ހަމަލާ ދީފައިވަނީ އާދީއްތަ ދުވަހުގެ ފަތިހުގެ ވަގުތެއްގައި، ބޮކޯސް ލޯކަލް ގަވަރމަންޓް އޭރިއާގެ މުޝެރޭ ޑިސްޓްރިކްޓްގައި ހިމެނޭ ކަވެލް އަވަށުގައެވެ. ފުލުހުން ބުނި ގޮތުގައި ފަތިހު 4:40 ހާއިރު ހަތިޔާރު އެޅި ގްރޫޕަކުން އެ އަވަށަށް އަރައި ދިން މި ހަމަލާގައި ގިނަ ބަޔަކު ވަނީ މަރުވެފައެވެ.

މި ހަމަލާގެ ރިޕޯޓް ލިބުމާއެކު، ޕްލެޓޯ ސްޓޭޓް ޕޮލިސް ކޮމާންޑާއި ވަޔަލަންޓް ކްރައިމް ރެސްޕޮންސް ޔުނިޓްގެ އޮފިސަރުން ހިމެނޭހެން ސަލާމަތީ ބާރުތައް ވަނީ އެ ސަރަހައްދަށް ގޮސްފައެވެ. ކަމާބެހޭ ފަރާތްތަކުން ބުނި ގޮތުގައި ހަމަލާދިން މީހުން ވަނީ ސަލާމަތީ ބާރުތަކާ ކުރިމަތިލައި ބަޑީގެ ހަމަލާތަކެއް ބަދަލުކުރުމަށްފަހު އެ ސަރަހައްދުން ފިލާފައެވެ.

ހަމަލާ ދިން ސަރަހައްދުން 18 މީހަކު މަރުވެފައި އޮއްވާ ފެނިފައިވާއިރު، އަނިޔާވި ތިން މީހަކު ވަނީ ހޮސްޕިޓަލަށް ގެންގޮސްފައެވެ. ފުލުހުން ބުނީ ހޮސްޕިޓަލަށް ގެންދިޔަ މީހުންގެ ތެރެއިން ދެ މީހަކު މަރުވެފައިވާ ކަމަށް ޑޮކްޓަރުން ކަށަވަރުކޮށްދީފައިވާ ކަމަށާއި، އެހެންކަމުން މި ހާދިސާގައި މަރުވި މީހުންގެ ޖުމްލަ އަދަދު މިހާރު 20 އަށް އަރާފައިވާ ކަމަށެވެ.

މި ހަމަލާ ދޭންޖެހުނު ސަބަބެއް އަދި މިހާތަނަށް ސާފުވެފައެއް ނުވެއެވެ. އަދި އެއްވެސް ޖަމާއަތަކުން މި ހަމަލާގެ ޒިންމާ އުފުލާފައެއް ނުވެއެވެ.

މި ހާދިސާއާ ގުޅިގެން ޕްލެޓޯ ސްޓޭޓްގެ ޕޮލިސް ކޮމިޝަނަރު ބާސީ އީވާ ވަނީ، ހަމަލާދިން ސަރަހައްދުގެ ސަލާމަތީ ކަންކަން ވަރުގަދަކުރުމަށްޓަކައި އިތުރު ޓެކްޓިކަލް ޔުނިޓްތަކާއި މޮބައިލް ޕޮލިސް ފައުޖުތައް އެ ސަރަހައްދަށް ފޮނުވުމަށް އަމުރުކުރައްވާފައެވެ.

ހުޅަނގު އެފްރިކާގެ ގައުމެއް ކަމަށްވާ ނައިޖީރިއާއަކީ ކުށްކުރާ ގްރޫޕްތަކާއި ހަރުކަށި ފިކުރުގެ ޖަމާއަތްތަކުގެ ނުރައްކާ ބޮޑު ގައުމެކެވެ. މިފަދަ ގްރޫޕްތަކުން އާންމުކޮށް މީހުން ރަހީނުކޮށް ފައިސާއަށް ޑިމާންޑް ކުރެއެވެ. މި މައްސަލަ ދުނިޔޭގެ ސަމާލުކަމަށް ބޮޑަށް އައީ 2014 ވަނަ އަހަރު ބޯކޯ ހަރާމްގެ ހަނގުރާމަވެރިން ބޯނޯ ސްޓޭޓްގެ ޗިބޮކްއިން އެތައް ސަތޭކަ އަންހެން ކުދިންނެއް ވަގަށް ނެގި ހާދިސާއާ ގުޅިގެންނެވެ.

މީގެ އިތުރުން، ނައިޖީރިއާގެ ޑިފެންސް ހެޑްކުއާޓާސްއިން ހޮނިހިރު ދުވަހު ހާމަކުރި ގޮތުގައި، ހަތިޔާރު އެޅި ބަޔަކު ރަހީނުކޮށްފައި ހުރި ރިޓަޔަރޑް މޭޖަރ ޖެނެރަލް ރާބޭ އަބޫބަކުރު ވަނީ ބަންދުގައި ހުއްޓާ މަރުވެފައެވެ.

އަދި މިދިޔަ މަހު ބޯނޯ ސްޓޭޓްގެ ސްކޫލަކަށް ބޯކޯ ހަރާމްގެ ހަނގުރާމަވެރިން ކަމަށް ބެލެވޭ ބަޔަކު ވަދެ، 40 އަށްވުރެ ގިނަ ދަރިވަރުން ވަނީ ވަގަށް ނަގާފައެވެ. މަދަނީ ޖަމިއްޔާތަކުން ބުނި ގޮތުގައި ހަމަލާދިން މީހުން ސްކޫލަށް ވަދެގަތީ ކިޔަވައިދެމުން ދަނިކޮށެވެ. އެ ވަގުތު އެތައް ދަރިވަރުންނެއް ވަނީ ފިލުމަށްޓަކައި ކައިރީގައި އޮތް ޖަންގަލި ތެރެއަށް ވަދެފައެވެ.

ޓެރަރިޒަމާއި ހަތިޔާރު އެޅި ހަމަލާތަކުގެ ނުރައްކާ އޮތުމުގެ ސަބަބުން، އެމެރިކާގެ ސްޓޭޓް ޑިޕާޓްމަންޓުން ވަނީ މިދިޔަ އޭޕްރިލް މަހު ނައިޖީރިއާގެ އުތުރާއި މެދުތެރޭގެ ސްޓޭޓްތަކަށް ދަތުރު ނުކުރުމަށް އިލްތިމާސްކޮށްފައެވެ.