އެފްކޮން: ނައިޖީރިއާ އާއި މިޞްރު ސެމީ ފައިނަލަށް

މިހާރު ކުރިއަށްދާ އެފްރިކަން ކަޕް އޮފް ނޭޝަންސްގެ ކުއާޓާ ފައިނަލްގައި ކުޅުނު މެޗު ތަކުން މޮޅުވެ، ނައިޖީރިއާ އާއި މިޞްރުން މުބާރާތުގެ ސެމީ ފައިނަލްގެ ޖާާގަ ހޯދައިފި އެވެ.

ހޮނިހިރު ދުވަހުގެ ރޭ ކުޅުނު ތިން ވަނަ ކުއާޓާ ފައިނަލްގައި ނައިޖީރިއާ ނިކުތީ އަލްޖީރިއާއާ ދެކޮޅަށެވެ. އެ މެޗުގައި ނައިޖީރިއާ އިން ވަނީ 2-0 އިން އަލްޖީރިއާގެ މައްޗަށް ކުރި ހޯދައިފަ އެވެ. މެޗުގައި ނައިޖީރިއާ އިން އެ ޓީމުގެ ދެ ލަނޑު ވެސް ޖެހީ މެޗުގެ ދެ ވަނަ ހާފުގަ އެވެ.

މެޗުގެ ދެ ވަނަ ހާފު ފަށައިގެން ދެ ވަނަ މިނެޓުގައި ނައިޖީރިއާ އަށް ލީޑު ނަގައިދިނީ ވިކްޓާ އޮސީމެން އެވެ. އޭގެ ފަހުން މެޗުގެ 57 ވަނަ މިނެޓުގައި ނައިޖީރިއާގެ އަކޯރް އެޑަމްސް ވަނީ އެ ޓީމުގެ ދެ ވަނަ ލަނޑު ޖަހައި ލީޑު ފުޅާ ކޮށްފަ އެވެ.

މުބާރާތުގެ ސެމީ ފައިނަލްގައި ނައިޖީރިއާ ނިކުންނާނީ މޮރޮކޯއާ ދެކޮޅަށެވެ.

ހޮނިހިރު ދުވަހުގެ ރޭ ދަންވަރު ކުޅުނު ހަތަރު ވަނަ ކުއާޓާ ފައިނަލްގައި މިޞްރުން ވަނީ 3-2 އިން އައިވަރީ ކޯސްޓުގެ މައްޗަށް ކުރި ހޯދައިފަ އެވެ. މެޗުގެ ފުރަތަމަ ހާފުގައި މިޞްރުން ދެ ލަނޑު ޖެހިއިރު، އައިވަރީ ކޯސްޓުން އެއް ލަނޑު ޖެހި އެވެ. އަނެއް ލަނޑު މިޞްރުން ދެ ވަނަ ހާފުގައި ޖެހިއިރު، މި ހާފުގައި އައިވަރީ ކޯސްޓުން ވެސް ލަނޑެއް ޖެހި އެވެ.

މެޗު ފަށައިގެން ހަތަރު ވަނަ މިނެޓުގައި މިޞްރަށް ލީޑު ނަގައިދިނީ އޮމަރު މާމޫޝް އެވެ. އޭގެ ފަހުން ފުރަތަމަ ހާފުގެ 32 ވަނަ މިނެޓުގައި ރަމީ ރަބީއާ ވަނީ ލަނޑު ޖަހައި މިޞްރުގެ ލީޑު ފުޅާ ކޮށްފަ އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ މުޙައްމަދު ޞަލާޙު އެވެ. 

އޭގެ ފަހުން ފުރަތަމަ ހާފުގެ 40 ވަނަ މިނެޓުގައި އައިވަރީ ކޯސްޓުގެ ފުރަތަމަ ލަނޑަކީ މިޞްރުގެ އަހުމަދު ފަތޫހު އަތުން ބައި ކޮޅަށް ވަތް ލަނޑެކެވެ. މެޗުގެ ދެ ވަނަ ހާފު ފަށައިގެން ހަތް ވަނަ މިނެޓުގައި ޞަލާޙު ވަނީ މިޞްރުގެ ތިން ވަނަ ލަނޑު ޖަހައިފަ އެވެ. މުބާރާތުގައި ޞަލާޙު ކުޅުނު ކޮންމެ މެޗެއްގައި ވެސް އޭނާ ވަނީ ލަނޑު ޖަހައިފަ އެވެ. މެޗުގައި އައިވަރީ ކޯސްޓުގެ ދެ ވަނަ ލަނޑު، 73 ވަނަ މިނެޓުގައި ޖެހީ ގުއޭލާ ޑޫއޭ އެވެ. 

މުބާރާތުގެ ސެމީ ފައިނަލްގައި މިޞްރު ނިކުންނާނީ ސެނެގާލްއާ ދެކޮޅަށެވެ.