އާޖެންޓީނާ އެފްއޭގެ ރައީސް އެމެރިކާގެ ކޯޓަކަށް ހާޒިރުވާން އެންގި ވާހަކަ ދޮގުކޮށްފި
23 ޖުލައި 2026 | ބުރާސްފަތި 17:10އޭއެފްއޭ އިން ބުދަ ދުވަހު ނެރުނު ބަޔާނެއްގައި ބުނީ، އެމެރިކާގެ ކޯޓުން އެ ދެ ބޭފުޅުން ހާޒިރުވެ، ހެކިބަސް ދިނުމަށް އަމުރު ކޮށްފައިވާ ކަމަށް ބުނެ ފަތުރަމުންދާ ޚަބަރުތަކަކީ މުޅިން ދޮގު ވާހަކަތަކެއް ކަމަށް
އާޖެންޓީނާގެ ފުޓުބޯޅަ އެސޯސިއޭޝަން (އޭއެފްއޭ) ގެ ރައީސް ކްލައުޑިއޯ ޓަޕިއާ | ރޮއިޓާސް
އާޖެންޓީނާގެ ފުޓުބޯޅަ އެސޯސިއޭޝަން (އޭއެފްއޭ) ގެ ރައީސް ކްލައުޑިއޯ ޓަޕިއާ އާއި އެ އިދާރާގެ ޚަޒާންދާރު ޕަބްލޯ ޓޮވިގީނޯ އެމެރިކާގެ ކޯޓަކަށް ހާޒިރުވާން އަންގާފައިވާ ކަމަށް ދެކެވޭ ވާހަކަތައް އެ އެސޯސިއޭޝަން އިން ދޮގުކޮށްފި އެވެ.
އޭއެފްއޭ އިން ބުދަ ދުވަހު ނެރުނު ބަޔާނެއްގައި ބުނީ، އެމެރިކާގެ ކޯޓުން އެ ދެ ބޭފުޅުން ހާޒިރުވެ، ހެކިބަސް ދިނުމަށް އަމުރު ކޮށްފައިވާ ކަމަށް ބުނެ ފަތުރަމުންދާ ޚަބަރުތަކަކީ މުޅިން ދޮގު ވާހަކަތަކެއް ކަމަށެވެ.
ނަމަވެސް، އެމެރިކާގެ ގްރޭންޑް ޖޫރީއެއްގެ ކުރިމައްޗަށް ހާޒިރުވެ، އޭއެފްއޭގެ ބައެއް އޮފިޝަލުން ހިމެނޭހެން ބައެއް ފަރާތްތަކާ ގުޅޭ ގޮތުން ހެކިބަސް ދިނުމަށް ތިން ވަނަ ފަރާތަކަށް އަންގާފައިވާކަން އެ އެސޯސިއޭޝަން އިން ވަނީ ކަށަވަރުކޮށްދީފައި އެވެ. އެމެރިކާގެ ކޯޓަށް ހާޒިރުވާން އެންގި ތިން ވަނަ ފަރާތަކީ ކޮބައިކަން އޭއެފްއޭ އިން ހާމަކޮށްފައި ނުވެ އެވެ. އެހެން ނަމަވެސް، އެމެރިކާގެ ކަމާ ބެހޭ އިދާރާތަކުން ޓަޕިއާ ނުވަތަ ޓޮވިގީނޯ އަށް އަމާޒުކޮށް އެއްވެސް ތަހުގީގެއް ހިންގަމުން ނުދާކަން އެ އިދާރާ އިން ވަނީ ފާހަގަކޮށްފައި އެވެ.
މި މައްސަލައާ ގުޅިގެން އާޖެންޓީނާގެ ބައެއް މީޑިއާތަކުން ރިޕޯޓުކޮށްފައިވާ ގޮތުގައި، ވޯލްޑް ކަޕް ފައިނަލަށް ފަހު އާޖެންޓީނާގެ ޓީމު އެނބުރި ދިޔުމަށް ހަމަޖެހިފައި އޮތް ޗާޓަރު ފްލައިޓަށް އެރުމުގެ ކުރިން، ހޯމަ ދުވަހުގެ ހެނދުނު ނިއު ޔޯކްގެ ޖޭއެފްކޭ އެއާޕޯޓުން އެފްބީއައިގެ އެޖެންޓުން ވަނީ ޓަޕިއާ އާއި ޓޮވިގީނޯ މަޑު ކުރުވައި ސުވާލުކޮށްފައި އެވެ. އަދި ޓަޕިއާގެ ފޯނާއި އިލެކްޓްރޯނިކް ސާމާނުތައް އެފްބީއައިގެ ބެލުމުގެ ދަށަށް ގެންދަން އެދިފައިވާ ކަމަށް ވެސް މީޑިއާތަކުން ބުނެފައިވެ އެވެ.
މަންޒަރު ދުށް ފަރާތަކާ ހަވާލާދީ ރިޕޯޓުތައް ބުނާ ގޮތުން، އާޖެންޓީނާ ޓީމު ފުރަން ތައްޔާރުވެފައި ވަނިކޮށް، އެއާޕޯޓުގެ ރަންވޭ މަތީގައި އޮތް ބަހެއްގެ ތެރޭގައި ފެޑަރަލް އެޖެންޓުން ވަނީ ޓަޕިއާ އާއި ޓޮވިގީނޯއާ ގާތް ގަނޑަކަށް 30 މިނެޓު ވަންދެން ސުވާލުކޮށްފައި އެވެ. މިކަމާ ގުޅޭ ގޮތުން ނިއުޔޯކް އަދި ނިއު ޖާޒީގެ ޕޯޓް އޮތޯރިޓީ އިން ބުނީ މި މައުލޫމާތު ސާފުކުރުމަށް އެފްބީއައި އަށް ގުޅުމަށެވެ. ނަމަވެސް އެފްބީއައި އިން މިކަމާ ގުޅޭ ގޮތުން އެއްވެސް ބަހެެއް ބުނެފައި ނުވެ އެވެ.
އިންފޯބޭ ނޫހުން ރިޕޯޓު ކޮށްފައިވާ ގޮތުގައި، އެމެރިކާގެ ކަމާ ބެހޭ އިދާރާތަކުން ތަހުގީގު ކުރަމުންދަނީ އޭއެފްއޭއާ ގުޅުންހުރި 300 މިލިއަން ޑޮލަރަށް ވުރެ ގިނަ ފައިސާގެ ވިޔަފާރި އެއްބަސްވުން ތަކެކެވެ. މިއީ އާޖެންޓީނާގެ ފުޓުބޯޅައިގެ މާލީ މުއާމަލާތްތަކާ ގުޅިގެން މިދިޔަ ޑިސެމްބަރު މަހު މަނީ ލޯންޑަރިންގެ ތަހުގީގެއްގެ ދަށުން ހިންގި ރެއިޑުތަކަކަށް ފަހު ފެށިފައިވާ ފުޅާ ތަހުގީގެއްގެ ބައެއް ކަމަށް ވެސް އެ ނޫހުން ބުނެ އެވެ.
އޭއެފްއޭގެ ބަޔާނުގައި އިތުރަށް ބުނެފައި ވަނީ، ޓަޕިއާ އާއި ޓޮވިގީނޯގެ ފޯނު ނުވަތަ އެހެންވެސް އިލެކްޓްރޯނިކް ސާމާނެއް އެމެރިކާގެ އިދާރާތަކުން އަތުލާފައިވާ ކަމަށް ބުނާ ވާހަކަ އަކީ ކަނޑައެޅިގެން ދޮގެއް ކަމަށެވެ. އަދި އެމެރިކާގެ ކޯޓުން ނެރެފައިވާ ލިޔުމަކީ އޭއެފްއޭގެ ރައީސް ނުވަތަ ޚަޒާންދާރާ ދެކޮޅަށް އެއްވެސް ފިޔަވަޅެއް އެޅުމަށް، ނުވަތަ އެބޭފުޅުންގެ މުދަލެއް ހިފެހެއްޓުމަށް އަންގާފައިވާ ލިޔުމެއް ނޫން ކަމަށް ވެސް އެ އެސޯސިއޭޝަން އިން ވަނީ ބުނެފައި އެވެ.
