ފީފާ ވޯލްޑް ކަޕް 2026 - އެންމެ މޮޅު ކުޅުންތެރިޔާ ސްޕެއިންގެ ރޮޑްރީ އަށް ގޯލްޑަން ބޯލް ގެ އިނާމު
ނިއު ޖާޒީގައި ކުޅުނު ފައިނަލް މެޗަށްފަހު، މުބާރާތުގެ އެންމެ މޮޅު ކުޅުންތެރިޔާގެ "ގޯލްޑަން ބޯލް" ސްޕެއިންގެ ރޮޑްރީއަށް ފީފާގެ ރައީސް ވަނީ ހަވާލުކުރައްވާފައި. މިއީ 2023 ވަނަ އަހަރުގެ ބެލޮންޑިއޯ އަދި ޔޫރޯ 2024 ގެ އެންމެ މޮޅު ކުޅުންތެރިޔާގެ މަގާމު ހޯދި ރޮޑްރީގެ ކެރިއަރުގައި ހާސިލްކުރި ތިންވަނަ ބޮޑު ކާމިޔާބީ. މި މުބާރާތުގެ ސިލްވަ ބޯލް ލިއޮނަލް މެސީ ހޯދިއިރު، ބްރޮންޒް ބޯލް ހާސިލްކުރީ ކީލިއަން އެމްބާޕޭ.
ރޮޑްރީ ވަނީ ސްޕެއިންގެ ގައުމީ ޓީމާއެކު ވޯލްޑް ކަޕާއި ޔޫރޯ ކާމިޔާބުކުރުމުގެ އިތުރުން، މެންޗެސްޓަރ ސިޓީއާއެކު އިނގިރޭސި ޕްރިމިއަރ ލީގުގެ ޗެމްޕިއަންކަން ހަތަރު ފަހަރު ހޯދާފައި | ގެޓީ އިމޭޖަސް
ސްޕެއިންގެ ގައުމީ ޓީމުން ދެވަނަ ފަހަރަށް ވޯލްޑް ކަޕް ކާމިޔާބުކުރުމުގައި މުހިންމު ދައުރެއް އަދާކުރި މެންޗެސްޓަރ ސިޓީގެ މިޑްފީލްޑަރު ރޮޑްރީ، މުބާރާތުގެ އެންމެ މޮޅު ކުޅުންތެރިޔާގެ މަގާމު ހޯދައިފި އެވެ.
ނިއު ޖާޒީގެ މެޓްލައިފް ސްޓޭޑިއަމްގައި ކުޅުނު ފައިނަލް މެޗަށްފަހު، އުމުރުން 30 އަހަރުގެ ރޮޑްރީއަށް އެންމެ މޮޅު ކުޅުންތެރިޔާގެ ރަން ބޯޅަ ނުވަތަ "ގޯލްޑަން ބޯލް" ހަވާލުކޮށްދެއްވީ ފީފާގެ ރައީސް ޖިއާނީ އިންފަންޓީނޯ އެވެ.
މިއީ ރޮޑްރީގެ ކެރިއަރުގައި ހޯދި ތިންވަނަ ބޮޑު ކާމިޔާބީ އެވެ. އޭނާ ވަނީ 2023 ވަނަ އަހަރުގެ ބެލޮންޑިއޯ ކާމިޔާބުކުރުމުގެ އިތުރުން، މީގެ ދެ އަހަރު ކުރިން އިންގްލެންޑާ ދެކޮޅަށް ކުޅުނު ޔޫރޯ 2024 ގެ ފައިނަލް ސްޕެއިންއިން ކާމިޔާބުކުރި މުބާރާތުގެ އެންމެ މޮޅު ކުޅުންތެރިޔާގެ މަގާމުވެސް ހޯދާފަ އެވެ.
މި މުބާރާތުގެ ދެވަނައަށް އެންމެ މޮޅު ކުޅުންތެރިޔާގެ މަގާމު ނުވަތަ "ސިލްވަ ބޯލް" ލިއޮނަލް މެސީ ހޯދިއިރު، ތިންވަނައަށް އެންމެ މޮޅު ކުޅުންތެރިޔާގެ މަގާމު ނުވަތަ "ބްރޮންޒް ބޯލް" ހާސިލްކުރީ ކީލިއަން އެމްބާޕޭ އެވެ.
