ވޯލްޑް ކަޕްގެ ހިއްސާ ވިއްކާލަން އުޅުނު މަޝްރޫއު ހުއްޓާލަން ޖެހުމަކީ، އެކަމާ ސުވާލު ވެސް އުފައްދަން ޖެހޭ ކަމެއް ނޫން: ވެންގާ
5 އޯގަސްޓު 2026 | ބުދަ 05:03ވެންގާ ވިދާޅުވީ، ފީފާ އަކީ މިނިވަންކަމާ އެކު ހިނގާ، ދެފުށް ފެންނަ އަދި އިތުބާރު ހުރި ގޮތެއްގައި ފުޓުބޯޅަ އަށް ޚިދުމަތްކުރާ އިދާރާއަކަށް ވާން ޖެހޭނެ ކަމަށް އޭނާ ޤަބޫލު ކުރައްވާ ކަމަށް. އެހެންކަމުން، މި މަޝްރޫއު ކުރިއަށް ނުގެންދަން ނިންމި ނިންމުމަކީ ފުޓުބޯޅައިގެ ކުރިމަގަށް އެޅުނު މުހިންމު ފިޔަވަޅެއްގެ ގޮތުގައި އޭނާ ސިފަ ކުރެއްވި
ފީފާގެ ރައީސް ޖިއާނީ އިންފަންޓީނޯ އާއި ފީފާގެ ޗީފް ގްލޯބަލް ފުޓްބޯލް ޑިވެލޮޕްމަންޓް އަދި އާސެނަލްގެ ކުރީގެ ކޯޗު އާސެން ވެންގާ | ގެޓީ އިމޭޖަސް
ފީފާާ ވޯލްޑް ކަޕް ހިމެނޭހެން، ފީފާގެ މުބާރާތްތަކުގެ ހިއްސާ އަމިއްލަ އިންވެސްޓަރުންނަށް ވިއްކާލުމަށް ފީފާގެ ރައީސް ޖިއާނީ އިންފަންޓީނޯ ގެންގުޅުއްވި ރޭވުންތައް އަނބުރާ ގެންގޮސްފައިވާއިރު، އެއީ ކޮންމެހެން ކުރަން ޖެހޭ ކަމެއް ކަމަށާއި އެކަމާ ސުވާލު އުފައްދާނެ ޖާާގައެއް ވެސް ނެތް ކަމަށް، ފީފާގެ ޗީފް ގްލޯބަލް ފުޓްބޯލް ޑިވެލޮޕްމަންޓް އަދި އާސެނަލްގެ ކުރީގެ ކޯޗު އާސެން ވެންގާ ވިދާޅުވެއްޖެ އެވެ.
މިކަމާ ގުޅޭ ގޮތުން ވާހަކަ ދައްކަވަމުން ވެންގާ ވިދާޅުވީ، ފީފާ އަކީ މިނިވަންކަމާ އެކު ހިނގާ، ދެފުށް ފެންނަ އަދި އިތުބާރު ހުރި ގޮތެއްގައި ފުޓުބޯޅަ އަށް ޚިދުމަތްކުރާ އިދާރާއަކަށް ވާން ޖެހޭނެ ކަމަށް އޭނާ ޤަބޫލު ކުރައްވާ ކަމަށެވެ. އެހެންކަމުން، މި މަޝްރޫއު ކުރިއަށް ނުގެންދަން ނިންމި ނިންމުމަކީ ފުޓުބޯޅައިގެ ކުރިމަގަށް އެޅުނު މުހިންމު ފިޔަވަޅެއްގެ ގޮތުގައި އޭނާ ސިފަ ކުރެއްވި އެވެ.
ފީފާގެ އިސް މަޤާމެއް ފުރުއްވަމުން ގެންދަވާ ވެންގާ ފާހަގަ ކުރެއްވި ގޮތުގައި، އަމިއްލަ އިންވެސްޓަރުންނަށް ހިއްސާ ވިއްކުމުގެ މި ސްޓްރެޓީޖިކް ޕްލޭންގެ އެއްވެސް މަރުހަލާއެއްގައި އޭނާ ބައިވެރިވެފައި ނުވާނެ އެވެ. އަދި އެކަމުގައި އޭނާގެ އެއްވެސް ހިއްސާއެއް ނޯންނާނެ ކަމަށް ވެންގާ ކަށަވަރު ކޮށްދެއްވި އެވެ. އެއާ އެކު ވެންގާ ވިދާޅުވީ، މިފަދަ މަޝްރޫއެއް ކުރިއަށްދާކަން އޭނާ އަށް އެންމެ ފުރަތަމަ އެނގި ވަޑައިގަތީ މީޑިއާ ރިޕޯޓުތަކުން ކަމަށެވެ.
ދުނިޔޭގެ ފުޓުބޯޅައިގެ ގަވާއިދުތައް މުރާޖައާ ކުރުމާއި، ކުޅިވަރު ކުރިއެރުވުމަށް ހުށަހެޅުންތައް ތައްޔާރު ކުރުމުގައި އިސް ދައުރެއް އަދާކުރައްވާ ވެންގާ މިހާރު މަސައްކަތް ކުރައްވަނީ ފީފާގެ ފަންނީ ތަރައްޤީގެ އެންމެ އިސްވެރިޔާގެ ގޮތުގައި އެވެ. އޭނާގެ މި ބަޔާނާ އެކު، ފީފާގެ އެތެރޭގެ ނިންމުންތަކާމެދު އޮތް ހިޔާލު ތަފާތުވުން ތަކަށް ވަނީ އިތުރު ސަމާލުކަމެއް ލިބިފައި އެވެ.
ފީފާގެ ރައީސް ޖިއާނީ އިންފަންޓީނޯ ކުރިން ރާއްވަވާފައި އޮތީ، ވޯލްޑް ކަޕްގެ ވިޔަފާރީގެ މަންފާ އިތުރު ކުރުމަށްޓަކައި އަމިއްލަ ކުންފުނިތަކަށް ހިއްސާ ވިއްކައިގެން ބޮޑު އިންވެސްޓްމަންޓެއް ހޯދުމަށެވެ. ނަމަވެސް މި ނިންމުމާ މެދު ފުޓުބޯޅައިގެ އެކި ފަރާތްތަކުގެ ކިބައިން ފާޑުކިޔުންތަކެއް އަމާޒުވުމާ ގުޅިގެން، އެ އިދާރާ އިން މިހާރު ވަނީ އެ ނިންމުން އަނބުރާ ގެންގޮސްފައި އެވެ.
