ދައުލަތުން ސިޔާސީ ޕާޓީތަކަށް ފައިސާ ދިނުމަށް ވުރެ، މީޑިއާތަކަށް ފައިސާ ދިނުން މާ ހައްގުކަން ބޮޑު: ޔާމީން
8 އޯގަސްޓު 2026 | ހޮނިހިރު 06:56ސިޔާސީ ޕާޓީތަކަށް ދައުލަތުން ފައިސާ ދިނުމުގެ ބަދަލުގައި، މީޑިއާތަކަށް ދޭ އެހީ ބޮޑުކުރުން މާ މުހިންމު ކަމަށް ކުރީގެ ރައީސް ޔާމީން ވިދާޅުވެއްޖެ. ނޫސްވެރިކަން ޒިންމާދާރުކޮށް ކުރިއަށްގެންދަން ޖެހޭކަން ފާހަގަކުރައްވައި، ދައުލަތުގެ ބަޖެޓުން މީޑިއާތަކަށް ދޭ ފައިސާއަކީ ސަރުކާރުގެ ހެޔޮފުޅުކަމުން ދޭ އެއްޗެއްގެ ގޮތުގައި ނުދެކުމަށް އެމަނިކުފާނު އިލްތިމާސްކުރެއްވި
ކުރީގެ ރައީސް އަބްދުﷲ ޔާމީން | ރައީސް އޮފީސް
ދައުލަތުން ސިޔާސީ ޕާޓީތަކަށް ފައިސާ ދިނުމަށް ވުރެ، މީޑިއާތަކަށް ފައިސާ ދިނުން މާ ހައްގުކަން ބޮޑު ކަމަށް ކުރީގެ ރައީސް އަބްދުﷲ ޔާމީން ވިދާޅުވެއްޖެ އެވެ.
ރާއްޖޭގެ މީޑިއާއަކަށް ދެއްވި އިންޓަވިއުއެއްގައި ޔާމީން ވިދާޅުވީ ސިޔާސީ ޕާޓީ ހިންގަން ދައުލަތުގެ ބަޖެޓުން ފައިސާ ދޭން ޖެހޭނެ ކަމަށް އެމަނިކުފާނު ދެކިވަޑައިނުގަންނަވާ ކަމަށެވެ. އަދި ސިޔާސީ ޕާޓީތަކަށް ފައިސާ ދިނުމުގެ ބަދަލުގައި މީޑިއާތަކަށް މިހާރު ދޭ ފައިސާގެ އަދަދު ބޮޑު ކުރުން މާ ރަނގަޅު ކަމަށް ޔާމީން ވިދާޅުވި އެވެ.
މިޑިއާތަކަށް ފައިސާ ދެނީ ސަރުކާރުން ކަމަށް ދެކި، މީޑިއާތައް ކޮމްޕްރޮމައިޒްވާ ކަމުގައި ވާނަމަ، އެމަނިކުފާނުގެ ހިތްހަމަނުޖެހުން އޮންނާނެ ކަމަށާއި ދައުލަތުގެ ބަޖެޓުން މީޑިއާތަކަށް ފައިސާ ދިނުމަކީ ރައްޔިތުންގެ މަޖިލީހުން ނިންމާފައިވާ ކަމަކަށް ވާއިރު، އެއީ ރައީސްގެ ހެޔޮފުޅުކަމުން ދޭ އެއްޗެއް ގޮތުގައި ދެކެން ނުޖެހޭ ކަމަށް ޔާމީން ވިދާޅުވި އެވެ.
މިހާރު ބައްލަވާ ސިޔާސީ ޕާޓީތަކަށް ވެސް ދައުލަތުގެ ބަޖެޓުން ހަމަ ފައިސާ ދޭ އެބަ އެކަމަކު އަޅުގަނޑު ނުދެކެން ސިޔާސީ ޕާޓީތައް ހިންގާކަށް ދައުލަތުން ފައިސާ ދޭން ޖެހޭނެ ކަމަކަށް އަޅުގަނޑެއް ނުދެކެން، އެކަމަކު އެއަށް ވުރެ މާ ހައްގު ކަންނޭނގެ މީޑިއާއަށް އެއްޗެއް ދިނިއްޔާ އެނގޭތޯއަބްދުﷲ ޔާމީން
މީގެއިތުރުން ނޫސްވެރިކަން ބެލެންސްޑްއެއް ނޫން ކަމަށާއި، މުޅިން ވެސް ސަރުކާރަށް ސަނާ ކިޔާ ނޫސްވެރިން އުޅޭ ކަން ފާހަގަކުރައްވައި ޔާމީން ވިދާޅުވީ ނޫސްވެރިން ވެސް ޒިންމާދާރު ނޫސްވެރިކަމެއް ކުރާ ކަމުގައި ވާނަމަ މި އިންބެލެންސްއެއް ނާންނާނެ ކަމަށެވެ.
ނޫސްވެރިކަމަށް އެކި އެކި ހަމަލާތައް އަންނާނެ ކަމަށާއި، މިނިވަން ނޫސްވެރިކަން ހުދޫދެއްގެ ތެރޭގައި ގެންގުޅެން ޖެހޭ ކަމަށް ޔާމީން ވިދާޅުވި އެވެ. އެގޮތުން ލިޔާ ވާހަކައަކީ ސާބިތު ހިފޭ ވާހަކައަކަށް ވާން ޖެހޭނެ ކަމަށް ވިދާޅުވި އެވެ. އަދި އެގޮތަށް އެކަން ނުކުރެވޭ ކަމުގައި ވާނަމަ ނޫހެއްގައި ލިޔުމުގެ ބަދަލުގައި ހިޔާލުތަކެއްގެ ގޮތުގައި ބަޔަކު ލައްވާ އެ ވާހަކަތައް ދެއްކުމަށް ޔާމީން ގޮވާލެއްވި އެވެ.
ރަޖިސްޓަރީކޮށްގެން ހިންގާ އަމިއްލަ މީޑިއާތަކަށް ދައުލަތުގެ ބަޖެޓުން މާލީ އެހީ ދިނުމުގެ އުސޫލެއް ސަރުކާރުން ފުރަތަމަ ފަހަރަށް އެކުލަވާލައި، 2025 ވަނަ އަހަރު އޮގަސްޓް 19 ވަނަ ދުވަހު އާންމުކޮށްފައިވެ އެވެ. އަދި ދައުލަތުގެ ބަޖެޓުގެ އަންދާޒާކުރެވޭ ރެވެނިއުގެ 0.1 އިންސައްތައަށް ވާ މިންވަރަށް މީޑިއާތަކަށް ފައިސާ ދޫކުރުމަށް ރައްޔިތުންގެ މަޖިލީހުން ފާސްކޮށްފައިވެ އެވެ.
