ވޯލްޑްކަޕް ބަޔަކަށް ވިއްކާލަން އުޅުނު މައްސަލައިގައި ޔޫއެފާއިން ފީފާއަށް ލިޔެކިޔުން ރައްކާކުރުމަށް ރަސްމީ ގާނޫނީ ނޯޓިސް ފޮނުވައިފި

ޔޫރަޕްގެ ފުޓްބޯޅަ އިދާރާ، ޔޫއެފާއިން ދުނިޔޭގެ ފުޓްބޯޅައިގެ މައި އިދާރާ، ފީފާއަށް "ޕްރިޒަވޭޝަން ލެޓަރ" އެއް ނުވަތަ ލިޔެކިޔުންތައް ރައްކާތެރިކުރުމަށް އަންގައި ރަސްމީ ނޯޓިހެއް ފޮނުވާފައިވާކަން އަލްޖަޒީރާއަށް ކަށަވަރުކޮށްދީފި ކަމަށް ރިޕޯޓުކޮށްފި އެވެ. ޔޫއެފާއިން މި ފިޔަވަޅު އަޅާފައިވަނީ، ވޯލްޑް ކަޕުން ކުރިއަށް އޮތް ތަނުގައި ލިބޭނެ ފައިދާގެ ބައެއް އަމިއްލަ އިންވެސްޓަރުންނަށް ވިއްކާލުމަށް ފީފާގެ ރައީސް ޖިއާނީ އިންފަންޓީނޯ ރޭއްވެވި މަޝްރޫއު ނާކާމިޔާބުވެފައިވާ ދަނޑިވަޅެއްގަ އެވެ.

ޔޫއެފާއިން އަލްޖަޒީރާއަށް ފޮނުވި އީމެއިލެއްގައި ބުނެފައިވަނީ، ލިޔެކިޔުންތައް ރައްކާތެރިކުރުމަށް އަންގައި ފީފާއަށް ނޯޓިހެއް ފޮނުވާފައިވާކަން ކަށަވަރުކޮށްދޭ ކަމަށެވެ. ނަމަވެސް، މި ވަގުތު މިކަމާ ގުޅޭ އިތުރު ތަފްސީލެއް ދެވެން ނެތް ކަމަށް ވެސް އެ އިދާރާއިން ބުނެފައިވެ އެވެ. މި "ޕްރިޒަވޭޝަން ލެޓަރ" އަކީ ގާނޫނީ ގޮތުން ފޮނުވާ ރަސްމީ ލިޔުމެކެވެ. މީގެ ބޭނުމަކީ ކުރިއަށް އޮތް ތަނުގައި ހެކީގެ ގޮތުގައި ބޭނުންކުރަން ޖެހިދާނެތީ، ފީފާގެ އެންމެހާ މައުލޫމާތާއި، ލިޔެކިޔުންތަކާއި އަދި އިލެކްޓްރޯނިކް މެސެޖުތައް ނައްތާނުލައި ރައްކާތެރިކޮށް ބެލެހެއްޓުމަށް އެންގުމެވެ.

އިންވެސްޓަރުންގެ އަތުން 4.2 ބިލިއަން ޑޮލަރު ހޯދުމަށް އިންފަންޓީނޯ ސިއްރިއްޔާތުގައި ހުށަހެޅުއްވި މި ހުށަހެޅުމުގައި، ނިއުޔޯކްގެ އިންވެސްޓްމަންޓް ފާމެއް ކަމަށްވާ ޖޯޝުއާ ކުޝްނާގެ ކުންފުނި ވެސް ހިމެނެ އެވެ. ނަމަވެސް، މިކަމުގެ މައުލޫމާތު ފަޅާއަރައި މުޅި ދުނިޔޭގެ ފާޑުކިޔުންތައް އަމާޒުވުމާ ގުޅިގެން، ހޮނިހިރު ދުވަހުގެ ކުރީކޮޅު ވަނީ މި މަޝްރޫއު ދޫކޮށްލާފަ އެވެ.

މި ހުށަހެޅުމާ ދެކޮޅަށް އެންމެ ބޮޑަށް އަޑުއުފުލީ ޔޫއެފާއިންނެވެ. އަދި މިދިޔަ ބުރާސްފަތި ދުވަހު ޔޫއެފާގެ 55 މެންބަރު ގައުމު ބައްދަލުކޮށް، މި ހުށަހެޅުން ދެމިއޮތްހާ ހިނދަކު ފީފާގެ އެއްވެސް ހަރަކާތެއްގައި ނުވަތަ މުބާރާތެއްގައި ބައިވެރިނުވުމަށް (ބޮއިކޮޓް ކުރުމަށް) ވަނީ އެއްބަސްވެފަ އެވެ.

މައުލޫމާތު ލިބޭ ގޮތުގައި، އިންފަންޓީނޯގެ މި ރޭވުންތައް ހާމަވީއްސުރެ ޔޫއެފާއިން ދަނީ ގާނޫނީ ފިޔަވަޅު އެޅުމަށް ވިސްނަމުންނެވެ. "ލިޓިގޭޝަން ހޯލްޑް ލެޓަރ" ގެ ނަމުން ވެސް ނަންދެވިފައިވާ މިފަދަ ނޯޓިސްތައް ފޮނުވަނީ، ކުރިއަށް އޮތް ތަނުގައި ކުރިމަތިވެދާނެ ނުވަތަ މިހާރު ހިނގަމުންދާ ގާނޫނީ ދައުވާތަކާ ގުޅިގެންނެވެ.

އެސޯސިއޭޓެޑް ޕްރެސް (އޭޕީ) އިން ރިޕޯޓްކޮށްފައިވާ ގޮތުގައި، ޔޫއެފާގެ ވަކީލުން ވަނީ ފީފާއަށް ފޮނުވި ނޯޓިސް އިތުރަށް ފުޅާކޮށްފަ އެވެ. އެގޮތުން، ފީފާއިން ހުށަހެޅި "ފީފާ ފޯވާޑް އެންޓަޕްރައިޒް" (އެފް.އެފް.އީ) ޕްލޭނާ ގުޅިގެން ގާނޫނީ ފިޔަވަޅު އެޅުމާއި، އާބިޓްރޭޝަނަށް ދިއުމާއި ނުވަތަ ރެގިއުލޭޓަރީ ޝަކުވާ ހުށަހެޅުމަށް ޔޫރަޕްގެ ފުޓްބޯޅަ އިދާރާއިން ސީރިއަސްކޮށް ވިސްނަމުންދާކަން ވަނީ އަންގާފަ އެވެ.

މިދިޔަ ހުކުރު ދުވަހުގެ ތާރީޚުގައި ފޮނުވާފައިވާ، ނަމަވެސް ހޯމަ ދުވަހުގެ ރޭ އޭޕީއަށް ފެނިފައިވާ މި ސިޓީއަކީ ނިއުޔޯކްގެ ލޯ ފާމެއް ކަމަށްވާ "ޑެކާޓް" އިން ފޮނުވާފައިވާ ސިޓީއެކެވެ. އެ ސިޓީގައި ބުނެފައިވަނީ، މި ނޯޓިސް ލިބުމަށްފަހު ނުވަތަ މިފަދަ މައްސަލައެއް ކުރިމަތިވެދާނެކަން އެނގުނު ހިސާބުން ފެށިގެން، އެއްވެސް ލިޔެކިޔުމެއް ނައްތާލުން، ބަދަލުކުރުން ނުވަތަ ފޮރުވައިފިނަމަ، އެއީ ހެކި ނައްތާލުން ކަމުގައި ބެލެވޭނެ ކަމަށެވެ.

މި ނޯޓިސްގައި ފީފާގެ 18 އިސްވެރިއެއްގެ ނަން ހިމަނާފައިވާކަމަށް މައުލޫމާތު ލިބެ އެވެ. އޭގެ ތެރޭގައި އިންފަންޓީނޯގެ އިތުރުން، ޗީފް ފައިނޭންޝަލް އޮފިސަރު ތޯމަސް ޕެޔާ އާއި، ފީފާގެ ގްލޯބަލް ފުޓްބޯލް ޑިވެލޮޕްމަންޓްގެ އިސްވެރިޔާ އަދި މަޝްހޫރު ކޯޗު އާސެން ވެންގާ ހިމެނެ އެވެ.

ފީފާގެ ރައީސްކަމަށް އާ ކެންޑިޑޭޓަކު ހޯދުމުގެ މަސައްކަތް ޔޫއެފާއިން ފަށައިފި

ސްވިޑަންގެ ފުޓްބޯޅަ ފެޑެރޭޝަނުން ހޯމަ ދުވަހު ކަށަވަރުކޮށްދިން ގޮތުގައި، އަންނަ މާރިޗު މަހު ބޭއްވުމަށް ހަމަޖެހިފައިވާ ފީފާގެ ރިޔާސީ އިންތިޚާބުގައި އިންފަންޓީނޯއާ ވާދަކުރާނެ އިތުރު ކެންޑިޑޭޓަކު ހޯދުމުގެ މަސައްކަތް ޔޫއެފާއިން ދަނީ ކުރަމުންނެވެ.

ހޮނިހިރު ދުވަހު ޔޫއެފާއިން ވަނީ އިންފަންޓީނޯގެ 10 އަހަރުވީ ރިޔާސަތު ނިމުމަކަށް ގެންނަން ބޭނުންވާކަމުގެ އިޝާރާތެއް ދީފަ އެވެ. އެ އިދާރާއިން ބުނީ އިންފަންޓީނޯއަށް އޮތް އިތުބާރު ގެއްލިފައިވާ ކަމަށާއި، އޭނާ މަގާމުން ދުރުކުރުމަށް ކުރެވެން ހުރި ހުރިހާ ކަމެއް ކުރާނެ ކަމަށެވެ.

މި ބަޔާން ނެރުމުގެ ކުޑަވަގުތުކޮޅެއް ކުރިން، އިންފަންޓީނޯ ވަނީ ފީފާގެ 211 މެންބަރު ގައުމުގެ ތެރެއިން ކޮންމެ ގައުމަކަށް 20 މިލިއަން ޑޮލަރު ދިނުމަށް ހުށަހެޅި، ބައިބައިވުން އުފެދުނު ހުށަހެޅުން އަނބުރާ ގެންގޮސްފަ އެވެ. މި ފައިސާ ގަބޫލުކުރުމަށް މެންބަރު ގައުމުތަކަށް ދީފައިވަނީ ސެޕްޓެމްބަރު މަހުގެ މެދާ ހަމައަށް އޮތް މުއްދަތެކެވެ.

ފީފާއިން 20 ބިލިއަން ޑޮލަރުގެ އަގުކޮށްފައިވާ މި މަޝްރޫއުގެ ދަށުން، ފީފާގެ ވިޔަފާރިތަކާއި މުބާރާތްތަކުގެ ކޮންޓްރޯލް 2038 ވަނަ އަހަރާ ހަމައަށް އަމިއްލަ ބައެއްގެ ދަށަށް ދިޔައީހެވެ. އޭގެ ބަދަލުގައި މެންބަރު ގައުމުތަކަށް ތަރައްގީގެ ފައިސާ ދެގުނައަށް އިތުރުކޮށްދޭނެ ކަމަށް ވަނީ ވައުދުވެފަ އެވެ.

ނަމަވެސް، ފީފާގެ ޗީފް އޮޕަރޭޓިންގ އޮފިސަރު ކެވިން ލަމޫރު ހުކުރު ދުވަހު ނެރުނު ހަރުކަށި ބަޔާނެއްގައި ބުނެފައިވަނީ، މިއީ ހަމައެކަނި އިންފަންޓީނޯގެ އަމިއްލަ ރޭވުމެއް ކަމަށާއި، ފީފާގެ މުވައްޒަފުންނަށް އެމީހުންގެ ވެރިޔާ އޮޅުވާލާފައިވާ ކަމަށް ގަބޫލުކުރެވޭ ކަމަށެވެ.

ޔޫއެފާގެ ވަކީލު އެންޑްރޫ ޖޭ ލެވަންޑާ ލިޔުއްވާފައިވާ ގޮތުގައި، ގާނޫނީ ފިޔަވަޅު އެޅުމަކީ "ޔަގީންކުރެވޭ" ކަމެކެވެ. ސަބަބަކީ މި މަޝްރޫއަކީ ފުޓްބޯޅަ ހިންގުމުގެ އަސާސީ އުސޫލުތަކާ މުޅިން ޚިލާފު ކަމެއް ކަމަށް ފުޓްބޯޅައިގެ ހިއްސާދާރުން ގަބޫލުކުރާތީ އެވެ.

އިންފަންޓީނޯއާ ދެކޮޅަށް އެންމެ ބޮޑަށް އަޑުއުފުލަނީ ޔޫއެފާއިން ކަމަށްވީ ނަމަވެސް، އޭޝިއާގެ ފުޓްބޯޅަ އިދާރާ (އޭއެފްސީ) އާއި، އުތުރު އަދި މެދުތެރޭ އެމެރިކާގެ އިދާރާ (ކޮންކާކަފް) އިން ވެސް ވަނީ މި ޕްލޭނާ ދެކޮޅަށް ވަރުގަދަ ބަޔާންތަކެއް ނެރެފަ އެވެ.

އިންފަންޓީނޯއަށް މިހާރު އެންމެ ބޮޑު ތާއީދެއް އޮތީ އެފްރިކާގަ އެވެ. އަދި ދެކުނު އެމެރިކާގެ ކޮންމެބޯލް އިން އޭނާއަށް ތާއީދުކުރަނީ 2030 ވަނަ އަހަރުގެ ވޯލްޑް ކަޕް 48 ޓީމުން 64 ޓީމަށް ބަދަލުކުރުމުގެ އުންމީދުގަ އެވެ. އެ ބަދަލާއެކު އާޖެންޓީނާ، އުރުގުއޭ އަދި ޕެރަގުއޭއަށް ގިނަ މެޗުތަކެއް ބޭއްވުމުގެ ފުރުސަތު ލިބޭނެ އެވެ.

ވޭތުވެދިޔަ 10 އަހަރާއި ބައިގެ މުއްދަތުގައި އިންފަންޓީނޯ ފުރުއްވަމުން ގެންދެވި ރައީސްކަމުގެ މަގާމު ދިފާއުކުރުމަށް އޭނާ ކުރައްވާނެ މަސައްކަތްތަކެއް ހޯމަ ދުވަހާ ހަމައަށް ސާފެއް ނުވެ އެވެ. ހޯމަ ދުވަސް ފެށުނީ އޭނާގެ ގާތް އެކުވެރިއެއް ކަމަށްވާ އެމެރިކާގެ ރައީސް ޑޮނަލްޑް ޓްރަމްޕްގެ ސަރުކާރުގެ އެހީތެރިކަން އޭނާ ހޯއްދަވަން އުޅުއްވާ ކަމުގެ ރިޕޯޓްތަކާ އެކުގަ އެވެ. ނަމަވެސް، އެމެރިކާގެ ޚާރިޖީ ވުޒާރާގެ އެސިސްޓަންޓް ސެކްރެޓަރީ ޑައިލަން ޖޯންސަން ވަނީ ސެކްރެޓަރީ އޮފް ސްޓޭޓް މާކޯ ރޫބިއޯ އިންފަންޓީނޯއާ ވާހަކަދެއްކެވުމަށް ހަމަޖެހިފައި ނުވާކަމަށް ބުނެ އެ ޚަބަރު ދޮގުކޮށްފަ އެވެ.

ސިޔާސީ މަސްރަހު ބަދަލުވުން

މިދިޔަ އަންގާރަ ދުވަހު ލަންޑަނުގެ "ދަ ޓައިމްސް" ނޫހުން މި އަމިއްލަ އިންވެސްޓްމަންޓް ޕްލޭން ފަޅާއަރުވާލި ފަހުން، އުމުރުން 56 އަހަރުގެ އިންފަންޓީނޯގެ ނަސީބު ވަނީ މުޅިން ބަދަލުވެފަ އެވެ.

މީގެ ދެ ހަފުތާ ކުރިން ވޯލްޑް ކަޕް ފައިނަލަށްފަހު އޭނާ ނިއުޔޯކުން ފުރައިގެން ދިޔައީ، އަންނަ މާރިޗު މަހު އޮންނަ އިންތިޚާބުގައި އެއްވެސް ވާދަވެރިއަކާ ނުލައި، 2031 ވަނަ އަހަރާ ހަމައަށް ހަތަރުވަނަ ދައުރަކަށް އިންތިޚާބުވާނެކަމުގެ ފުރިހަމަ ޔަގީންކަމާ އެކުގަ އެވެ. މި އާ މަޝްރޫއުގެ ސަބަބުން 2031 ގެ ފަހުން ވެސް އޭނާއަށް ބާރުގަދަ މަގާމެއް ލިބި، މިހާރު ލިބޭ އަހަރަކު 6 މިލިއަން ޑޮލަރުގެ މުސާރައަށްވުރެ ބޮޑު އާމްދަނީއެއް ލިބުމުގެ ފުރުސަތު އޮތެވެ.

ވޯލްޑް ކަޕްގެ ތެރޭގައި ފީފާއިން ބުނެފައިވަނީ 211 މެންބަރު ގައުމުގެ ތެރެއިން 200 ގައުމެއްގެ ތާއީދު ސިޓީ އިންފަންޓީނޯއަށް ލިބިފައިވާ ކަމަށެވެ. ނަމަވެސް، މިހާރު ޔޫރަޕްގެ ގައުމުތަކުން ދަނީ އެ ސިޓީތައް އަނބުރާ ގެންދަމުންނެވެ. އެގޮތުން ވޭލްސް އިން ވަނީ އެމީހުންގެ ތާއީދު އަނބުރާ ގެންދިޔަކަން ފުރަތަމަ އިއުލާންކޮށްފަ އެވެ.

ފީފާގެ އިންތިޚާބަށް ކުރިމަތިލުމުގެ ސުންގަޑިއަކީ ނޮވެމްބަރު 18 އެވެ. އިންތިޚާބު ބޭއްވުމަށް ހަމަޖެހިފައިވަނީ އޭގެ ހަތަރު މަސް ފަހުން މޮރޮކޯގަ އެވެ. މޮރޮކޯއަކީ އިންފަންޓީނޯގެ އެންމެ ގާތް އެއް ބައިވެރިޔާގެ އިތުރުން، 2030 ވަނަ އަހަރުގެ ވޯލްޑް ކަޕް ސްޕެއިން އަދި ޕޯޗުގަލްއާ ގުޅިގެން ބާއްވާ ގައުމު ވެސްމެ އެވެ.