މާލޭގައި އަމިއްލަ ފަރާތްތަކުން ކުނި އުކާލުމަށް ހާއްސަ އުސޫލެއް އެކުލަވާލުމުގެ މަސައްކަތް މާލޭ ސިޓީ ކައުންސިލުން ފަށަނީ
5 އޯގަސްޓު 2026 | ބުދަ 17:38މާލޭގައި އަމިއްލަ ފަރާތްތަކުން ކުނި އުކާލުމުގެ މަސައްކަތް ކުރަނީ ވަކި އުސޫލެއްގެ ދަށުން ނޫން ކަމަށްވާތީ، އެފަދަ ފަރާތްތައް ރަޖިސްޓްރީކޮށް ރެގިއުލޭޓް ކުރުމަށް މާލެ ސިޓީ ކައުންސިލުން ވަނީ ނިންމާފައި. މި އުސޫލުގެ ދަށުން ކުނި އުކާލާ ގަޑިތަކާއި އުޅަނދުތަކުގެ ސަލާމަތީ މިންގަނޑުތައް ކަނޑައަޅައި، ގަވާއިދާ ހިލާފުވާ ފަރާތްތަކަށް ފިޔަވަޅު އެޅުމަށް ވަނީ ހުށަހަޅާފައި
މާލެ ސިޓީ ކައުންސިލްގެ 5 ވަނަ ދައުރުގެ ޖަލްސާއެއްގެ ތެރެއިން | މާލެ ސިޓީ ކައުންސިލް
މާލޭގައި އަމިއްލަ ފަރާތްތަކުން ކުނި އުކާލުމަށް ހާއްސަ އުސޫލެއް އެކުލަވާލުމުގެ މަސައްކަތް މާލޭ ސިޓީ ކައުންސިލުން ފަށަން ނިންމައިފި އެވެ.
ބުދަ ދުވަހު އޮތް މާލެ ސިޓީ ކައުންސިލް ރަސްމީ ޖަލްސާގައި މައްޗަންގޮޅި ދެކުނު ދާއިރާގެ ކައުންސިލަރު ފަރުހާން ޝަފީއު ވަނީ މާލޭގެ ވިޔަފާރިތަކުން އުފައްދާ ކުނި އިތުރުވަމުން އަންނައިރު، ކުނި އުކާލުމުގެ ހިދުމަތް ދޭ ފަރާތްތައް ރެގިއުލޭޓް ކުރާނެ ހަރުދަނާ އުސޫލެއް ނެތުމުން ގިނަ ގޮންޖެހުންތަކާއި ކުރިމަތިވަމުންދާ ކަމަށް ވިދާޅުވެފައި އެވެ.
އެހެންކަމުން، މި މައްސަލަ ހައްލުކުރުމަށް ކައުންސިލަރު ޝަފީއު ހުށަހަޅުއްވާފައިވެ އެވެ.
މި ހުށެހެޅުމުގައި ކުނި އުކާލުމުގެ ހިދުމަތްދޭ އަމިއްލަ ފަރާތްތަކުން ކައުންސިލުގައި ރަޖިސްޓްރީވާން ޖެހޭ ގޮތް ހަދައި، އަހަރަކު އެއްފަހަރު އެ ރަޖިސްޓްރީ އައުކުރަން ޖެހޭ ގޮތް ހެދުމަށާއި، ޓްރެފިކަށް ބާރުބޮޑުނުވާ ގޮތަށް ކުނި އުކާލުމަށް ގަޑިތަކެއް ތަރުތީބުކުރަން ހިމެނެ އެވެ. އަދި ކުނި އުކާލާ އުޅަނދުތަކުގައި ކުންފުނީގެ ނަމާއި ރަޖިސްޓްރީ ނަންބަރު ފެންނަ ގޮތަށް ބަހައްޓައި ސަލާމަތީ މިންގަނޑުތައް ވަރުގަދަ ކުރުން ވެސް ހުށަހެޅުމުގައިވެ އެވެ.
މީގެއިތުރުން ކުނި އަޅާފައި، ރަނގަޅަށް ބަންދުކުރުމާއި މަގުމައްޗަށް ކުނި ނޭޅޭ ގޮތަށް ބެހެއްޓުމަށް ލާޒިމް ކުރަން ވެސް ހުށަހަޅާފައިވެ އެވެ.
މި އުސޫލަށް އަމަލު ނުކުރާ ކަމުގައިވާނަމަ ރަޖިސްޓްރީ ހިފެހެއްޓުމާއި ބާތިލު ކުރުމާއި ޖޫރިމަނާކުރުން ފަދަ ފިޔަވަޅުތައް އެޅުމަށް ވެސް ހުށަހަޅާފައިވެ އެވެ.
މި ހުށަހެޅުމަށް ހުރިހާ ކައުންސިލަރުން ތާއިދުކޮށްފައިވެ އެވެ. އަދި މި އުސޫލު އެކުލަވާލަން ކައުންސިލްގެ ވޭސްޓް މެނޭޖްމަންޓް ކޮމިޓީއަށް ފޮނުވުމަށް ވެސް ވަނީ ނިންމައިފަ އެވެ.
