އަލަތު ކައިވެނީގެ ހަފުލާއަށް މާލެއިން ހިލޭ ޖާގަ ހަމަޖައްސައިދޭން ނިންމައިފި
15 ޖުލައި 2026 | ބުދަ 13:25އަލަތު ކައިވެނީގެ ވަލީމާ ބޭއްވުމަށް ޒުވާނުން ކުރަންޖެހޭ މާލީ ހޭދަ ކުޑަކުރުމަށްޓަކައި، މާލެ ސިޓީ ކައުންސިލުން ހިލޭ ޖާގަ ދޫކުރުމުގެ އުސޫލެއް އެކުލަވައިލުމުގެ މަސައްކަތް ވަނީ ފަށާފައި. މިކަމާ ގުޅޭ ދިރާސާތައް ކައުންސިލްގެ ކޮމިޓީތަކުން ކުރަމުންދާއިރު، މިއީ ކައިވެނިކުރާ ޒުވާނުންނަށް މާލީ ގޮތުން ބޮޑު ލުޔެއް ހޯދައިދިނުމަށް ނިންމި ނިންމުމެއް.
ފެމިލީ ކޯޓުގައި ގިނަ ކައިވެނިތަކެއް ތާވަލު ކުރި ދުވަހެއް- ފައިލް ފޮޓޯ | ފެމިލީ ކޯޓު
އަލަތު ކައިވެނީގެ ވަލީމާ ހިލޭ ބޭއްވޭނެ އިންތިޒާމެއް ހަމަޖައްސައިދިނުމަށް މާލެ ސިޓީ ކައުންސިލުން ނިންމައިފި އެވެ.
ބުދަ ދުވަހު ބޭއްވި މާލެ ސިޓީ ކައުންސިލްގެ 5 ވަނަ ދައުރުގެ 8 ވަނަ ރަސްމީ އާންމު ޖަލްސާގައި އަލަތު ކައިވެނީގެ ވަލީމާ ހިލޭ ބޭއްވޭނެ އިންތިޒާމެއް ހަމަޖައްސައިދިނުމާ ގުޅޭގޮތުން މާލެ ސިޓީ ކައުންސިލުން މަޝްވަރާތަކެއް ވަނީ ކޮށްފަ އެވެ.
މި ޖަލްސާގައި މާފަންނު ދެކުނު ދާއިރާގެ ކައުންސިލަރު އިބްރާހިމް ލަބާން ޝަރީފް ވާހަކަ ދައްކަވަމުން ވިދާޅުވީ މިކަމުގައި ވީހާވެސް އަވަހަށް އުސޫލެއް ހަމަޖައްސައި ޒުވާނުންނަށް މި ފުރުސަތު ލިބޭނެ މަގެއް ހަމަޖެހުމަށް އެދޭ ކަމަށެވެ.
ލަބާންގެ ވާހަކައަށް ތާއީދު ކުރައްވާ ހުޅުމާލެ ދެކުނު ދާއިރާގެ ކައުންސިލަރު އަހުމަދު ޣާލިބު ވިދާޅުވީ ޒުވާނުންނަށް ކޮށްދޭ ކޮންމެ ކަމެއްގައި މުޅި ކައުންސިލުގެ އެއްބާރުލުން ލިބޭނެ ކަމަށާއި މި ފުރުސަތުގެ މަގުސަދަކީ ކައިވެނިކުރާ ޒުވާނުންނަށް މާލީ ގޮތުން ލުއިތަކެއް ހޯދައިދިނުން ކަމަށެވެ.
މޭޔަރު އާދަމް އާޒިމް ވަނީ، މި މައްސަލަ އިތުރަށް ދިރާސާ ކުރުމަށް، ފައިނޭންޝަލް ބަޖެޓް ކޮމިޓީއަށް ފޮނުއްވައި، ސޯޝަލް ސާވިސް އެންޑް ޖެންޑާ އެންޑް ކޮމިއުނިޓީ ފޭސް ކޮމިޓީ ގުޅިގެން ވާހަކަދައްކައިގެން މިކަމަށް ގޮތެއް ނިންމުމަށް ހަމަޖައްސާފަ އެވެ.
މީގެ އިތުރުން މި މައްސަލައިގައި ގޮތެއް ނިންމުމަށް ޓަކައި، ކައުންސިލްގެ ދެން އޮންނަ ޖަލްސާއަކަށް މިކަން ތާވަލުކުރުމަށް ވަނީ ނިންމާފަ އެވެ. އަދި މި އިންތިޒާމު ހަމަޖެހުމުން މާލޭގައި ދިރިއުޅޭ ޒުވާނުންނަށް ބޮޑު ލުޔެއް ލިބިގެންދާނެ ކަމަށް ކައުންސިލުން އުންމީދު ކުރާ ކަމަށް ވިދާޅުވެފައިވެ އެވެ.
އަލަތު ކައިވެނީގެ ހަފުލާއަށް މާލެއިން ހިލޭ ޖާގަ ހަމަޖައްސައިދޭން ނިންމައިވާއިރު، މިފަދަ ހަފްލާތަކަށް ބޮޑެތި އަދަދުތަކުން ރުފިޔާ ދައްކަން ޖެހުމަކީ ޒުވާނުންގެ ބޮޑު ޝަކުވާ އެކެވެ. ކޮންމެ މަހެއްގައި ވެސް މާލޭގައި އެތައް ކައިވެންޏެއް ކުރި ނަމަވެސް އެއް ފަހަރާ އަތުން އެހައި ބޮޑު ހަރަދެއް ދާތީ، ބައެއް މީހުން ލޯނު ނަގައިގެން ވެސް ކައިވެނީގެ ހަފްލާތައް ބާއްވަ އެވެ.
ނަމަވެސް ސިޓީ ކައުންސިލްގެ މި ނިންމުމަކީ އަލަށް ދިރިއުޅުމެއް ފަށާ ޒުވާނުންނަށް މާލީ ގޮތުން ލިބޭނެ ވަރަށް ބޮޑު ލުޔެކެވެ.
