މުއިއްޒުގެ "ވަރި މަދުކުރުމާ ބެހޭ ޤައުމީ އޮފީސް"

މަގުމަތިން ދިމާވި ރައްޓެއްސަކު ކޮށްލި ސުވާލަކުން ހައިރާން ވިއެވެ. އެއީ އަނެއްކާ ކޮން ކަމެއް ބާވައޭ ހިތަށް އެރިއެވެ. އޭނާ އެހީ "ވަރި ވަރިމަދުކުރުމާ ބެހޭ ޤައުމީ އޮފީސް" ހުންނަ ތަނެއް އެނގޭ ހެއްޔޭއެވެ.

ވަރަށް ސީރިއަސް ވެލާފައި އެއެހި ސުވާލުގެ ޖަވާބުގައި އޭގެ އޮފީހެއް ހުރޭހޭ އަހައިފީމެވެ. ދެންވެސް ދިނީ ތަފާތު ޖަވާބެކެވެ. އާން ހުންނާނެތާއެވެ. "އޭނާ ބުންޏެވެ.

އެކަމަކު ތިޔަ ކަހަލަ އޮފީހެއް ހުންނަ ކަމެއް ނޭނގެއޭ ބުނުމުން އޭނާ ބުނީ "ނާފަހެ ނުހުންނާންވީ ސަބަބެއް ނެތްތާއޭ. އެންމެ ގިނަ އެކައްޗަކީ އެވިއްޔާއޭ" އޭނާ ބުންޏެވެ. އިތުރަށް ބުނީ ކަންކަން ރަނގަޅުކުރުމަށް އޮފީސް އުފެއްދެވުމުގައި މެކުހަށް ޖަހާފައިވާ މުއިއްޒު އޭގެ އޮފީހެއްވެސް ހުންނާނީ ހަދާފައި ތާއެވެ.

ވެގެން އުޅޭ ގޮތެއް ސާފުވީ އެހާ ހިސާބުންނެވެ. އޭނާ އެއިޝާރާތް ކުރަނީ "މާލެ ސަރަހައްދުގެ މަގުތަކުގައި ދުއްވާ އުޅަނދުފަހަރު ގިނަވެ ދިމާވަމުން އަންނަ ތޮއްޖެހުމުގެ މައްސަލަ ހައްލުކުރުމަށް ރައީސް ޑރ. މުހައްމަދު މުއިއްޒު ވަކި ޚާއްސަ އޮފީހެއް އުފައްދެވި އުފެއްދެވުމަށެވެ"

"ގްރޭޓާ މާލެ ޓްރާންސްޕޯޓް އެންޑް މޮބިލިޓީ އޮފީސް"ގެ ނަމުގައި މި އޮފީސް އެ މަނިކުފާނު އުފައްދަވައިފައިވަނީ، ގާނޫނުއަސާސީގެ 116 ވަނަ މާއްދާގެ ދަށުން ރައީސުލްޖުމްހޫރިއްޔާއަށް ލިބިވަޑައިގަންނަވާ އިޚުތިޔާރުގެ ދަށުންނެވެ.

ރައީސް އޮފީހުން ބުނި ގޮތުގައި، އެ އޮފީސް ހިންގާނީ، މިނިސްޓްރީ އޮފް އިކޮނޮމިކް ޑިވެލޮޕްމަންޓް، ޓްރާންސްޕޯޓް އެންޑް ޓްރޭޑްގެ ދަށުންނެވެ.

މިއީ، މާލެ ސަރަހައްދުގެ މަގުތަކުގައި ދުއްވާ އުޅަނދުތަކުގެ އަދަދު އިތުރުވެ، މަގުތަކުގެ ތޮއްޖެހުމުގެ މައްސަލަ ބޮޑުވުމާ ގުޅިގެން އެ ކަމަށް އަވަސް ޙައްލެއް ހޯދުމަށް ޓަކައި ކަމާބެހޭ ފަރާތްތަކާ ގުޅިގެން ޕުރޮގުރާމުތައް އެކުލަވައިލައި ތަންފީޒުކުރުމަށް ރައީސް ހެއްދެވި އޮފީހެއް ކަމަށް ރައީސް އޮފީހުން ބުންޏެވެ.

މީގެއިތުރުން، މާލޭ ސަރަހައްދުގެ ދަތުރުފަތުރުގެ ނިޒާމު ޒަމާނީކޮށް، ޕާކުކުރެވޭނެ ވަސީލަތްތަކާއި އެހެނިހެން ޒަމާނީ ޙައްލުތައް ހޯދައި، އެފަދަ ވަސީލަތްތައް ތަރައްޤީކުރުމުގެ މަސައްކަތްތައް ތަންފީޒުކުރުމުގައި މި އޮފީހުން އިސް ދައުރެއް އަދާކުރާނެއެވެ.

އެ އޮފީސް ހިންގާނީ، ގަވަނިންގ ބޯޑެއްގެ ލަފާގެ ދަށުން ކަމަށްވާއިރު، އެ އޮފީހަށް ދައުލަތުގެ އިދާރާތަކުން ލިޔާ ސިޓީގައި ޖަހާނެ ނަންބަރަކީ، 1142 ކަމަށް ރައީސް އޮފީހުން ވަނީ ބުނެފައެވެ.

މިފަދަ އޮފީހެއް އުފެއްދެވި އިރު، މިހާރުވެސް ޓްރާންސޕޯޓް މިނިސްޓްރީއެއް އެބަހުއްޓެވެ. ޤާނޫން ތަކާއި ގަވާއިދުތައް ތަންފީޒް ކުރުމުގައި ފުލުހުންވެސް ހަރަކާތްތެރިވާތަން ފެނެއެވެ. ޗެކް ޕޯސްޓްތައް ޖަހައިގެން ބަލަންވެސް ބަލައެވެ. ޕާކް ކުރެވޭނޭ ތަންތަނާއި ޕާކް ނުކުރެވޭނޭ ތަންތަން ވަނީ ކަނޑައަޅާފައެވެ. ދުއްވުމުގައި ކަންކުރާން ޖެހޭ އުސޫލުތަކެއް ވަނީ ހެދިފައެވެ. އުނދަގޫވާ ގޮތައް ގަވާއިދާ ޚިލާފަށް ޕާކް ކޮށްފައި ހުންނަ އުޅަނދުތައް ދޭތެރެ ދޭތެރެއިން ޓޯވ ވެސް ކުރެއެވެ.

އަނެއްކޮޅުން މިފަދަ އޮފީހެއް އުފައްދަވާފައި މިވަނީ މާލޭ ސިޓީ ކައުންސިލުން މާލޭގެ ހާލަތު ދެނެގަތުމަށް ދިރާސާތަކެއްކޮށް އެދިރާސާތަކުގެ އަލީގައި ކަންކުރަން ރާވައި ޕްލޭނެއްވެސް އެކުލަވާލާފައި ވަނިކޮށެވެ. މާލޭ ރައްޔިތުންގެ ޚިޔާލް ހޯއްދެވުމަށް ސިޓީ ކައުންސިލުން ދާދިފަހުން ބޭއްވި ބައްދަލުވުމުގައި އެކަން ވަނީ ޢާއްމުވެސް ކުރައްވާފައެވެ. އަދި އެކަން ތަންފީޒް ކުރައްވާނީ ސަރުކާރުގެ ކަމާ ގުޅުންހުރި އެންމެހާ އިދާރާތަކާއި ގުޅިގެން ކަމަށް މާލޭގެ މޭޔަރު އާދަމް އާޒިމް ވަނީ ވިދާޅުވެފައެވެ.

ސުވާލަކީ މާލޭގެ ތޮއްޖެހުމާއި ވެހިކަލްތައް ގިނަ ވުމާއި ވެހިކަލް ދުއްވުމުގެ ދަތިކަން ހައްލު ނުވެގެން މިއުޅެނީ އޮފީހެއް މަދުވެގެން ހެއްޔޭއެވެ. އުފެއްދި އޮފީހާ ގުޅޭ ގޮތުން ސޯޝަލް މީޑިޔާގައި ކޮށްފައިވާ ބައެއް ކޮމެންޓް ތަކަށް ބަލާއިރު އިތުރު އޮފީހެއް ބޭނުމެއް ނުވެއެވެ. މިހާރުވެސް އެކަން ކުރާނެ އިދާރާތައް މަދެއް ނޫނެވެ. އަދި މާލޭގެ މަގުތަކުގެ ކަންކަން ބެލެހެއްޓުމަށް މާލޭ ސިޓީ ކައުންސިލްގެ މެންޑޭޓުގައި ވަނީ ހިމެނިފައެވެ. އެކައުންސިލަށް އެއްބާރުލުން ދީގެން ތަންފީޒީ އޮނިގަނޑު ހަރުދަނާކޮށް ތަންފީޒް ކުރުމުން ހައްލުތަކެއް ގެނެވޭނެއެވެ.

ކޮމެންޓް ކުރި އެކަކު ބުނީ މިއޮފީހުގެ މެންޑޭޓަކީ "އަވަހަށް މައްސަލަ ހައްލު ކުރުމަށް ބައެއް ވެހިކަލްތަކާއި ބައެއް މީހުން މާލެއިން ބޭރުކުރުން ތޯއެވެ"

އެހެން މީހަކު ވަނީ ތޮއްޖެހުން ހައްލު ކުރުމަށް މިހާރުވެސް ހުރި އިދާރާތައް ހިމެނޭ ލިސްޓެއް ކިޔައިދީފައެވެ. " މާލެއާއި މާލެ ސަރަޙައްދުގެ މަގުތަކާއި ޓްރެފިކް ބަލަހައްޓަން: 1. ދިވެހި ފުލުހުން އަދި (ބޭނުން ވެއްޖެ ނަމަ ސިފައިން) 2. ޓްރާންސްޕޯރޓް މިނިސްޓްރީ 3. ސިޓީ ކައުންސިލް ދެން އިތުރު ކޮން ތަނެއް އުފައްދަންވީ؟ ހެޔޮނުވާނެ. އިޚުލާޞްތެރިކަން އިސްކުރޭ. ރައްޔިތުންނަށް ވަފާތެރިވޭ. ޔަޤީންކުރޭ! ތިބާގެ ކޮންމެ ޢަމަލަކާ މެދު ސުވާލުކުރެވޭނެ ދުވަސް އަންނާނެ!" އޭނާ ބުނެފައިވެއެވެ.

އިތުރު ކޮމެންޓެއްގައި ބުނީ "އޮފީސް ހަދައިގެން ތިބެ ހުސްއަނގަތަޅަމުން މުސާރަ ނެގި ވަރަކަށް މަގުމަތީގެ ވެހިކަލްތަކުގެ ސައިޒު ދާނީ ކުޑަވަމުން ހިކެމުން މަދުވަމުން. މިއީ މިޒަމާނުގެ ސައިންޓިފިކު ހޯދުންތަކާއި ޖައްވީ އިދާރާތަކުގެ ދިރާސާތަކުން ފެންނަން ހުންނަ ކަންކަމެވެ. ރާއްޖެ ތަރައްގީވެފައިވާ މިންވަރަކީ ފާޚާނާ ހޮޅީގެ މައްސަލައެއްވިޔަސް އެކަން ހައްލު ކުރަން ވަކި އޮފީ ހަކާއި ގޮނޑި މޭޒާ އޭސީ އަދި މުއައްޒަފުންލައި އެމީހުންނަށް ބޮޑެތި މުސާރާދީގެން ނޫނީ ހައްލުކުރުން ކޮމްޕުލެކުސް ކަންކަމަށްވެފައެވެ. އެގޮތުން ސުޓޭޓް ފާމާއަމާ އަދި އެނޫންވެސް ޑީބީއެމް ބޭންކު ފަދަ ބޮޑެތި ތަރައްގީގެ މެގަ ކުރިއެރުންތަށް ހާސިލުވެފައި މިވަނީ މި ހަރުދަނާ ސިޔާސަތުތަކަށް ތަބާވެގެންނެވެ." ރައީސް މުއިއްޒުގެ ސަރުކާރަށް ނިސްބަތްކޮށް އޭނާ ބުންޏެވެ.

ކޮމެންޓްތަކަށް ބަލާއިރު ގިނައީ މި އޮފީސް ހެދުމުން ކަންބޮޑުވުން ފާޅުކުރި ފަރާތްތަކެވެ. އަދި ބައެއް މީހުން ބުނާ ގޮތުގައި މިއީ ސަރުކާރުން ބޭނުންވާ އިތުރު ބަޔަކަށް ވަޒީފާ ދިނުމަށް ކުރާ ކަމެކެވެ. އަދި މިކަމުގެ ސަބަބުން މައްސަލަ ހައްލުވުމަށްވުރެ ދައުލަތުގެ ޚަރަދު އަނެއްކާވެސް ދާނީ ބޮޑުވަމުންނެވެ.

ހަނދާނަށް އަންނަނީ ތަންކޮޅެއް ކުރީގެ ވާހަކައެކެވެ. ކުރީގެ ސަރުކާރެއްގައި މިނިސްޓްރީއަކުން އަމަލީ މަސައްކަތައްވުރެ ކޮމެޓީތައް ގިނަވުމުން މިނިސްޓަރަށް، ކޮމެޓީތައް މަދުކޮށްފައި އަމަލީ މަސައްކަތައިގެން އުޅުއްވުމަށް ރައީސުލް ޖުމްހޫރިއްޔާ އެންގެވިއެވެ.  ޖެހިގެން އައި ދުވަހު އެ މިނިސްޓްރީން ރައީސް އޮފީހަށް ސިޓީއެއް ފޮނުވިއެވެ. އޭގައިވަނީ  "އެންގެވި ގޮތައް ކޮމެޓީތައް މަދުކުރުމަށް ކޮމެޓީއެއް އުފައްދަވާނެ ކަމަށާއި އެކޮމެޓީގެ ކަންކަން  ވިލެރަސް ކުރުމަށް ކޮމެޓީއެއް އުފައްދަވައި އެކޮމެޓީ މޮނިޓަރ ކުރުމަށްވެސް ކޮމެޓީއެއް އުފެއްދުމަށް ނިންމާފައިވާ ކަމަށެވެ.

ކޮންމެއަކަސް މަދުވެގެން މިއުޅެނީ އޮފީހެއް ނުވަތަ އިދާރާއެއް ނޫނެވެ. ގައުމުގައި ހުރި ކޮންމެ މައްސަލައެއް ހައްލުކުރަން އެކަންކަމާ ގުޅޭ އިދާރާތަކާއި ވުޒާރާތައް ހުރިގޮތައް ހުއްޓާ ވަކި އޮފީސްތަކެއް ހަދަމުންދާނަމަ ވަރި މަދުކުރުމަށް ވެސް ވަކި އޮފީހެއް  އުފެއްދުމަކީ ގާތް ކަމެކެވެ. ދުނިޔޭގެ ނިސްބަތުން އެންމެ ވަރި ގިނަ އެއް ގައުމަކީ ރާއްޖެ ކަމަށް ވާއިރު، "ވަރި މަދުކުރުމާ ބެހޭ ޤައުމީ އޮފީސް" ރައީސް މުއިއްޒު އުފެއްދެވުމަކީ ދުރުކަމެއް ހެނެއް ހީއެއް ނުވެއެވެ.