އެފްއޭއެމް ލީގު ކަޕް: ނިއު ބަލިކޮށް މާޒިޔާ އަށް ރަނގަޅު ފެށުމެއް

މިހާރު ކުރިއަށްދާ އެފްއޭއެމް ލީގު ކަޕް ގައި ނިއު ރޭޑިއަންޓް ސްޕޯޓްސް ކުލަބާ ދެކޮޅަށް ކުޅުނު މެޗުން މޮޅުވެ، މާޒިޔާ ސްޕޯޓްސް އެންޑް ރެކްރިއޭޝަން އިން މުބާރާތުގެ ފެށުން ރަނގަޅު ކޮށްފި އެވެ.

ގަލޮޅު ރަސްމީ ދަނޑުގައި ހޯމަ ދުވަހުގެ ހަވީރު ކުޅުނު މެޗު މާޒިޔާ އިން ކާމިޔާބު ކުރީ 5-1 އިންނެވެ. މެޗުގެ ފުރަތަމަ ހާފުގައި މާޒިޔާ އިން ދެ ލަނޑު ޖެހިއިރު، އަނެއް ތިން ލަނޑު ޖެހީ ދެ ވަނަ ހާފުގަ އެވެ.

މެޗު ފަށައިގެން ފަސް ވަނަ މިނެޓުގައި މާޒިޔާ އަށް ލީޑު ނަގައިދިނީ ހަމްޒާ މުޙައްމަދު (ހަމްޕު) އެވެ. އޭގެ ފަހުން ފުރަތަމަ ހާފުގެ ފުރިހަމަ ވަގުތު ހަމަވާން ފަސް މިނެޓަށް ވެފައި ވަނިކޮށް، ހަމްޕު ވަނީ މާޒިޔާގެ ދެ ވަނަ ލަނޑު ޖަހައި ލީޑު ފުޅާ ކޮށްފަ އެވެ.

މެޗުގެ ދެ ވަނަ ހާފުގައި ހަމްޕު ވަނީ ތިން ވަނަ ލަނޑެއް ޖަހައި ހެޓްރިކް ހަމަކޮށްފަ އެވެ. އޭގެ ފަހުން މެެޗުގެ 72 ވަނަ މިނެޓުގައި މާޒިޔާގެ ހަތަރު ވަނަ ލަނޑު ޖެހީ ޙަސަން ނަޒީމް އެވެ. އަދި މެޗުގައި މާޒިޔާގެ ފަހު ލަނޑު ޖެހީ މުޙަައްމަދު އިލާން އިމްރާން އެވެ. މެޗުގައި ނިއު ރޭޑިއަންޓުގެ ހަމައެކަނި ލަނޑު ޖެހީ ރާފިޤު އާމިނު އެވެ.

މި މުބާރާތަކީ އެފްއޭއެމް އިން މިދިޔަ މަހު ފަށަން މަސައްކަތް ކުރި ފުޓުބޯޅަ ސީޒަން ފެށިފައި ނުވާތީ، އޭގެ ބަދަލުގައި އެފްއޭއެމް އިން ރޭވި މުބާރާތެކެވެ. ފުޓުބޯޅަ ސީޒަން ފެށުން ލަސް ކުރަން ޖެހުނީ، ދުނިޔޭގެ ފުޓުބޯޅައިގެ މައި އިދާރާ (ފީފާ) އިން އެންގުމުންނެވެ.

މި މުބާރާތުގައި ވާދަކުރަނީ ޖުމުލަ ފަސް ޓީމެވެ. އެއީ ފުރަތަމަ ޑިވިޝަންގެ ތިން ޓީމު އަދި ދެ ވަނަ ޑިވިޝަންގެ ތިން ޓީމެވެ. ބައެއް ޓީމުތަކުން ވަނީ މި މުބާރާތުގައި ބައިވެރި ނުވާން ނިންމައިފަ އެވެ.

ފުރަތަމަ ޑިވިޝަން އިން މި މުބާރާތުގައި ވާދަކުރަނީ މާޒިޔާ ސްޕޯޓްސް އެންޑް ރެކްރިއޭޝަން، ޓީސީ ސްޕޯޓްސް ކުލަބު އަދި އޮޑި ސްޕޯޓްސް ކުލަބު އެވެ. ދެ ވަނަ ޑިވިޝަން އިން ވާދަކުރަނީ ނިއު ރޭޑިއަންޓް ސްޕޯޓްސް ކުލަބު އަދި މަހިބަދޫ ސްޕޯޓްސް ކުލަބެވެ.