މުބީން ވިދާޅުވީ ނިކުންނެވީ ދިވެހި ފުޓުބޯޅަ ވެއްޓިފައިވާ އަނދަވަޅުން ސަލާމަތް ކުރުމަށް ކަމަށް!

ރާއްޖޭގެ އެންމެ ކާމިޔާބު ކުލަބު ނިއު ރޭޑިއަންޓު ސްޕޯޓްސް ކުލަބާ އެކު ފެށި މަސައްކަތަކީ ހަމައެކަނި އެ ކުލަބަށްޓަކައި ފެށި މަސައްކަތެއް ނޫން ކަމަށާއި، އެއީ މިވަގުތު ދިވެހި ފުޓުބޯޅަ ވެއްޓިފައިވާ އަނދަވަޅުން ސަލާމަތް ކުރުމަށް ފެށި މަސައްކަތެއް ކަމަށް އެ ކުލަބުގެ އައު ޗެއާމަން އަޙުމަދު މުބީން ވިދާޅުވެއްޖެ އެވެ.

މުބީން މިހެން ވިދާޅުވީ ނިއު ރޭޑިއަންޓުގެ ކޮންގްރެސްގައި އެ ކުލަބުގެ އައު ޗެއާމަންކަމަށް އޭނާ އިންތިޚާބު ކުރުމާއެކު، އެންމެ ފުރަތަމަ ދެއްކެވި ވާހަކައިގަ އެވެ. އެގޮތުން މުބީން ވިދާޅުވީ، އެ ބޭފުޅުންގެ ހަމައެކަނި ޢަމާޒަކީ ނިއު ރޭޑިއަންޓު ގޮވައިގެން ކުރިއަށް ދިޔުން ނޫން ކަމަށެވެ. ޚާއްސަކޮށް ދިވެހި ފުޓުބޯޅަ މިހާރު ވެއްޓިފައިވާ އަނދަވަޅުން ސަލާމަތް ކުރުމަށް ކުރެވޭ މަސައްކަތުގެ އެންމެ މުހިންމު އެއް ހިސާބަކީ ދިވެހި ރާއްޖޭގެ ފުޓުބޯޅައިގަ އެންމެ ސަޕޯޓަރުން ގިނަ ކުލަބު ނިއު ރޭޑިއަންޓާ ހަމައިގައި ކަމަށް މުބީން ފާހަގަ ކުރެއްވި އެވެ.

އެކަން ފާހަގަ ކުރައްވައި މުބީން ވިދާޅުވީ ދިވެހި ފުޓުބޯޅަ ކުރިއެރުވުމަށްޓަކައި ނިއު ރޭޑިއަންޓުގެ އިތުރުން ވިކްޓްރީ ސްޕޯޓްސް ކުލަބު އަދި ކުލަބު ވެލެންސިއާ ފަދަ ކުލަބުތައް ގަލޮޅު ދަނޑުން އަދި އެ ނޫން ވެސް ދަނޑުތަކުން ފެންނަން ޖެހޭ ކަމަށެވެ. ޚާއްސަކޮށް ދިވެހި ސަޕޯޓަރުންނަށް އުންމީދެއް ގެނެސްދެވެން އޮތީ އެ ހުރިހާ ކުލަބުތަކެއް ނިކުމެ، ވާދަވެރި މެޗުތަކެއް ކުޅެގެން ކަމަށް ވެސް މުބީން ވަނީ ވިދާޅުވެފަ އެވެ. ޚާއްސަކޮށް މުބީން ވަނީ އެންމެ ފަހުން އޮތް ދެ ވަނަ ޑިވިޝަންގެ ފުޓުބޯޅަ މުބާރާތުގައި ނިއު އާއި ވިކްޓްރީ ބައްދަލު ކުރި މެޗަށް އިޝާރާތް ކޮށްފަ އެވެ. އެގޮތުން މުބީން ވިދާޅުވީ އެ މެޗަކީ މި ފަހުގެ ތާރީޚެއްގައި އެންމެ ގިނަ ސަޕޯޓަރުން މެޗެއް ބެލުމަށް ދަނޑަށް ވަތް އެއް މެޗު ކަމަށް ޤަބޫލު ކުރެވޭ ކަމަށާއި، އެ މަންޒަރު ވެސް ފެނުން ކަމަށެވެ.

މީގެ އިތުރުން މުބީން ވިދާޅުވީ އެ ތިން ކުލަބު އެކީގައި އަލުން ގަލޮޅު ދަނޑަށް އައިސް، އެ ހިތްވަރާއި، އެ ރޫޙު ދައްކަން ޖެހޭ ކަމަށެވެ. އަދި އެކަން ކުރެވޭނީ ނިއު ރޭޑިއަންޓު ވެސް އަލުން ފުރަތަމަ ޑިވިޝަނަށް އައިސްގެން ކަމަށް މުބީން ވަނީ ވިދާޅުވެފަ އެވެ. މުބީން ވިދާޅުވީ އޭނާ އާއި އޭނާ އާއެކު ނިއު ރޭޑިއަންޓުގެ ބޯޑަށް އިންތިޚާބުވީ ޓީމުން ކުރަން ޖެހޭ މަސައްކަތާއި، މަސްއޫލިއްޔަތުތައް ވަރަށް ރަނގަަށް އިނގޭ ކަމަށެވެ. ޚާއްސަކޮށް ކުއީން އަޙުމަދު ވަޙީދު އަދި ނިއު ރޭޑިއަންޓުގެ ކުރީގެ މެނޭޖުމަންޓުން މިހާތަނަށް ކޮށްދެއްވާފައިވާ މަސައްކަތް ފާހަގަ ކުރަން ބޭނުންވާ ކަމަށް ވެސް މުބީން ވަނީ ވިދާޅުވެފަ އެވެ.

ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން ނިއު ރޭޑިއަންޓު ސަސްޕެންޑު ކޮށްފައި ވަނީ 2019 ވަނަ އަހަރު އެވެ. ނިއު ރޭޑިއަންޓު ސަސްޕެންޑު ކުރިއިރު، އޭގެ ކުރިން އެ ކުލަބުން ވަނީ އޭރު އެފްއޭއެމްގެ ރައީސަކަށް ހުންނެވި ބައްސާމް އަދީލް ޖަލީލްގެ އިތުބާރު ނެތް ކަމަށް ސޮއިކޮށް، ޕެޓިޝަނެއް ހުށަހަޅައިފަ އެވެ. އޭގެ ފަހުން އެފްއޭއެމް އިން ނިއު ރޭޑިއަންޓު ސަސްޕެންޑު ކުރީ އެ ކުލަބުގެ ކުޅުންތެރިންނަށް މުސާރަ ނުދޭ ކަމަށް ބުނެ އެވެ. އޭގެ ފަހުން އަލުން ފުރަތަމަ ޑިވިޝަނަށް އައުމަށް މަސައްކަތް ކުރަމުން އަންނަ ނިއު ރޭޑިއަންޓު ވަނީ، އެންމެ ފަހުން އޮތް ދެ ފަހަރު ވެސް ދެ ވަނަ ޑިވިޝަންގައި ވާދަކޮށްފަ އެވެ.