ނިއު ރޭޑިއަންޓުން ޓީސީ ބަލިކޮށްފި

ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން އިންތިޒާމު ކޮށްގެން ކުރިއަށް ގެންދާ، އެފްއޭއެމް ލީގު ކަޕްގައި ޓީސީ ސްޕޯޓްސް ކުލަބާ ދެކޮޅަށް ކުޅުނު މެޗުން ނިއު ރޭޑިއަންޓް ސްޕޯޓްސް ކުލަބު މޮޅުވެއްޖެ އެވެ.

އަންގާރަ ދުވަހުގެ ހަވީރު ގަލޮޅު ރަސްމީ ދަނޑުގައި ކުޅުނު މެޗު ނިއު ރޭޑިއަންޓުން ކާމިޔާބު ކުރީ 4-1 އިންނެވެ.

މެޗުގެ ފުރަތަމަ ހާފުގައި އެއްވެސް ޓީމަކަށް ލަނޑެއް ނުޖެހެ އެވެ. ނަމަވެސް ނިއު ރޭޑިއަންޓުން ދެ ވަނަ ހާފުގައި ހަތަރު ލަނޑު ޖެހިއިރު، ޓީސީ އިން ވެސް ވަނީ ލަނޑެއް ޖަހައިފަ އެވެ.

މެޗުގެ ދެ ވަނަ ހާފު ފަށައިގެން ހަތަރު ވަނަ މިނެޓުގައި ނިއު ރޭޑިއަންޓަށް ލީޑު ނަގައިދިނީ ބިދޭސީ ކުޅުންތެރިޔާ ރަފީގު އަމީނު އެވެ. އޭގެ ފަހުން މެޗުގެ 59 ވަނަ މިނެޓުގައި ޓީސީގެ ޒަޔާން ޒާހިރު ޖެހި ލަނޑުން އެ ޓީމު ވަނީ ނަތީޖާ ހަމަހަމަ ކޮށްފަ އެވެ.

މެޗުގައި ދެ ވަނަ ފަހަރަށް ނިއު ރޭޑިއަންޓުން ލީޑު ނެގީ، މެޗުގެ 69 ވަނަ މިނެޓުގައި މޫސާ ޔާމީން ޖެހި ލަނޑުންނެވެ. އޭގެ ތިން މިނެޓު ފަހުން އަމީނު ވަނީ ނިއު ރޭޑިއަންޓުގެ ތިން ވަނަ ލަނޑު ޖަހައިފަ އެވެ. މެޗުގައި ނިއު ރޭޑިއަންޓުގެ ހަތަރު ވަނަ ލަނޑު އާދަމް ނާސިހު ޖެހީ 82 ވަނަ މިނެޓުގަ އެވެ.

މިއީ އެފްއޭއެމް ލީގު ކަަޕްގައި ނިއު ރޭޑިއަންޓުން ކުޅުނު ދެ ވަނަ މެޗެވެ. ފުރަތަމަ މެޗުގައި ވާދަވެރި މާޒިޔާ ސްޕޯޓްސް އެންޑް ރެކްރިއޭޝަން އަތުން ބަލިވި ނަމަވެސް، ދެ ވަނަ މެޗުގައި ނިއު ރޭޑިއަންޓުން މި ވަނީ ޓީސީ ބަލިކޮށްފަ އެވެ.

މުބާރާތުގައި މިއީ ޓީސީ އިން ކުޅުނު ތިން ވަނަ މެޗެވެ. ފުރަތަމަ މެޗުގައި އޮޑި ސްޕޯޓްސް ކުލަބު އަތުން އެއްވަރުވި ނަމަވެސް، ދެ ވަަނަ މެޗުގައި މާޒިޔާ އަދި ތިން ވަނަ މެޗުގައި ނިއު ރޭޑިއަންޓު އަތުން މި ވަނީ ބަލިވެފަ އެވެ.

މުބާރާތުގައި ޓީސީގެ ހަތަރު ވަނަ މެޗުގައި ހޮނިހިރު ދުވަހުގެ ހަވީރު ނިކުންނާނީ މަހިބަަދޫ ސްޕޯޓްސް ކުލަބާ ދެކޮޅަށެވެ. އަދި ނިއު ރޭޑިއަންޓުގެ ތިން ވަނަ މެޗުގައި ހަމަ ދުވަހުގެ ރޭ ނިކުންނާނީ އޮޑިއާ ދެކޮޅަށެވެ.

އެފްްއޭން އިން އިންތިޒާމު ކޮށްގެން ބާއްވާ މި މުބާރާތުގައި ވާދަކުރަނީ ފަސް ކުލަބެވެ. އެއީ ފުރަތަމަ ޑިވިޝަންގެ ތިން ކުލަބުގެ އިތުރުން، ދެ ވަނަ ޑިވިޝަންގެ ދެ ކުލަބެވެ.

މިއީ މިދިޔަ އޭޕްރީލް މަހު ފަށަން މަސައްކަތް ކުރި ފުޓުބޯޅަ ސީޒަން ފެށުން ލަސް ކުރަން ޖެހުމުން، އޭގެ ބަދަލުގައި އެފްއޭއެމް އިން ބާއްވާ މުބާރާތެކެވެ.