ނިއު ބަލިކޮށް އޮޑި ދެ ވަނަ އަށް ޖެހިލައިފި

ދިރާގު ދިވެހި ޕްރިމިއާ ލީގުގައި ހޮނިހިރު ދުވަހުގެ ރޭ ނިއުރޭޑިއަންޓް ސްޕޯޓްސް ކްލަބް 1-0 އިން ބަލިކޮށް، އޮޑި ސްޕޯޓްސް ކްލަބުން ލީގުގެ ދެ ވަނަ އަށް ޖެހިލައިފި އެވެ.

މި މެޗުގައި ފެނިގެންދިޔަ ހަމައެކަނި ގޯލު މެޗުގެ ދެ ވަނަ ހާފުގައި އޮޑި އަށް ޖަހައިދިނީ މި ސީޒަނުގައި ރަނގަޅު ކުޅުމެއް ދައްކަމުން އަންނަ އިބްރާހިމް ވަހީދު ހަސަން (އިއްބެ) އެވެ. މެޗުގެ 66 ވަނަ މިނިޓްގައި އޮޑީގެ އަހުޒަމް ރަޝީދު ނަގައިދިން ހުރަހަކުން އިއްބެ ބޮލުން ފޮނުވާލި ބޯޅަ ގޯލަށް ވަނީ ނިއުގެ ކީޕަރު ކަވީޝް އަތުގައި ޖެހިފަ އެވެ.

މެޗުގެ ފުރަތަމަ ހާފުގައި ދެ ޓީމުން ވެސް އެޓޭކަށް ޖެހި ކުރިއަށް ގިނަ ބޯޅަތަކެއް ކުޅެގެން ލަނޑެއް ޖެހޭތޯ ބެލި ނަމަވެސް ކާމިޔާބު ވާގޮތެއް ނުވި އެވެ. ދެ ޓީމުގެ ޑިފެންޑަރުންނާއި ކީޕަރުން ވަނީ ވަރަށް ރަނގަޅު ކުޅުމެއް ދައްކާފަ އެވެ. ފުރަތަމަ ހާފު ނިމުނީ ލަނޑެއް ނުޖެހި، ދެ ޓީމު އެއްވަރުވެފައި އެވެ.

ދެ ވަނަ ހާފުގައި އިއްބެ ޖަހައިދިން ލަނޑުން އޮޑި އަށް ލީޑު ލިބުމާ އެކު، ނިއު އިން ލަނޑެއް ޖެހޭތޯ ކުރިއަށް ޖެހިގެން އެޓޭކްތަކެއް ކުރި ނަމަވެސް، އޮޑީގެ ޑިފެންޑަރުންނާއި ކީޕަރު މުހައްމަދު ޝަފީއު (ޗެކް) ވަނީ ރަނގަޅު ކުޅުމެއް ދައްކާފަ އެވެ. ނިއު އިން ގޯލު ޖެހުމަށް ގިނަ މަސައްކަތްތަކެއް ކުރި ނަމަވެސް، އޮޑީގެ ދިފާއީ ފަރާތުން ދެއްކި ވަރުގަދަ ކުޅުމުގެ ސަބަބުން މެޗު ނިމުނީ އޮޑީގެ 1-0 ގެ މޮޅާ އެކު އެވެ.

ދެ ވަނަ ޑިވިޝަންގެ ޗެމްޕިއަންގެ ގޮތުގައި އައި އޮޑިން ފުރަތަމަ ޑިވިޝަނުގައި އަލަށް މި ކުޅޭ ސީޒަނުގައި، އަންނަނީ ރަނގަޅު ނަތީޖާތަކެއް ނެރެމުންނެވެ. މި މޮޅާ އެކު، އޮޑިން ލީގުގެ ދެ ވަނަ ޖާގައަށް ޖެހިލީ، އަށް މެޗުން ހޯދި 19 ޕޮއިންޓާ އެކު އެވެ.

ލީގުގެ އެއް ވަނައިގައި އޮތް މާޒިޔާ ސްޕޯޓްސް އެންޑް ރެކްރިއޭޝަނަކީ މި ވަގުތު ލީގުގައި ބަލިނުވެ އޮތް ހަމައެކަނި ޓީމެވެ. އެ ޓީމުން އެއް ވަނައިގައި އޮތީ ކުޅުނު ހުރިހާ މެޗަކުން މޮޅުވެ، 24 ޕޮއިންޓާ އެކު އެވެ. މި މެޗުން ބަލިވި ނިއު ލީގުގެ ތިން ވަނައިގައި އޮތީ އަށް މެޗުން 17 ޕޮއިންޓް ހޯދައިގެންނެވެ. މިއީ މި ސީޒަންގެ ލީގުގައި ނިއު ބަލިވި ފުރަތަމަ މެޗެވެ.

ނިއު އިން މިރޭ އޮޑިއާ ކުޅުމުގެ ކުރިން އެންމެ ފަހުން ލީގުގައި ކުޅުނު މެޗުގައި ކްލަބް ގްރީން ސްޓްރީޓްސްއާ ވަނީ އެއްވަރުވެފަ އެވެ. ލީގުގައި ދެން އެންމެ އަވަހަށް ނިއު އަށް އޮތީ އަންނަ ހުކުރު ދުވަހު މާޒިޔާއާ ކުޅޭ މެޗެވެ.