އަޔާޑާއަކީ 112 މިލިއަން ޑޮލަރުގެ އަގު ހުރި ތަނެއް، ސަރުކާރުން ބޭނުން ވިޔަސް 1.5 މިލިއަން ޑޮލަރަށް ވިއްކާ ނުލެވޭނެ: ތަޒްމީލް
2 އޯގަސްޓު 2026 | އާދީއްތަ 06:27ގދ. މަގުއްދުވާ (އަޔާޑާ މޯލްޑިވްސް) ނުއަގުގައި ވިއްކާލަން އުޅޭކަމުގެ އަޑުތަކާ ގުޅިގެން، އެމްޓީޑީސީގެ ބޯޑުގައި ތިބޭ އާންމު ހިއްސާދާރުންގެ މެންބަރުން އެފަދަ ކަމަކަށް އެއްބަސްނުވާނެ ކަމަށް އެ ކުންފުނީގެ ކުރީގެ އެމްޑީ ތަޒްމީލް އަބްދުއްސަމަދު ވިދާޅުވި. މި މައްސަލަ ބޮޑުވެފައިވަނީ އެ ރަށުގެ ހެޑްލީސް ކުޑަ އަގަކަށް ވިއްކާލަން އުޅޭކަމުގެ މައުލޫމާތު ފެތުރުމާ ގުޅިގެން
އެމްޓީޑީސީގެ ކުރީގެ މެނޭޖިންގ ޑިރެކްޓަރު ތަޒްމީލް އަބްދުއްސަމަދު ރާއްޖެޓީވީގެ ފަލަސުރުހީ ޕްރޮގްރާމްގައި ވާހަކަދައްކަވަނީ | ރާއްޖެ އެމްވީ
އަޔާޑާއަކީ 112 މިލިއަން ޑޮލަރުގެ އަގު ހުރި ތަނެއް ކަމަށާއި، ސަރުކާރުން ބޭނުން ވިޔަސް 1.5 މިލިއަން ޑޮލަރަށް ވިއްކަން ކުންފުނީގެ އާންމު ބޯޑު މެންބަރުން އެއްބަސްނުވާނެ ކަމަށް އެމްޓީޑީސީގެ ކުރީގެ މެނޭޖިން ޑިރެކްޓަރު ތަޒްމީލް އަބްދުއްސަމަދު ވިދާޅުވެއްޖެ އެވެ.
ރާއްޖެ ޓީވީގެ "ފަލަސުރުހީ" ޕްރޮގްރާމްގައި ވާހަކަ ދައްކަވަމުން ތަޒްމީލް ވިދާޅުވީ އެމްޓީޑީސީއަކީ ސައުވީސް ހާސް ބައްތިރީސް ހިއްސާދާރުންގެ ހައްޤު ހިމެނޭ ކުންފުންޏެއް ކަމަށެވެ. އަދި އެމްޓީޑީސީ ބޯޑުގައި ސަރުކާރުގެ ފަރާތުން 4 މެންބަރެންނާއި އާންމުންގެ ފަރާތުން 5 މެންބަރުން ތިބޭނެ ކަމަށް ތަޒްމީލް ވިދާޅުވި އެވެ.
އެމްޓީޑީސީގެ ބޯޑުގައި އާންމުން ތަމްސީލު ކުރަން މިހާރު ތިބި 5 މެންބަރުންނަކީ ގާބިލު މެންބަރުންތަކެއް ކަމަށް ފާހަގަކުރައްވާ، ތަޒްމީލް ވިދާޅުވީ އެ މެންބަރުންނަކީ ކުންފުނީގެ ހިއްސާދާރުންގެ ހައްޤު ގެއްލޭފަދަ ކަމެއް ކުރާނެ ބައެއް ނޫން ކަމަށެވެ.
އެމްޓީޑީސީގައި މިއަދު އެ ތިއްބެވި އާންމު މެންބަރުންގެ ތެރެއިން ބޯޑަށް ހޮވިވަޑައިގެން ތިއްބެވި ހިއްސާދާރުންގެ ފަރާތުން ރިޕްރެސެންޓް ކުރައްވާ ބޭފުޅުން ތިބެގެންނެއް އެކަމަކަށް އެބޭފުޅުން އެއްބަސް ނުވާނެ، މިހެން މި ދަންނަވަން ޖެހުނު އެންމެ މުހިއްމު އެއް ސަބަބަކީ އެރަށަކީ ގދ. ގައި ހިނގަމުންދާ ރަށަކަށް ވީއިރު މިވަގުތު އެރަށުގެ ޕްރޮޕަޓީ ވެލިއު އަކީ 112 މިލިއަން ޑޮލަރު، 112 މިލިއަން ޑޮލަރުގެ ވެލިއު ހުރި ޕްރޮޕަޓީއެއް އެ ޕްރޮޕަޓީއަކީ އިނގޭތޯ، އެހެންވީހިނދު ސަރުކާރުން އަދި ބޭނުންވީ ނަމަވެސް އަޔާޑާއިން ސަރުކާރަށް ކޮންމެ ނުކިއްސަރު ހުށަހެޅުމެއް ސަރުކާރަށް ހުށަހަޅައިގެން ނަމަވެސް އަދި ސަރުކާރުން އޭގެ ތެރެއަށް ވަދެގެން ނަމަވެސް 1.4 މިލިއަން ރުފިޔާއަށް ޑޮލަރު، 1.4 މިލިއަން ޑޮލަރު، 1.5 މިލިއަން ޑޮލަރަކަށް އެމްޓީޑީސީ ބޯޑަކުން އެޕްރޫވް ކުރާނެ ކަމަކަށް އަޅުގަނޑުގެ ހިތެއް ގަބޫލެއް ނުކުރެތަޒްމީލް އަބްދުއްސަމަދު
ތަޒްމީލް ވިދާޅުވީ އަޔާޑާ ވިއްކާލައިފި ނަމަ ކޮންމެ އަހަރަކު އޮންނަ އަހަރީ އާންމު ޖަލްސާގައި އެކަމަށް ޖަވާބުދާރީ ވާން ޖެހޭނެކަން އާންމުންގެ ފަރާތުން އައިސް ހުރި ހިއްސާދާރުންނަށް އެނގޭނެ ކަމަށެވެ. އެހެންކަމުން އެ މެންބަރުން އެފަދަ ކަމެއް ނުކުރާނެ ކަމަށް ވިދާޅުވި އެވެ.
މީގެއިތުރުން، ކުރިން ވެސް އެ ރަށް ގަތުމަށްޓަކައި ސަރުކާރުގެ ތެރެއިން މަސައްކަތް ކުރި ކަމަށާއި ނަމަވެސް އޭރުގެ ޓޫރިޒަމް މިނިސްޓަރު ވިދާޅުވީ އެއީ ޓޫރަޒިމް މިނިސްޓްރީއާ ގުޅޭ މައްސަލައެއް ނޫން ކަމަށެވެ. އަދި އަޔާޑާއަކީ އެމްޓީޑީސީގެ ޕްރޮޕަޓީއެއް ކަމަށާއި އެމްޓީޑީސީއަކީ ޕަބްލިކް ލިސްޓެޑް ކުންފުންޏެއް ކަމަށް ވިދާޅުވި ކަމަށް ވެސަ ތަޒްމީލް ވިދާޅުވި އެވެ.
އެމްޓީޑީސީ އަށް ކުއްޔަށް ދޫކޮށްފައިވާ ގދ. މަގުއްދުވާގެ ހެޑްލީސް، އެ ރަށުގައި ރިސޯޓު ހިންގަމުން އަންނަ ތުރުކީގެ އަހްމެޓް އައިޑެނިޒް ކުންފުންޏަށް ނުއަގުގައި ވިއްކާލަން މަސައްކަތް ކުރަމުން އަންނަކަމުގެ މައުލޫމާތު ވަނީ ފެތުރިފައި އެވެ. މިކަމާ ގުޅިގެން ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެންބަރު މުހައްމަދު އިބްރާހީމް (ކުޑޫ) ވަނީ މިކަން ސާފުކުރުމަށް އެ ކޯޕަރޭޝަންގެ އައު މެނޭޖިން ޑިރެކްޓަރު ހާރިސް މުހައްމަދަށް ސިޓީއެއް ފޮނުއްވާފައި އެވެ.
