އުރުދުންގައި ހުންނަ އެމެރިކާގެ އަސްކަރީ މަރުކަޒަށް އީރާނުން ދިން ހަމަލާތަކުގައި އެއްވެސް ގެއްލުމެއް ނުވާކަމަށް އެމެރިކާއިން ދައްކަމުންދާ ވާހަކަތައް ދޮގުކުރާ ފޮޓޯތަކެއް އީރާނުން އާންމުކޮށްފި
31 ޖުލައި 2026 | ހުކުރު 09:33އުރުދުންގައި ހުންނަ އެމެރިކާގެ އަސްކަރީ މަރުކަޒަށް ލިބުނު ގެއްލުންތައް ފެންނަ ފޮޓޯތަކެއް އީރާނުން އާންމުކުރުމާއެކު، ހަމަލާތައް ހުއްޓުވިކަމަށް ބުނެ އެމެރިކާއިން ދެއްކި ވާހަކަތަކުގެ ސައްހަކަމާމެދު ވަނީ ސުވާލު އުފެދިފައި. މި ހެކިތަކުން އެމެރިކާގެ ދިފާއީ ނިޒާމުތައް ފޫއަޅުވާލުމުގެ ގާބިލުކަން އީރާނަށް ލިބިފައިވާކަން ހާމަވާއިރު، މިއީ އެ ސަރަހައްދުގައިވާ އެމެރިކާގެ އަސްކަރީ ތައްޔާރީތަކަށް ލިބުނު ބޮޑު ގޮންޖެހުމެއް.
އިރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރު.ޖީ.ސީ) އިން އާންމުކުރި ފޮޓޯތަކުން، އުރުދުންގައި ހުންނަ މުވައްފަގު ސަލްތީ އެއާ ބޭސްގައި ހުރި އެމެރިކާގެ ހަނގުރާމަމަތީ ބޯޓުތައް މަރާމާތުކުރާ ހޭންގަރަކަށް ބޮޑެތި ގެއްލުންތަކެއް ލިބިފައިވާކަން ހާމަވެއްޖެ | ސްކްރީން އިމޭޖް
އުރުދުންގައި ހުންނަ އެމެރިކާގެ އަސްކަރީ މަރުކަޒަށް އަމާޒުކޮށް އީރާނުން ދިން ހަމަލާތަކުގައި އެއްވެސް ގެއްލުމެއް ނުވާކަމަށް ބުނެ، އެމެރިކާގެ ސެންޓްރަލް ކޮމާންޑް (ސެންޓްކޮމް) އިން ދައްކަމުންދާ ވާހަކަތައް ދޮގުކުރާ ފޮޓޯތަކެއް އިސްލާމިކް ރިވޮލިއުޝަނަރީ ގާޑް ކޯޕްސް (އައި.އާރް.ޖީ.ސީ) އިން އާންމުކޮށްފި އެވެ.
އަލަށް އާންމުކުރި މި ފޮޓޯތަކުން ފެންނަ ގޮތުގައި، މުވައްފަޤު ސަލްތީ އެއާ ބޭސްގައި ހުންނަ އެމެރިކާގެ ހަނގުރާމަމަތީ ބޯޓުތައް މަރާމާތުކުރާ މައި ހޭންގަރަށް ވަނީ ބޮޑެތި ގެއްލުންތަކެއް ލިބިފަ އެވެ. މީގެއިން ސާބިތުވަނީ އެ މަރުކަޒުގެ ދިފާއީ ނިޒާމުތައް ފަހަނައަޅައި، އީރާނުގެ މިސައިލްތައް އަމާޒަށް ވާސިލުވެފައިވާ ކަމެވެ.
އީރާނުން ވަނީ އެމެރިކާއަށް ލިބެމުންދާ ގެެއްލުންތައް ސެޓެލައިޓް ފޮޓޯގެ އެހީގައި ދައްކާފައި
މި ހެކިތައް އައި.އާރް.ޖީ.ސީ އިން އާންމުކޮށްފައި މިވަނީ، އީރާނުން ފޮނުވާލި ހުރިހާ މިސައިލެއް އެމެރިކާގެ ދިފާއީ ނިޒާމުތަކުން ހުއްޓުވާފައިވާ ކަމަށާއި، އެއްވެސް ބޯޓަކަށް ނުވަތަ އަސްކަރީ އާލާތަކަށް ގެއްލުމެއް ލިބިފައި ނުވާކަމަށް ބުނެ ސެންޓްކޮމް އިން ކުރިން ނެރުނު ބަޔާނަށް ރައްދު ދިނުމުގެ ގޮތުންނެވެ.
އައި.އާރް.ޖީ.ސީ އިން އާންމުކުރި ފޮޓޯތަކުން، އެމެރިކާގެ ޒަމާނީ ހަނގުރާމަމަތީ ބޯޓުތަކަށް ޚިދުމަތްދޭ ޚާއްސަ ހޭންގަރުގެ ފުރާޅަށާއި އެތެރޭގެ އޮނިގަނޑަށް ލިބިފައިވާ ގެއްލުންތައް ވަރަށް ސާފުކޮށް ފެންނަން އެބަހުއްޓެވެ. މި ފޮޓޯތަކަކީ ހަމަލާގެ ނުރައްކާތެރިކަން ކުޑަކޮށް ދެއްކުމަށް ޕެންޓަގަނުން ކުރަމުންދާ މަސައްކަތްތަކަށް ލިބުނު ވަރުގަދަ ރައްދެކެވެ.
އެ ފޮޓޯތަކާއެކު އައި.އާރް.ޖީ.ސީ އިން ނެރުނު މެސެޖެއްގައި ބުނެފައިވަނީ، ހަގީގަތް ފޮރުވުމަށް ކުރާ މަސައްކަތްތައް ހުއްޓާލައި ދުނިޔެއަށް ސައްހަ މައުލޫމާތު ހާމަކުރުން މާ ރަނގަޅުވާނެ ކަމަށެވެ. އަދި "އިސްތިއުމާރީ ބާރުތަކަށް އަދަބު ދޭނެ" ކަމަށް ބުނާ ބުނުމުގެ މާނައަކީ ކޮބައިކަން އާންމުންނަށް އަމިއްލަ ލޮލުން ފެނި، އެކަމާ މެދު ގޮތް ނިންމުމުގެ ފުރުސަތު ދޭންޖެހޭ ކަމަށާއި، އެ އަދަބު ވަގުތުން ދެވޭނެ ކަމަށްވެސް އެ ބަޔާނުގައިވެ އެވެ.
މީގެ ކުރިން ސެންޓްކޮމް އިން ވަނީ، އީރާނުގެ ހަމަލާތަކުގައި އެމެރިކާގެ އެފް-35 މަރުކާގެ ތިން ބޯޓަކާއި އިތުރު ތިން ބޯޓެއް ހަލާކުކޮށްލާފައިވާ ކަމަށް ބުނެ އައި.އާރް.ޖީ.ސީ އިން ނެރުނު ބަޔާން ދޮގުކޮށްފަ އެވެ. އެމެރިކާއިން އޭރު ބުނެފައިވަނީ އެއްވެސް ބޯޓަކަށް ގެއްލުމެއް ނުވާ ކަމަށާއި، ހުރިހާ މިސައިލަކާއި ޑްރޯންއެއް ވައްޓާލާފައިވާ ކަމަށެވެ.
މި ފޮޓޯތައް އާންމުވުމާއެކު، އެމެރިކާގެ އަސްކަރިއްޔާއިން މީޑިއާއަށް ދެމުންދާ މައުލޫމާތާއި ބިމުގެ ހަގީގަތާ ދެމެދު އޮތް ބޮޑު ފަރަގު މިވަނީ ހާމަވެފަ އެވެ.
އެމެރިކާގެ ދިފާއީ ނިޒާމަކީ ފޫއަޅުވާނުލެވޭނެ ނިޒާމެއްގެ ގޮތުގައި ދެއްކުމަށްޓަކައި، ހުރިހާ ހަމަލާއެއް ހުއްޓުވާފައިވާ ކަމަށް ސެންޓްކޮމް އިން ތަކުރާރުކޮށް ބުނަމުންދިޔަ ނަމަވެސް، އައި.އާރް.ޖީ.ސީގެ ހެކިތަކުން އެނގެނީ ޕެޓްރިއަޓް އަދި ތާޑް (THAAD) ފަދަ ވަރުގަދަ ދިފާއީ ނެޓްވޯކްތައް ފޫއަޅުވާލައި، އެމެރިކާގެ މުހިންމު އަސްކަރީ އަމާޒުތަކަށް ހަމަލާދިނުމުގެ ގާބިލުކަން އީރާނުގެ މިސައިލް ޓެކްނޮލޮޖީއަށް ލިބިފައިވާ ކަމެވެ.
އުރުދުންގައި ހުންނަ މި އަސްކަރީ މަރުކަޒަކީ އެ ސަރަހައްދުގައި އެމެރިކާއިން ހިންގާ ވައިގެ އޮޕަރޭޝަންތަކުގެ މައި މަރުކަޒެވެ. އަދި އެތަނަކީ އެމެރިކާގެ އެންމެ ޒަމާނީ ހަނގުރާމަމަތީ ބޯޓުތައް ބަލަހައްޓާ ތަނެކެވެ.
އެތަނުގެ މަރާމާތުކުރާ އޮނިގަނޑަށް ލިބުނު ގެއްލުމަކީ ހަމައެކަނި މާލީ ގޮތުން ލިބުނު ބޮޑު ގެއްލުމެއް ނޫނެވެ. އެއީ ހުޅަނގު އޭޝިއާގައި ހަރަކާތްތެރިވާ އެމެރިކާގެ ސިފައިންގެ އަސްކަރީ ތައްޔާރީތަކަށްވެސް އެޅުނު ވަރަށް ބޮޑު ހުރަހެކެވެ.
