ހުރްމުޒް ކަނޑުއޮޅިން ދަތުރު ކުރި ދެ ތެޔޮ ޓޭންކަރެއް އީރާން އިން ހުއްޓުވައިފި

ހުރްމުޒް ކަނޑު އޮޅީގެ ދެކުނުން ރައްކާތެރިކަން ނެތް މަގަކުން ދަތުރު ކުރަމުން ދިޔަ ދެ ތެޔޮ ޓޭންކަރެއް ހުއްޓުވައި، އަނބުރާ ފޮނުވާލާފައިވާ ކަމަށް އީރާންގެ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ) އިން ބުނެފި އެވެ. 

އައިއާރުޖީސީގެ ރަސްމީ ޓެލެގްރާމް ޗެނަލްގައި ނެރުނު ބަޔާނެއްގައި ބުނެފައި ވަނީ، އެ ޓޭންކަރުތައް އެ މަގުން ދިޔުމަށް އިރުޝާދު ދިނީ އެމެރިކާގެ ވައިގެ ހަނގުރާމަ މަތީ އުޅަނދު ތަކުން ކަމަށާއި، އޭގެ ތެރެއިން އެއް ޓޭންކަރުގައި ބޮޑު އަލިފާން ގަނޑެއް ވެސް ރޯވި ކަމަށެވެ. ނަމަވެސް އެ ބަޔާނުގައި ދެ ޓޭންކަރުގެ ނަމާއި، ދިދަ ނުވަތަ އޮޕަރޭޓަރުންގެ މައުލޫމާތު ހާމަ ކޮށްފައި ނުވެ އެވެ. 

މި ހާދިސާގައި އެއްވެސް ބަޔަކަށް އަނިޔާއެއް ލިބުނު ކަމުގެ، ނުވަތަ ގެއްލުމެއްވީ ކަމުގެ އެއްވެސް ތަފްސީލެއް މިހާތަނަށް ހާމަ ކޮށްފައި ނުވެ އެވެ. 

އައިއާރުޖީސީ އިން ބުނީ ހުރްމުޒް ކަނޑު އޮޅި އެއީ އީރާންގެ ސަރަހައްދު ކަމަށާއި، އެ ކަނޑު އޮޅީގެ މައްޗަށް އެ ގައުމުގެ ސިފައިންގެ ފުރިހަމަ ކޮންޓްރޯލް އޮންނާނެ ކަމަށެވެ. އަދި އެ ކަނޑު އޮޅިން ބޭނުން ގޮތަކަށް ދަތުރު ކުރުމުގެ ފުރުސަތު ނޯންނާނެ ކަމަށާއި، އެ ކަނޑު އޮޅީގެ ކަންކަން ކުރިއަށް ގެންދާނީ އީރާން އިން ކަމަށް ވެސް ބުނެފައިވެ އެވެ. 

އެ ބަޔާނުގައި އިތުރަށް ބުނެފައި ވަނީ އެމެރިކާގެ ވެރިންގެ ބިރު ދެއްކުމާއި، އިންޒާރުގެ ވާހަކަތައް އަދި އަނިޔާވެރިކަން ހުއްޓާލަންދެން ކަނޑު އޮޅި ބަންދު ކޮށްފައި އޮންނާނެ ކަމަށެވެ. އަދި އެމެރިކާގެ އަމަލު ތަކުގެ ސަބަބުން ޙާލަތު އިތުރަށް ދަތި ވެގެން ދާނެ ކަމުގެ އިންޒާރު ވެސް އެ ބަޔާނުގައި ވަނީ ދީފައި އެވެ. 

ހުރްމުޒް ކަނޑު އޮޅި ބަންދު ކުރުމުގެ ސަބަބުން، ދުނިޔޭގެ ތެލުގެ ވިޔަފާރި އަށް ބޮޑު އަސަރެއް ކުރާނެ ކަމަށެވެ. މި ކަނޑު އޮޅި އަކީ ދުނިޔޭގެ ތަލުގެ ވިޔަފާާރީގެ ބޮޑު ބައެއް ދަތުރު ކުރަމުން އަންނަ މުހިންމު މަގެކެވެ. މި ހާދިސާއާ ގުޅިގެން ސަރަހައްދީ ނުތަނަވަސްކަން އިތުރުވެ، ބައިނަލްއަޤުވާމީ ސަރަހައްދުގައި ކަންބޮޑުވުން އިތުރުވެފައިވާ ކަމަށް ރިޕޯޓުތައް ބުނެ އެވެ.