ހަމާސް އިން ހަތިޔާރު ބެހެއްޓުމުގެ އެއްބަސްވުމަކަށް އައިސްފައިވާ ކަމަށް ޓްރަމްޕް އިއުލާން ކުރައްވައިފި

ފަލަސްޠީނުގެ މިނިވަން ކަމަށް ޣައްޒާގައި ހަރަކާތްތެރިވަމުން އަންނަ ހަމާސް ޖަމާއަތާއި އިސްރާއީލްއާ ދެމެދު ހިނގަމުން އަންނަ ހަނގުރާމަ ނިންމުމަށްޓަކައި، ތާރީޚީ އެއްބަސްވުމަކަށް އައިސްފައިވާ ކަމަށް އެމެރިކާގެ ރައީސް ޑޮނަލްްޑް ޓްރަމްޕް އިއުލާން ކުރައްވައިފި އެވެ.

ޓްރަމްޕް ވިދާޅުވީ ބޯޑު އޮފް ޕީސް މެދުވެރިކޮށް އެކުލަވާލި އެއްބަސްވުމަކީ ސަރަހައްދީ ސުލްޙަ އަށް އެޅުނު މުހިންމު ފިޔަވަޅެއް ކަމަށެވެ. މި އެއްބަސްވުމުގެ ދަށުން ހަމާސް ޖަމާއަތުގެ އިތުރުން، ޣައްޒާގައި ހަރަކާތްތެރިވަމުން އަންނަ އެހެނިހެން ހަތިޔާރު އެޅި ޖަމާއަތްތަކުން ވެސް ފުރިހަމަ އަށް ހަތިޔާރު ދޫކޮށްލުމަށް ނިންމާފައިވާ ކަމަށެވެ. މި މަސައްކަތް ކުރިއަށް ދާނީ އެކި މަރުޙަލާތަކަށް ބަހާލައިގެން ކަމަށް، ރިޔާސީ ގަނޑުވަރު ވައިޓް ހައުސް އިން މައުލޫމާތު ދީފައިވެ އެވެ. 

ޓްރަމްޕް މިހެން ވިދާޅުވެފައިވާއިރު، މި އެއްބަސްވުމުގެ ދަށުން ހަތިޔާރު ބަހައްޓަން އެއްބަސްވެފައިވާ ކަމަށް ހަމާސް ޖަމާއަތުގެ އިސް އޮފިޝަލަކު ވެސް ވަނީ ކަށަވަރު ކޮށްދީފައި އެވެ. އެއްބަސްވުމާ ގުޅޭ ގޮތުން ވާހަކަ ދައްކަވަމުން ޓްރަމްޕް ވިދާޅުވީ، ހަތިޔާރު ބެހެއްޓުމުގެ މަރުޙަލާތައް ފުރިހަމަ އަށް ނިމުމާ އެކު، ޣައްޒާގައި ތިބި އިސްރާއީލްގެ ސިފައިން އެ ސަރަހައްދުން ފޭބުމަށް ހަމަޖެހިފައިވާ ކަމަށެވެ. މިއީ ގިނަ ދުވަސްތަކެއް ވަންދެން ކުރިއަށް ދިޔަ ނުރައްކާތެރި ހަމަނުޖެހުންތަކަށް ދާއިމީ ޙައްލެއް ހޯދުމަށް އެޅުނު ބޮޑު ފިޔަވަޅެއްގެ ގޮތުގައި އެމެރިކާގެ ސަރުކާރުން ވަނީ ސިފަކޮށްފައި އެވެ. 

ހަމާސްގެ އިސް އޮފިޝަލުންނާ ހަވާލާދީ ބައިނަލްއަޤުވާމީ މީޑިއާތަކުން ރިޕޯޓު ކޮށްފައިވާ ގޮތުގައި، އެ ޖަމާއަތުން މި އެއްބަސްވުމަށް ރުހުން ދިނީ ފަލަސްޠީނުގެ ރައްޔިތުންނަށް ދިމާވެފައިވާ އިންސާނީ ކާރިސާ އަށް ނިމުމެއް ގެނައުމަށާއި، ސަރަހައްދީ ހަމަޖެހުން ޤާއިމު ކުރުމުގެ މަޤުސަދުގައި އެވެ. މި އެއްބަސްވުމުގެ ސަބަބުން ޣައްޒާ އަލުން އަރާސްތު ކުރުމުގެ މަސައްކަތަށް ވެސް މަގުފަހި ވެގެން ދާނެ ކަމަށް ބެލެވެ އެވެ. 

މި ތާރީޚީ ނިންމުމާާ އެކު މެދު އިރުމަތީގެ ސިޔަސީ މަސްރަހަށް ބޮޑެތި ބަދަލުތަކެއް އަންނާނެ ކަމަށް ތަޖުރިބާކާރުން ލަފާ ކޮށްފައިވެ އެވެ. ޚާއްސަކޮށް އެތައް އަހަރެއް ވަންދެން ހަތިޔާރު ބޭނުން ކޮށްގެން ހިންގަމުން ދިޔަ ކުރިމަތިލުންތައް ހުއްޓުމަކަށް އައުމަކީ، އެ ސަރަހައްދުގައި ދިރިއުޅޭ އާންމު ރައްޔިތުންގެ ރައްކާތެރިކން ކަށަވަރު ވެގެންދާނެ ކަމެކެވެ. 

އެއްބަސްވުމުގައިވާ ކަންކަން ތަންފީޒު ކުރުމުގެ އަމަލީ މަސައްކަތްތައް ކުރިއަށް އޮތް ދުވަސްތަކުގައި ފެށިގެން ދާނެ ކަމަށް ބެލެވޭއިރު، ބައިނަލްއަގުވާމީ މުޖުތަމައުން ދަނީ މި ނިންމުމަށް މަރުހަބާ ކިޔަމުންނެވެ.