ގްރަހަމްގެ ޖަނާޒާގައި ޓްރަމްޕް މިންޓް ބައްސަވާ މަންޒަރު ފެންނަ ވީޑިއޯއެއް އާންމުވެ، ވައިރަލްވެއްޖެ!

އެމެރިކާގެ ސެނެޓަރު ލިންޑްސީ ގްރަހަމްގެ ޖަނާޒާގެ ތެރެެއިން، އެ ޤައުމުގެ ރައީސް ޑޮނަލްޑް ޓްރަމްޕް މިންޓް ބައްސަވާ ވީޑިއޯ ކޮޅެއް އާންމުވެ، ވަރަށް ބޮޑަށް ވައިރަލް ވެއްޖެ އެވެ.

އަންގާރަ ދުވަހުގެ ރޭ އޮތް ގްރަހަމްގެ ޖަނާޒާގައި ޓްރަމްޕްގެ އިތުރުން، އެމެރިކާގެ ނައިބު ރައީސް ޖޭޑީ ވޭންސް އާއި ސަރުކާރުގެ އިސްވެރިން ވެސް ވަނީ ބައިވެރިވެ ވަޑައިގެންފައި އެވެ. ގްރެެހަމް ނިޔާވެފައި ވަނީ ޖުލައި މަހުގެ 11 ވަނަ ދުވަހު އެވެ. އޭނާ އަކީ ވެރިކަން ކުރާ ރިޕަބްލިކަން ޕާޓީގެ އިސް، އަދި ޓްރަމްޕްގެ އަރިސް ބޭފުޅެކެވެ. 

ސޯޝަލް މީޑިއާގައި އާންމުވެފައިވާ ވީޑިއޯގައި ފެންނަ ގޮތުގައި ގޮނޑީގައި އިށީނދެގެން އިންނަވައި ޓްރަމްޕް ވަނީ ނައިބު ރައީސް ވޭންސް އާއި، އެމެރިކާގެ ޓްރެޒަރީ ސެކްރެޓަރީ ސްކޮޓް ބެސެންޓް އަށް މިންޓް ބައްސަވައިފަ އެވެ. އަދި ޓްރަމްޕް އަމިއްލަފުޅަށް ވެސް މިންޓެއް އަނގަ އަށް ލާ މަންޒަރު ފެނެ އެވެ. 

ގްރަހަމްގެ ޖަނާޒާގެ ތެރެއިން ޓްރަމްޕްގެ މިފަދަ ވީޑިއޯ ކޮޅެއް އާންމުވުމާ އެކު، ސޯޝަލް މީޑިއާގައި އެކި މީހުން އަންނަނީ ޝުއޫރުތައް ފާޅު ކުރަމުންނެވެ. ޚާއްސަކޮށް ނައިބު ރައީސް ވޭންސް އާއި ބެސެންޓް އަށް މިންޓް ދެއްވުމަށް ފަހު، ތިން ބޭފުޅުން ވެސް ހީ ސަމާސާ ކުރައްވައި، ވާހަކަ ދައްކަވާ މަންޒަރު ވެސް ފެނެ އެވެ.

މިއީ ހިތާމަ ފާޅުކުރުމާއި، ހަމަ ހިމޭންކަން އަދި މޮޅިވެރިކަމުގެ ވަގުތެއްގައި ޓްރަމްޕްގެ ފަރާތުން ފެނުނު ހުތުރު އަމަލެއް ކަަމަށް ވެސް ބައެއް ފަރާތްތަކުން ބުނެފައިވެ އެވެ. ޚާއްސަކޮށް މީގެ ކުރިން އެކިއެކި ބޭފުޅުންގެ ޖަނާޒާތަކުގެ ތެރެއިން ވެސް މިފަދަ މަންޒަރެއް ފެނިފައި ނުވާ ކަމަށާއި، މިއީ ވަރަށް މަދުން ނޫނީ ނުވާނެ ކަމެއް ކަމަށް ބައެއް މީހުން ވަނީ ބުނެފައި އެވެ. 

ނަމަވެސް، ބައެއް ފަރާތްތަކުން ބުނެފައި ވަނީ ޓްރަމްޕްގެ ފަރާތުން ފެނުނީ ވަރަށް އާދައިގެ އަމަލެއް ކަމަށެވެ. އެގޮތުން އަރިހުގައި ތިއްބެވި ބޭފުޅުންނަށް މިންޓް ދިއްކޮށްލުމަކީ ޓްރަމްޕްގެ ހިތްހެޔޮކަމާއި، އެ ބޭފުޅުންނާ އޮންނަ ގާތް ގުޅުން ހާމަވާ ކަމެއް ކަމަށް ވެސް ބައެެއް މީހުން ވަނީ ބުނެފައި އެވެ.