ޓްރަމްޕްގެ ދެ ވަނަ ދައުރުގައި ހަތް ވަނަ ފަހަރަށް ނަތަންޔާހޫ އެމެރިކާ އަށް ވަޑައިގެންފި
28 ޖުލައި 2026 | އަންގާރަ 04:34ޓްރަމްޕް އާއެކު ބާއްވާ ރަސްމީ ބައްދަލުވުމަށް ފަހު، ދެން ނަތަންޔާހޫ ވަޑައިގަންނަވާނީ އިސްރާއީލް އަށް ތާއީދުކުރައްވަމުން ގެންދެވި ރިޕަބްލިކަން ޕާޓީގެ ސެނެޓަރު ލިންޑްސީ ގްރެހަމްގެ ހަނދާނުގައި ބާއްވާ ހަފްލާ އަށް. މި މަހުގެ ތެރޭގައި އަވަހާރަވި ގްރެހަމް އަކީ އިސްރާއީލް އަށް ވަރަށް ބޮޑަށް ތާއީދު ކުރެއްވި ބޭފުޅެއް
އެމެރިކާގެ ރައީސް ޑޮނަލްޑް ޓްރަމްޕް އާއި، އިސްރާއީލްގެ ބޮޑު ވަޒީރު ބެންޖަމިން ނަތަންޔާހޫ | ގެޓީ އިމޭޖަސް
އެމެރިކާ އަށް ކުރައްވަމުން ގެންދަވާ ރަސްމީ ދަތުރުފުޅުގައި އިސްރާއީލްގެ ބޮޑު ވަޒީރު ބެންޖަމިން ނަތަންޔާހޫ އެ ޤައުމަށް ވަޑައިގެންފި އެވެ.
އެމެރިކާގެ ރައީސް ޑޮނަލްޑް ޓްރަމްޕްގެ ދައުވަތަކަށް އެ ޤައުމަށް ކުރައްވާ ދަތުރުފުޅުގައި، އަންގާރަ ދުވަހު ނަތަންޔާާހޫ ޓްރަމްޕްއާ ބައްދަލު ކުރައްވާނެ އެވެ. މި ދެ ބޭފުޅުން ބައްދަލު ކުރެއްވުމަށް ހަމަޖެހިފައި ވަނީ، އެމެރިކާގެ ރިޔާސީ ގަނޑުވަރު ވައިޓް ހައުސްގައި އެވެ.
ޓްރަމްޕް އާއެކު ބާއްވާ ރަސްމީ ބައްދަލުވުމަށް ފަހު، ދެން ނަތަންޔާހޫ ވަޑައިގަންނަވާނީ އިސްރާއީލް އަށް ތާއީދު ކުރައްވަމުން ގެންދެވި ރިޕަބްލިކަން ޕާޓީގެ ސެނެޓަރު ލިންޑްސީ ގްރެހަމްގެ ހަނދާނުގައި ބާއްވާ ހަފްލާ އަށެވެ. މި މަހުގެ ތެރޭގައި އަވަހާރަވި ގްރެހަމް އަކީ އިސްރާއީލް އަށް ވަރަށް ބޮޑަށް ތާއީދު ކުރެއްވި ބޭފުޅެކެވެ.
ނަތަންޔާހޫ އެމެރިކާާ އަށް ވަޑައިގެންނެވި މަންޒަރު
އެމެރިކާ އަށް ނަތަންޔާހޫ މި ކުރައްވާ ދަތުރުފުޅަކީ، އެމެރިކާ އާއި އިސްރާއީލްއާ ދެމެދު އޮތް ގުޅުން އިތުރަށް ވަރުގަދަ ކުރުމާ އެކު، ޓްރަމްޕްއާ މަޝްވަރާ ކުރެއްވުމަށް ކުރައްވާ ދަތުރުފުޅެކެވެ.
ޓްރަމްޕް އާއި ނަތަންޔާާހޫގެ ބައްދަލުވުމުގައި، އެމެރިކާ އާއި އީރާންއާ ދެމެދު ހިނގަމުން އަންނަ ހަނގުރާމައާ ގުޅޭ ގޮތުން ވެސް މަޝްވަރާ ކުރައްވާނެ ކަމަށް ބެލެވެ އެވެ. އަދި އެކަމުގައި އިސްރާއީލް އިން ބޭނުންވާ ކަންކަމާއި، އީރާންއާ ދެކޮޅަށް އިތުރު ފިޔަވަޅުތަކެއް އެޅުމަށް ނަތަންޔާހޫ ބާރު އަޅުއްވާނެ ކަމަށް ވެސް ބުނެފައިވެ އެވެ.
މިއީ 2025 ވަނަ އަހަރު އެމެރިކާގެ ވެރިކަމަށް ޓްރަމްޕް ވަޑައިގެންނެވި ފަހުން، ނަތަންޔާހޫ އެމެރިކާ އަށް ވަޑައިގެންނެވި ހަތް ވަނަ ފަހަރެވެ. ޓްރަމްޕްގެ ދެ ވަނަ ދައުރުގައި އެންމެ ގިނައިން އެމެރިކާ އަށް ވަޑައިގެންނެވި ލީޑަރަކީ ނަތަންޔާހޫ އެވެ. ޓްރަމްޕް އާއި ނަތަންޔާހޫ އަކީ ވަރަށް ގާތް ގުޅުމެއް ބާއްވާ ދެ ބޭފުޅުންނެވެ.
