ޓްރަމްޕްއާ ބައްދަލުކުރެއްވުމަށް ނަތަންޔާހޫ އެމެރިކާާ އަށް

އެމެރިކާގެ ރައީސް ޑޮނަލްޑް ޓްރަމްޕްއާ ބައްދަލު ކުރެއްވުމަށް، އިސްރާއީލްގެ ބޮޑު ވަޒީރު ބެންޖަމިން ނަތަންޔާހޫ އެމެރިކާ އަށް ފުރައިވަޑައިގެންފި އެވެ.

އިސްރާއީލް ސަރުކާރުގެ އަރަބި ބަހުން ހިންގާ އެކްސް އެކައުންޓުން ހާމަކޮށްފައިވާ ގޮތުގައި، ނަތަންޔާހޫ އެމެރިކާ އަށް ކުރައްވާ މި ދަތުރުފުޅަކީ ޓްރަމްޕްގެ ދައުވަތަކަށް ކުރައްވާ ދަތުރުފުޅެކެވެ. މި ބައްދަލުވުމުގައި ދެ ޤައުމުގެ މަސްލަހަތު ހިމެނޭ މުހިންމު ކަންތައްތަކާ ގުޅޭ ގޮތުން ދެ ބޭފުޅުން މަޝްވަރާ ކުރައްވާނެ ކަމަށް އެ ޕޯސްޓުގައި ބަޔާން ކޮށްފައިވެ އެވެ.

ނަތަންޔާހޫ އެމެރިކާ އަށް މި ވަޑައިގަންނަވަނީ، އެމެރިކާގެ ނިއު ޔޯކް ސިޓީ އަށް އޭނާ ވަޑައިގެންފި ނަމަ ހައްޔަރުކުރާނެ ކަމަށް ވިދާޅުވެ، އެ ސިޓީގެ މޭޔަރު ޒޯރަން މަމްދާނީ އިންޒާރު ދެއްވާފައި ވަނިކޮށެވެ. ނަމަވެސް، އެ އިންޒާރުގެ ފަހުން މަމްދާނީ ވަނީ، ނަތަންޔާހޫ ހައްޔަރުކުރުމުގެ ބާރު އެ ސިޓީގެ އިދާރާތަކަށް ނެތް ކަމަށް ވިދާޅުވެފައި އެވެ. 

ބައިނަލްއަޤުވާމީ ޖިނާއީ ކޯޓު (އައިސީސީ) އިން 2024 ވަނަ އަހަރު ވަނީ ނަތަންޔާހޫ އާއި، އިސްރާއީލްގެ ކުރީގެ ޑިފެންސް މިނިސްޓަރު ޔޯވް ގަލަންޓް ހައްޔަރުކުރުމުގެ އަމުރެއް ނެރެފައި އެވެ. އެއީ އިސްރާއީލް އިން ޣައްޒާގައި ހިންގަމުން އަންނަ ހަނގުރާމައިގައި، އިންސާނިއްޔަތާ ޚިލާފު ޖަރީމާތަކެއް ނަތަންޔާހޫ ހިންގަވާފައިވާ ކަމަށް ތުހުމަތު ކުރުމަށް ފަހު ނެރުނު އަމުރެކެވެ. 

ނަމަވެސް، އެ އަމުރު ނެރުނު ފަހުން ނަތަންޔާހޫ ވަނީ އެކި ފަހަރު މަތިން އެމެރިކާ އަށް ވަޑައިގެންފައި އެވެ. މިފަހަރުގެ މި ދަތުރުފުޅަކީ، 2025 ވަނަ އަހަރު ޓްރަމްޕް ދެ ވަނަ ދައުރަށް ވެރިކަމަށް ވަޑައިގެންނެވި ފަހުން، ނަތަންޔާހޫ އެމެރިކާ އަށް ވަޑައިގަންނަވާ ހަތް ވަނަ ފަހަރެވެ. މިއީ ޓްރަމްޕްގެ ދެ ވަނަ ދައުރުގައި އެމެރިކާ އަށް އެއް ލީޑަރަކު ވަޑައިގެންނެވި އެންމެ ގިނަ ފަހަރެވެ. 

އައިސީސީގެ އަމުރު އޮތް ނަމަވެސް، އެމެރިކާ އަކީ އެ ކޯޓުގެ މެންބަރު ގައުމަކަށް ނުވާތީ، ނަތަންޔާހޫ ހައްޔަރުކުރުމުގެ ގާނޫނީ މަޖުބޫރު ކަމެއް އެމެރިކާ އަށް ނޯވެ އެވެ. މި ދަތުރުފުޅުގެ ސަބަބުން އިސްރާއީލް އާއި އެމެރިކާގެ ގުޅުން އިތުރަށް ބަދަހި ވެގެން ދާނެ ކަމަށް މަސްރަހު ދިރާސާކުރާ ފަރާތްތަކުން ދެކެ އެވެ.